ന്യൂഡല്ഹി: കോവിഡ് ബാധിച്ച് മരിച്ചവരുടെ കുടുംബങ്ങള്ക്ക് ധനസഹായം നല്കണമെന്ന് സുപ്രീംകോടതി. പ്രകൃതി ദുരന്തങ്ങള്ക്ക് നഷ്ടപരിഹാരം നല്കുന്നതിന് സമാനമായി ദേശീയ ദുരന്ത നിവാരണ നിയമത്തിലെ പന്ത്രണ്ടാം വകുപ്പ് പ്രകാരം കോവിഡ് ബാധിച്ച് മരിച്ചവരുടെ കുടുംബത്തിനും സഹായത്തിന് അര്ഹതയുണ്ടെന്ന് സുപ്രീംകോടതി വ്യക്തമാക്കി.
ആറുമാസത്തിനകം എത്ര തുക എന്നതും ഇതിനുള്ള മാര്ഗ രേഖയും തയ്യാറാക്കണമെന്നും സുപ്രീംകോടതി കേന്ദ്രത്തിന് നിര്ദ്ദേശം നല്കി. ജസ്റ്റിസ് അശോക് ഭൂഷണ് അധ്യക്ഷനായ ബെഞ്ചാണ് കേസില് വിധി പറഞ്ഞത്. മരിച്ചവരുടെ കുടുംബങ്ങള്ക്ക് പണമായി സഹായം നല്കാന് ആവില്ലെന്നായിരുന്നു കേന്ദ്രത്തിന്റെ നിലപാട്.
ഈ വാദങ്ങള് തള്ളിക്കൊണ്ടാണ് സുപ്രീംകോടതിയുടെ വിധി. മരണ സര്ട്ടിഫിക്കിറ്റിനുള്ള മാര്ഗനിര്ദേശങ്ങള് ലളിതമാക്കണമെന്നും നിര്ദ്ദേശം നല്കിയിട്ടുണ്ട്.
ദേശീയ ദുരന്ത നിവാരണ അതോറിറ്റി ഉത്തരവാദിത്തം നിറവേറ്റുന്നതില് പരാജയപ്പെട്ടെന്നും കോടതി പറഞ്ഞു.
കോവിഡും ദേശീയ ദുരന്തമായി പ്രഖ്യാപിച്ച പശ്ചാത്തലത്തിലാണ് ഈ മാനദണ്ഡം അനുസരിച്ച് സഹായം നല്കണമെന്ന് കോടതി വിധിച്ചത്. എത്ര തുക വീതം നല്കണമെന്ന് മാനദണ്ഡം തയ്യാറാക്കാന് ദേശീയ ദുരന്ത നിവാരണ അതോറിറ്റിയോട് സുപ്രീംകോടതി ആവശ്യപ്പെട്ടിട്ടുണ്ട്. നാല് ലക്ഷം രൂപ വീതം ധനസഹായം നല്കണമെന്നായിരുന്നു ഹര്ജിക്കാരന്റെ ആവശ്യം.
എന്നാല് ഇതിനെ കേന്ദ്രം എതിര്ത്തുവെങ്കിലും നഷ്ടപരിഹാരം നല്കിയേ മതിയാവൂ എന്ന് സുപ്രിംകോടതി ഇന്നത്തെ വിധിയോടെ വ്യക്തമാക്കുകയായിരുന്നു.