ആലപ്പുഴ: മുഖ്യമന്ത്രിക്കെതിരെ ജാതി അധിക്ഷേപം നടത്തിയ കോണ്ഗ്രസ് നേതാവ് കെ സുധാകരന് എംപിക്കെതിരെ മാധ്യമങ്ങളില് പ്രതികരിച്ച കോണ്ഗ്രസ് വനിതാ നേതാവും എംഎല്എയുമായ ഷാനിമോള് ഉസ്മാന് മാപ്പ് പറഞ്ഞ് രംഗത്ത്. നേതാവിനെതിരെ നടത്തിയ പ്രതികരണം വലിയ വിവാദമായതില് വിഷമമുണ്ടെന്നും അദ്ദേഹത്തിന്റെ വ്യക്തിപരമായ പ്രയാസത്തില് ഞാന് ക്ഷമ ചോദിക്കുന്നുവെന്നും അവര് ഫെയ്സ്ബുക്ക് പോസ്റ്റില് പറഞ്ഞു. എന്റെ പ്രതികരണത്തിലൂടെ കോണ്ഗ്രസ് നേതാക്കള്ക്കും പ്രവര്ത്തകര്ക്കുമുണ്ടായ പ്രയാസത്തില് ഞാന് ഖേദം പ്രകടിപ്പിക്കുന്നുവെന്നും എന്റെ പ്രതികരണത്തില് പാര്ട്ടിയുടെ ഒരു നേതാവിനും യാതൊരു ബന്ധവുമില്ലെന്നും അവര് കൂട്ടിച്ചേര്ത്തു.
ഫെയ്സ്ബുക്ക് പോസ്റ്റ് പൂര്ണരൂപം;
കഴിഞ്ഞ ദിവസം ഞാന് ബഹുമാന്യ ശ്രീ കെ സുധാകരന് എം പി നടത്തിയ ഒരു പ്രസംഗത്തോടനുബന്ധിച്ചു ഒരു ചാനലില് നല്കിയ പ്രതികരണം വലിയ വിവാദമായതില് വലിയ വിഷമമുണ്ട്. മന്ത്രി ശ്രീ സുധാകരന് എന്നെയും ശ്രീ V. S ലതികാ സുഭാഷിനെയും ശ്രീ വിജയരാഘവന് രമ്യ ഹരിദാസ് എം. പി യേയും കൂടാതെ നിരവധി വ്യക്തിപരമായ പരാമര്ശങ്ങള് ഞാനടക്കം ഉള്ളവര്ക്കുണ്ടാക്കിയിട്ടുള്ള മനപ്രയാസവും പ്രതിഷേധവും മായാതെ നില്ക്കുന്നത് കൊണ്ട്, എന്റെ പാര്ട്ടിയുടെ ആരും ഇത്തരത്തില് പ്രതികരിക്കരുതെന്ന് ആഗ്രഹിച്ചിരുന്നു, ആയതിനാല് ബഹു. K. സുധാകരന് എംപി യോട് ഒന്ന് ഫോണില് സംസാരിക്കാതെ പോലും പെട്ടെന്ന് പ്രതികരിച്ചത് എന്റെ പിഴവാണ്. എന്റെ രാഷ്ട്രീയ പ്രവര്ത്തനത്തില് ഏറെ പിന്തുണയും പ്രോത്സാഹനവും നല്കുകയും അരൂര് ബൈ ഇലക്ഷനില് പോലും ദിവസങ്ങളോളം എന്റെ വിജയത്തിന് വേണ്ടി പ്രവര്ത്തിക്കുകയും ചെയ്ത ബഹു കെ സുധാകരന് അവര്ക്കള്ക്കുണ്ടായ വ്യക്തിപരമായ പ്രയാസത്തില് ഞാന് ക്ഷമ ചോദിക്കുന്നു ഒപ്പം എന്റെ പ്രതികരണത്തിലൂടെ കോണ്ഗ്രസ് നേതാക്കള്ക്കും പ്രവര്ത്തകര്ക്കുമുണ്ടായ പ്രയാസത്തില് ഞാന് ഖേദം പ്രകടിപ്പിക്കുന്നു, ഞാന് നടത്തിയ പ്രതികരണത്തില് പാര്ട്ടിയുടെ ഒരു നേതാവിനും യാതൊരു ബന്ധവുമില്ല എന്നും അറിയിക്കുന്നു, ഈ വിവാദം ഇവിടെ അവസാനിപ്പിക്കണമെന്ന് അഭ്യര്ത്ഥിക്കുന്നു.
കഴിഞ്ഞ ദിവസം ഞാൻ ബഹുമാന്യ ശ്രീ കെ സുധാകരൻ എം പി നടത്തിയ ഒരു പ്രസംഗത്തോടനുബന്ധിച്ചു ഒരു ചാനലിൽ നൽകിയ പ്രതികരണം വലിയ…
Posted by Shanimol Osman on Thursday, 4 February 2021