ന്യൂഡല്ഹി: ഡ്രൈവിങ് ലൈസന്സിനും വാഹനരജിസ്ട്രേഷനും ആധാര് നിര്ബന്ധമാക്കാനൊരുങ്ങി കേന്ദ്രസര്ക്കാര്. ഇതിനായി നിലവിലെ നിയമത്തില് ഭേദഗതി വരുത്തും. ഭേദഗതി നടപ്പാക്കുന്നതിന്റെ ഭാഗമായി കേന്ദ്ര ഉപരിതല ഗതാഗതമന്ത്രാലയം സംസ്ഥാന സര്ക്കാരുകളുടെയും പൊതുജനങ്ങളുടെയും അഭിപ്രായം തേടിയിട്ടുണ്ട്. ഈ മാസം അവസാനത്തോടെ വിജ്ഞാപനം ഇറങ്ങിയേക്കും. ബിനാമികളുടെ പേരുകളില് വാഹനങ്ങള് രജിസ്റ്റര് ചെയ്യുന്നതും വ്യാജരേഖകള് ഉപയോഗിച്ച് ഡ്രൈവിങ് ലൈസന്സ് നേടുന്നതും തടയുന്നതിനാണ് പുതിയ നീക്കം.
ഫോട്ടോപതിച്ച അംഗീകൃത തിരിച്ചറിയല് കാര്ഡുകളുടെ പകര്പ്പുകളാണ് ഇപ്പോള് അപേക്ഷകള്ക്കൊപ്പം സമര്പ്പിക്കേണ്ടത്. ഇതില് സുരക്ഷാവീഴ്ചകള് ശ്രദ്ധയില് പെട്ടതിനെ തുടര്ന്ന് കേന്ദ്ര ഇലക്ട്രോണിക്സ് ആന്ഡ് ഇന്ഫര്മേഷന് ടെക്നോളജി മന്ത്രാലയമാണ് മോട്ടോര്വാഹനവകുപ്പിലും ആധാര് നിര്ബന്ധമാക്കാന് നിര്ദേശിച്ചത്. ലേണേഴ്സ് ലൈസന്സ്, ലൈസന്സ് പുതുക്കല്, ഡ്യൂപ്ലിക്കേറ്റ് ഡ്രൈവിങ് ലൈസന്സ്, അഡ്രസ് മാറ്റം എന്നിവയ്ക്കും ഇന്റര്നാഷണല് ഡ്രൈവിങ് പെര്മിറ്റിനുമാണ് ആദ്യഘട്ടത്തില് ആധാര് നിര്ബന്ധമാക്കുക. ഇതിനൊപ്പം പുതിയ വാഹനങ്ങളുടെ രജിസ്ട്രേഷന്, ഉടമസ്ഥാവകാശ കൈമാറ്റം, അഡ്രസ് മാറ്റം, എതിര്പ്പില്ലാരേഖ എന്നിവയ്ക്കും ആധാര് സമര്പ്പിക്കേണ്ടിവരും.
വാഹനങ്ങളുടെ ഉടമസ്ഥാവകാശ കൈമാറ്റത്തിനുള്ള നടപടിക്രമങ്ങള് ഇപ്പോള് പൂര്ണമായും ഓണ്ലൈന് വഴിയാണ്. വാഹന ഉടമയ്ക്ക് ലഭിക്കുന്ന ഓ.ടി.പി സംവിധാനത്തിലൂടെയാണ് സുരക്ഷ ഉറപ്പിക്കുന്നതെങ്കിലും ഇതും ക്രമക്കേടിന് സാധ്യത കൂടുതലാണെന്നാണ് കണ്ടെത്തിയിരിക്കുന്നത്.