ചെന്നൈ: രാജീവ് ഗാന്ധി വധക്കേസ് പ്രതികളെ വിട്ടയക്കണമെന്ന് രാഷ്ട്രപതിയോട് ആവശ്യപ്പെട്ട് തമിഴ്നാട് മുഖ്യമന്ത്രി എം കെ സ്റ്റാലിന്. തമിഴ്നാട് സര്ക്കാര് ശുപാര്ശ രാഷ്ട്രപതി അംഗീകരിക്കണമെന്ന് സ്റ്റാലിന് രാഷ്ട്രപതിക്ക് അയച്ച കത്തില് ആവശ്യപ്പെട്ടു. സര്ക്കാരിന്റെ ശുപാര്ശയില് തീരുമാനം വൈകുന്നത് മനുഷ്യത്വമില്ലായ്മയാണെന്നും സ്റ്റാലിന് അഭിപ്രായപ്പെട്ടു.
അടിയന്തരമായി ഏഴു പ്രതികളെയും മോചിപ്പിക്കണം. മൂന്ന് പതിറ്റാണ്ടായി പ്രതികള് അനുഭവിക്കുന്നത് സമാനതകളില്ലാത്ത വേദനയും ദുരിതവുമാണ്. പ്രതികളെ മോചിപ്പിക്കണമെന്നാണ് തമിഴ്നാട്ടിലെ ജനങ്ങളുടെ ആഗ്രഹമെന്നും കത്തില് സ്റ്റാലിന് പറഞ്ഞു. മൂന്ന് പതിറ്റാണ്ടായി ശിക്ഷ അനുഭവിക്കുന്ന പ്രതികളെ മാനുഷിക പരിഗണന കണക്കിലെടുത്ത് വിട്ടയയ്ക്കാനായിരുന്നു തമിഴ്നാട് സര്ക്കാര് ശുപാര്ശ.
എന്നാല് മന്ത്രിസഭാ പ്രമേയം ഗവര്ണര് രാഷ്ട്രപതിയുടെ പരിഗണനയ്ക്ക് വിട്ടു. എല്ലാ വശങ്ങളും പരിഗണിച്ച് തീരുമാനമെടുക്കാനുള്ള അധികാരം രാഷ്ട്രപതിക്കെന്നാണ് ഗവര്ണറുടെ നിലപാട്.