കാസര്കോട്: നിയമസഭാ തെരഞ്ഞെടുപ്പിന് പിന്നാലെ ഗുരുതര ആരോപണവുമായി ബിജെപി സംസ്ഥാന പ്രസിഡന്റും മഞ്ചേശ്വരം, കോന്നി മണ്ഡലങ്ങളിലെ ബിജെപി സ്ഥാനാര്ത്ഥിയുമായ കെ സുരേന്ദ്രന്. സംസ്ഥാനത്ത് പോസ്റ്റല് വോട്ടില് വ്യാപക കൃത്രിമത്വം നടന്നെന്നാണ് സുരേന്ദ്രന്റെ ആരോപണം. പോസ്റ്റല് വോട്ടുകളുടെ സുതാര്യത ഉറപ്പുവരുത്താന് തിരഞ്ഞെടുപ്പ് കമ്മിഷന് അടിയന്തരമായി ഇടപെടണമെന്നും സുരേന്ദ്രന് ആവശ്യപ്പെട്ടു.
പലയിടത്തും സീല് ചെയ്ത പെട്ടികളില് അല്ല പോസ്റ്റല് വോട്ടുകള് സ്വീകരിച്ചിരിക്കുന്നത്. ഓരോ മണ്ഡലങ്ങളിലും ആകെ അടിച്ച പോസ്റ്റല് ബാലറ്റുകളുടെ എണ്ണം സ്ഥാനാര്ത്ഥികളെ അറിയിക്കുന്നില്ല. ബാക്കിയായ പോസ്റ്റല് ബാലറ്റുകള് എവിടെയാണെന്ന് അറിയാനുളള അവകാശം രാഷ്ട്രീയ പാര്ട്ടികള്ക്ക് ഉണ്ടാകണം. സംസ്ഥാനത്താകെ എത്ര പോസ്റ്റല് ബാലറ്റുകള് അടിച്ചു, എത്രയെണ്ണം ഉപയോഗിച്ചു, എത്ര ബാലറ്റുകള് ബാക്കിയായി തുടങ്ങിയവയുടെ വിശദാംശങ്ങള് തിരഞ്ഞെടുപ്പ് കമ്മിഷന് പുറത്തുവിടണമെന്നും സുരേന്ദ്രന് പറഞ്ഞു.
പോസ്റ്റല് വോട്ടുകള് കൈകാര്യം ചെയ്യാന് പ്രത്യേക സംഘടനാസംവിധാനം സി പി എം ഉണ്ടാക്കിയിട്ടുണ്ട്. സി പി എം നേതാക്കളായ സര്ക്കാര് ഉദ്യോഗസ്ഥരേയും ബി എല് ഒമാരേയും ഉപയോഗിച്ച് പോസ്റ്റല് വോട്ടുകളില് കൃത്രിമം നടത്താനുളള ട്രെയിനിംഗ് സി പി എം എല്ലാ ജില്ലകളിലും നടത്തിയിട്ടുണ്ട്. പോസ്റ്റല് വോട്ടുകളുടെ കാര്യത്തില് സുതാര്യതയും സുരക്ഷിതത്വവുമില്ലെന്നും കെ സുരേന്ദ്രന് ആരോപിച്ചു.