ദില്ലി: ബക്രീദ് പ്രമാണിച്ച് കോവിഡ് നിയന്ത്രണങ്ങളില് മൂന്ന് ദിവസം ഇളവ് നല്കിയ കേരള സര്ക്കാര് നടപടിക്കെതിരെ രൂക്ഷവിമര്ശനവുമായി സുപ്രീംകോടതി. കേരളം ഭരണഘടനയുടെ 21 അനുചേദം അനുസരിക്കണമെന്ന് സുപ്രീംകോടതി ആവശ്യപ്പെട്ടു. ഇപ്പോഴത്തെ ഇളവുകള് സ്ഥിതി ഗുരുതരമാക്കിയാല് അതിന്റെ പ്രത്യാഘാതം കേരളം നേരിടേണ്ടിവരുമെന്നും സുപ്രീംകോടതി മുന്നറിയിപ്പ് നല്കി. സര്ക്കാര് നല്കിയ മൂന്ന് ദിവസത്തെ ഇളവുകള് ഇന്ന് തീരുന്ന സ്ഥിതിക്ക് സര്ക്കാര് ഉത്തരവ് റദ്ദാക്കുന്നില്ലെന്നും നേരത്തെ ഈ ഹര്ജി വന്നിരുന്നെങ്കില് അത് ചെയ്തേനേയെന്നും കോടതി വ്യക്തമാക്കി. കാറ്റഗറി ഡിയില് കടകള് തുറക്കാന് അനുവദിച്ചത് ഗുരുതര വിഷയമാണെന്നും കോടതി നിരീക്ഷിച്ചു. ജസ്റ്റിസ് റോഹിംഗ്ടണ് നരിമാന്, ജസ്റ്റിസ് ബി.ആര്. ഗവായ് എന്നിവരടങ്ങിയ ബെഞ്ചാണ് കേസ് പരിഗണിച്ചത്. രാജ്യത്ത് ഏറ്റവും കൂടുതല്കോവിഡ് കേസുകള് റിപ്പോര്ട്ട് ചെയ്യുന്ന കേരളത്തില് ബക്രീദ് പ്രമാണിച്ച് മൂന്ന് ദിവസം നിയന്ത്രണങ്ങളില് ഇളവ് നല്കിയതിനെ ചോദ്യം ചെയ്തുള്ള ഹര്ജിയിലാണ് സുപ്രീംകോടതിയുടെ വിമര്ശനം. ആരോഗ്യ വിദഗ്ധരുടെ മുന്നറിയിപ്പുകള് തള്ളി രാഷ്ട്രീയ ലക്ഷ്യത്തോടെ സര്ക്കാര് നല്കിയ ഇളവുകള് ജീവന് ഭീഷണിയാണെന്ന് ചൂണ്ടിക്കാട്ടി ദില്ലി സ്വദേശിയായ മലയാളി വ്യവസായിയാണ് ഹര്ജി നല്കിയത്.