കൊച്ചി: മുഖ്യമന്ത്രി പിണറായി വിജയനെതിരെ സ്വര്ണം, ഡോളര് കടത്ത് ആരോപണങ്ങളില് അന്വേഷണം ആവശ്യപ്പെട്ട് സമര്പ്പിച്ച ഹര്ജി കേരള ഹൈക്കോടതി തള്ളി. എച്ച്.ആര്.ഡി.എസ് സെക്രട്ടറി അജി കൃഷ്ണന് സമര്പ്പിച്ച ഹര്ജിയാണ് ജസ്റ്റിസ് ബെച്ചു കുര്യന് തോമസ് തള്ളിയത്. ഹര്ജി നിലനില്ക്കില്ലെന്ന സംസ്ഥാന സര്ക്കാരിന്റെ വാദം കോടതി ശരിവെച്ചു.
അന്വേഷണം ശരിയായ രീതിയിലല്ല എന്ന വാദത്തിന് അടിസ്ഥാനമില്ലെന്നും അന്വേഷണത്തിന് കോടതിയുടെ മേല്നോട്ടം ആവശ്യമില്ലെന്നും കോടതി വ്യക്തമാക്കി. അന്വേഷണം ശരിയായ രീതിയിലല്ല നടക്കുന്നതെന്ന് കാണിക്കാന് തെളിവുകളൊന്നും ഹര്ജിക്കാരന് ഹാജരാക്കിയില്ലെന്നതും കോടതി ചൂണ്ടിക്കാട്ടി. ഇതുമായി ബന്ധപ്പെട്ട് കേന്ദ്ര ഏജന്സികളായ കസ്റ്റംസിന്റെയും ഇ.ഡിയുടെയും അന്വേഷണം ശരിയായ ദിശയിലാണെന്ന് കോടതി വ്യക്തമാക്കി.
സമാനമായ ഹര്ജികളില് ഡിവിഷന് ബെഞ്ച് തീര്പ്പു കല്പ്പിച്ചിട്ടുണ്ടെന്നും കോടതി ഓര്മ്മിപ്പിച്ചു. പൊതുതാത്പര്യമുള്ള വിഷയമല്ല ഹര്ജിക്കാരന് ഉന്നയിച്ചത്. നേരത്തെ കോടതി തീര്പ്പ് പറഞ്ഞ വിഷയത്തില് വീണ്ടും അന്വേഷണം നടത്താന് ഉത്തരവിടാന് വിധം പുതിയ തെളിവുകള് ഹര്ജിക്കാരന് ഹാജരാക്കിയിട്ടില്ല-കോടതി പറഞ്ഞു.
ഏജന്സികളുടെ അന്വേഷണ റിപ്പോര്ട്ട് സംബന്ധിച്ച് കേന്ദ്രസര്ക്കാര് നല്കിയ അന്വേഷണ പുരോഗതി റിപ്പോര്ട്ടില് തൃപ്തി രേഖപ്പെടുത്തിയ കോടതി, അന്വേഷണ സമയത്ത് ഉന്നതര് കുറ്റക്കാരെന്ന് കണ്ടെത്തിയാല് അവര്ക്കെതിരെ അന്വേഷണം നടക്കില്ലെന്ന ആശങ്കക്ക് അടിസ്ഥാനമില്ലെന്നും വ്യക്തമാക്കി.