പാലക്കാട്: അട്ടപ്പാടിയില് ആദിവാസി യുവാവ് മധു കൊല്ലപ്പെട്ട കേസില് 14 പ്രതികളില് 12 പേരും കുറ്റക്കാരെന്ന് കോടതി. ഇവര്ക്കെതിരായ നരഹത്യക്കുറ്റം തെളിഞ്ഞു. നാലാം പ്രതിയേയും പതിനൊന്നാം പ്രതിയേയും മാറ്റി നിര്ത്തി മറ്റു 12 പ്രതികളെ കോടതി കുറ്റക്കാരെന്ന് കണ്ടെത്തുകയായിരുന്നു. പ്രതികള്ക്കുള്ള ശിക്ഷ നാളെ വിധിക്കും. ഒന്നാം പ്രതിയായ ഹുസൈന്, രണ്ടാം പ്രതി മരക്കാര്, മൂന്നാം പ്രതി ഷംസുദ്ദീന്, അഞ്ചാം പ്രതി രാധാകൃഷ്ണന്, ആറാം പ്രതി അബൂബക്കര്, ഏഴാം പ്രതി സിദ്ദീഖ്, എട്ടാം പ്രതി ഉബൈദ്, ഒമ്പതാം പ്രതി നജീബ്, പത്താം പ്രതി ജൈജുമോന്, പന്ത്രണ്ടാം പ്രതി സജീവ്, പതിമൂന്നാം പ്രതി സതീഷ്, പതിനാലാം പ്രതി ഹരീഷ് എന്നിവരെയാണ് കോടതി കുറ്റക്കാരെന്ന് കണ്ടെത്തിയിരിക്കുന്നത്. ഈ പ്രതികള്ക്കെല്ലാമെതിരെ നരഹത്യ കുറ്റം തെളിഞ്ഞുവെന്ന് കോടതി വ്യക്തമാക്കി. നാലാം പ്രതി അനീഷിനെയും പതിനൊന്നാം പ്രതി അബ്ദുല് കരീമിനെയുമാണ് കോടതി മാറ്റി നിര്ത്തിയത്.
2018 ഫെബ്രുവരി 22നാണ് അട്ടപ്പാടിയില് ആദിവാസി യുവാവായ മധു ആള്ക്കൂട്ട മര്ദ്ദനത്തിനിരയായി കൊല്ലപ്പെട്ടത്. 103 സാക്ഷികളെ വിസ്തരിച്ചു. 24 പേര് കൂറ് മാറി. അസാധാരണ സംഭവങ്ങളാണ് വിചാരണ ഘട്ടത്തില് നടന്നത്. കൂറുമാറിയ സാക്ഷികളെ വീണ്ടും വിസ്തരിക്കുന്ന സ്ഥിതിയുണ്ടായി. കൂറുമാറിയ സാക്ഷിയുടെ കണ്ണ് പരിശോധിപ്പിച്ചു. രഹസ്യമൊഴി നല്കിയവര്വരെ കൂറുമാറി. മജിസ്റ്റീരിയില് റിപ്പോര്ട്ടിന് മേല് തെളിവ് മൂല്യത്തര്ക്കം ഉണ്ടായി. ഒടുവില് സാക്ഷി സംരക്ഷണ നിയമം നടപ്പിലാക്കേണ്ടിയും വന്നു.