തൊടുപുഴ: ഇടുക്കി എഞ്ചിനീയറിംഗ് കോളേജിലുണ്ടായ സംഘര്ഷത്തിനിടെ എസ്.എഫ്.ഐ പ്രവര്ത്തകന് കുത്തേറ്റ് മരിച്ചു. കോളേജിലെ വിദ്യാര്ത്ഥിയായ കണ്ണൂര് സ്വദേശി ധീരജ് ആണ് കൊല്ലപ്പെട്ടത്. കോളേജ് യൂണിയന് തിരഞ്ഞെടുപ്പുമായി ബന്ധപ്പെട്ട് കാമ്പസിനകത്ത് കെഎസ്യു-എസ്എഫ്ഐ പ്രവര്ത്തകര് തമ്മില് സംഘര്ഷം നിലനില്ക്കെയാണ് കൊലപാതകം നടന്നത്.
കൊലയ്ക്ക് പിന്നില് കെഎസ്യു-യൂത്ത് കോണ്ഗ്രസ് പ്രവര്ത്തകരാണെന്ന് എസ്എഫ്ഐ ആരോപിച്ചു. പുറത്തുനിന്നെത്തിയ യൂത്ത് കോണ്ഗ്രസ് പ്രവര്ത്തകര് ധീരജിന്റെ കഴുത്തില് കുത്തിപ്പരിക്കേല്പ്പിക്കുകയായിരുന്നു എന്നും എസ്ഐഫ്ഐ നേതൃത്വം ആരോപിക്കുന്നു.
തിങ്കളാഴ്ച ഉച്ചയോടെയാണ് സംഭവം. കേരള സാങ്കേതിക സര്വകലാശാലയ്ക്ക് കീഴിലുള്ള കോളേജുകളില് ഇന്ന് യൂണിയന് തിരഞ്ഞെടുപ്പ് നടക്കുകയാണ്. അതിനിടെയുണ്ടായ സംഘര്ഷമാണ് കൊലപാതകത്തില് കലാശിച്ചത്. ധീരജിനെ കുത്തിയവര് കൃത്യം നടത്തിയ ശേഷം കാമ്പസിന് അകത്തുനിന്ന് ഓടി രക്ഷപ്പെടുകയായിരുന്നു. കുത്തേറ്റുവീണ ധീരജിനെ ഉടന് തന്നെ ആസ്പത്രിയില് എത്തിച്ചെങ്കിലും ജീവന് രക്ഷിക്കാനായില്ല. വിദ്യാര്ഥിയുടെ മൃതദേഹം ഇടുക്കി മെഡിക്കല് കോളേജ് മോര്ച്ചറിയിലേക്ക് മാറ്റി.