ന്യൂഡെല്ഹി: ഡെല്ഹിയില് കോവിഡ് ബാധിച്ച് മരിച്ചവരുടെ മക്കള്ക്ക് സര്ക്കാര് സൗജന്യ വിദ്യാഭ്യാസം ഉറപ്പാക്കുമെന്ന് ഡെല്ഹി മുഖ്യമന്ത്രി അരവിന്ദ് കെജ്രിവാള്. പല കുടുംബങ്ങളിലും ഒന്നിലധികം പേര് മരണപ്പെടുന്ന സാഹചര്യമുണ്ടായി. നിരവധി കുട്ടികള്ക്ക് അവരുടെ രക്ഷിതാക്കളെ നഷ്ടപ്പെട്ടു. അവരുടെ വേദന ഈ സര്ക്കാര് മനസിലാക്കുന്നു. അവര്ക്ക് സര്ക്കാര് സൗജന്യ വിദ്യാഭ്യാസം നല്കാന് തയ്യാറാണ്. കെജ്രിവാള് പറഞ്ഞു.
സംസ്ഥാനത്തെ കോവിഡ് സ്ഥിതിഗതികള് വിശദീകരിക്കാന് വിളിച്ചുചേര്ത്ത വാര്ത്താസമ്മേളനത്തിലാണ് അരവിന്ദ് കെജ്രിവാള് ഇക്കാര്യം അറിയിച്ചത്. വേദനാജനകമായ ദിവസങ്ങളിലൂടെയാണ് കടന്നുപോകുന്നതെന്നും അദ്ദേഹം പറഞ്ഞു. കര്ശന നിയന്ത്രണങ്ങള് തുടരുന്നതിനാല് ഡെല്ഹിയില് കോവിഡ് കേസുകളുടെ എണ്ണത്തില് കുറവ് വരുന്നുണ്ട്. ഏറ്റവും പുതിയ റിപ്പോര്ട്ടുകള് പ്രകാരം ടെസ്റ്റ് പോസിറ്റിവിറ്റി നിരക്ക് 12 ശതമാനത്തില് എത്തിയിട്ടുണ്ട്. ഇന്ന് 8,500 പേര്ക്ക് മാത്രമാണ് കോവിഡ് സ്ഥിരീകരിച്ചത്.