ബെംഗളൂരു: രഹസ്യബന്ധം ചോദ്യംചെയ്ത ഭര്ത്താവിനെ ഭാര്യയും സുഹൃത്തും ചേര്ന്ന് പെട്രോളൊഴിച്ച് തീകൊളുത്തി കൊന്നു. ബെംഗളൂരുവിലാണ് സംഭവം. ബെംഗളൂരു നെലമംഗലയിലെ സ്വകാര്യ കമ്പനി ജീവനക്കാരനായ നാരായണപ്പ(52)യാണ് കൊല്ലപ്പെട്ടത്. രഹസ്യബന്ധം ചോദ്യം ചെയ്തതിനെ തുടര്ന്നുണ്ടായ വഴക്കാണ് കൊലപാതകത്തിലേക്ക് നയിച്ചതെന്നാണ് പോലീസ് പറയുന്നത്.
സംഭവത്തില് ഭാര്യയെയും സുഹൃത്തിനെയും പോലീസ് അറസ്റ്റ് ചെയ്തു. തുമകൂരു ബദ്ദിഹള്ളി സ്വദേശി അന്നപൂര്ണ (36), ഇവരുടെ സുഹൃത്ത് രാമകൃഷ്ണ (35) എന്നിവരാണ് അറസ്റ്റിലായത്. ബെംഗളൂരുവില് നിന്ന് വീട്ടിലെത്തിയ നാരായണപ്പ, രഹസ്യബന്ധത്തെച്ചൊല്ലി ഭാര്യയുമായി വഴക്കിട്ടിരുന്നു. വഴക്ക് മൂര്ച്ഛിച്ചതോടെ വീട്ടില് കരുതിയിരുന്ന പെട്രോള് അന്നപൂര്ണ, നാരായണപ്പയുടെ ശരീരത്തിലൊഴിച്ച് തീകൊളുത്തുകയായിരുന്നു. ഈ സമയം രാമകൃഷ്ണയും വീട്ടിലുണ്ടായിരുന്നു. ശരീരത്തില് തീപടര്ന്ന നാരായണപ്പ സമീപത്തെ അഴുക്കുചാലിലേക്ക് ചാടി. തീയണഞ്ഞ ശേഷം അഴുക്കുചാലില് നിന്ന് കയറാന് ശ്രമിച്ച നാരായണപ്പയെ രാമകൃഷ്ണയും അന്നപൂര്ണയും ചേര്ന്ന് വീണ്ടും കല്ലുകൊണ്ടടിച്ച് വീഴ്ത്തുകയായിരുന്നുവെന്നാണ് വിവരം.