ന്യൂഡല്ഹി: ഭാരത് ജോഡോ ന്യായ് യാത്രക്കിടെ ക്ഷേത്ര ദര്ശനത്തിനെത്തിയ രാഹുല് ഗാന്ധിയെ തടഞ്ഞ് അസം പൊലീസ്. ക്ഷേത്രത്തില് പ്രവേശിക്കാന് അനുമതി നല്കിയിരുന്നെങ്കിലും പൊലീസ് തടയുകയായിരുന്നു. അസമിലെ ശ്രീ ശ്രീ ശങ്കര്ദേവിന്റെ ജന്മസ്ഥലം സന്ദര്ശിക്കാനെത്തിയപ്പോഴാണ് സംഭവം. ശ്രീ ശ്രീ ശങ്കര്ദേവിന്റെ ഭക്തനാണ് രാഹുല് ഗാന്ധിയെന്നും കടത്തിവിടാത്തത് എന്തുകൊണ്ടാണെന്നും കോണ്ഗ്രസ് നേതാവ് ഗൗരവ് ഗോഗോയ് എം.പി പൊലീസുകാരോട് ചോദിച്ചെങ്കിലും വൈകിട്ട് സന്ദര്ശിക്കാനാണ് അനുമതി നല്കിയതെന്നാണ് ക്ഷേത്രം അധികൃതരുടെ വിശദീകരണം. തന്നെ എന്തിനാണ് തടയുന്നതെന്ന് പൊലീസ് ഉദ്യോഗസ്ഥരോട് രാഹുല് ചോദിച്ചു.
പ്രതിഷേധം ശക്തമായതോടെ അസമിലെ എം.പിയെയും എം.എല്.എയെയും മാത്രം ക്ഷേത്രത്തിലേക്ക് കടത്തിവിടാമെന്നും രാഹുല് ഗാന്ധിയെ ഇപ്പോള് കടത്തിവിടാനാകില്ലെന്നും ക്ഷേത്രം അധികൃതര് വ്യക്തമാക്കി. രാഹുല് ഗാന്ധിയും നേതാക്കളും റോഡില് കുത്തിയിരിക്കുകയാണ്. ഗൗരവ് ഗോഗോയ് എം.പിയും കോണ്ഗ്രസിന്റെ അസം എം.എല്.എയും ക്ഷേത്രത്തിലേക്ക് കയറി. ക്ഷേത്രത്തിന് മീറ്ററുകള്ക്ക് അകലെയാണ് രാഹുലിനെ തടഞ്ഞത്. പൊലീസ് ബാരിക്കേഡ് ഉപയോഗിച്ച് രാഹുല്ഗാന്ധി മുന്നോട്ട് പോകുന്നത് തടയുകയായിരുന്നു. കെ.സി വേണുഗോപാല്, ജയ്റാം രമേശ് അടക്കമുള്ള നേതാക്കളും ഒപ്പമുണ്ട്.
അയോധ്യയിലെ പ്രാണപ്രതിഷ്ഠാ ചടങ്ങ് നടക്കുമ്പോള് അസമിലെ ശ്രീ ശ്രീ ശങ്കര്ദേവിന്റെ ജന്മസ്ഥലം സന്ദര്ശിക്കുമെന്ന് നേരത്തെ തന്നെ രാഹുല് ഗാന്ധി അറിയിച്ചിരുന്നു. സന്ദര്ശനത്തിന് ക്ഷണം ലഭിച്ചിട്ടും കടത്തിവിടുന്നില്ലെന്ന് രാഹുല് ആരോപിച്ചു. അസമിലെ നാഗോണ് ജില്ലയിലെ ബോര്ഡോവയിലാണ് ശ്രീ ശ്രീ ശങ്കര്ദേവിന്റെ ജന്മസ്ഥലം.