തിരുവനന്തപുരം: രാജ്യത്ത് ഒമിക്രോണ് വ്യാപനം വര്ധിക്കുകയാണെങ്കിലും സംസ്ഥാനത്ത് നിലവില് സ്കൂളുകള് അടയ്ക്കേണ്ട സാഹചര്യമില്ലെന്ന് വിദ്യാഭ്യാസ മന്ത്രി വി ശിവന്കുട്ടി. ഭാവിയില് കോവിഡ് കേസുകള് കൂടിയാല് വിദഗ്ധരുടെ അഭിപ്രായം പരിഗണിച്ച് തീരുമാനമെടുക്കുമെന്നും വിദ്യാഭ്യാസ മന്ത്രി പറഞ്ഞു. സ്കൂള് തുറന്ന അന്ന് മുതല് ഇതുവരെ അതീവ ഗൗരവമായി ഇടപെടേണ്ട സാഹചര്യത്തിലും ഒരു പ്രശ്നവുമില്ലാതെയാണ് പോവുന്നതെന്നും നിലവിലെ സ്കൂളുകളുടെ പ്രവര്ത്തനത്തെ ബാധിക്കുന്ന രീതിയില് ഒമിക്രോണ് കേസുകള് കൂടിയിട്ടില്ലെന്നും അദ്ദേഹം പറഞ്ഞു.
അതേസമയം രാജ്യവ്യാപകമായി ഒമിക്രോണ് വ്യാപന ആശങ്ക നിലനില്ക്കുന്ന സാഹചര്യത്തില് കര്ണാടക, തമിഴ്നാട് തുടങ്ങി അയല്സംസ്ഥാനങ്ങളുള്പ്പെടെ വിവിധ സംസ്ഥാനങ്ങള് നിയന്ത്രണങ്ങള് കടുപ്പിച്ചിട്ടുണ്ട്. രാജ്യം വീണ്ടും കോവിഡ് വ്യാപനത്തിലേക്കെന്ന സുചനകള് നല്കുന്നതാണ് രോഗ സ്ഥിരീകരണ കണക്കുകള്. കഴിഞ്ഞ 24 മണിക്കൂറിനിടെ മാത്രം ഒരു ലക്ഷത്തോളം കേസുകളാണ് രാജ്യത്ത് റിപ്പോര്ട്ട് ചെയ്തത്. 325 കോവിഡ് മരണങ്ങളും റിപോര്ട്ട് ചെയ്തു.