തിരുവനന്തപുരം: ഒമിക്രോണ് വ്യാപനത്തിന്റെ പശ്ചാത്തലത്തില് കേരളത്തില് കൂടുതല് നിയന്ത്രണങ്ങള് പ്രഖ്യാപിച്ചു. മുഖ്യമന്ത്രി പിണറായി വിജയന്റെ അധ്യക്ഷതയില് ചേര്ന്ന കോവിഡ് അവലോകന യോഗത്തിലാണ് കൂടുതല് നിയന്ത്രണങ്ങള്ക്കുള്ള തീരുമാനം കൈക്കൊണ്ടത്. വിവാഹം, മരണാനന്തര ചടങ്ങുകള് എന്നിവയില് പങ്കെടുക്കാവുന്നവരുടെ എണ്ണം പരമാവധി 50 ആയി കുറയ്ക്കാന് തീരുമാനമായി. വാരാന്ത്യരാത്രി നിയന്ത്രണം തത്ക്കാലം ഏര്പ്പെടുത്തില്ല. സ്കൂളുകള് ഉടന് അടയ്ക്കില്ല.
ഒത്തുചേരലുകളും, ചടങ്ങുകളും പൊതുവായ സാമൂഹ്യ, രാഷ്ട്രീയ, സാംസ്കാരിക, സാമുദായിക പരിപാടികളും അത്യാവശ്യ സന്ദര്ഭങ്ങളിലൊഴികെ ഓണ്ലൈനായി നടത്തണം. അത്യാവശ്യ സന്ദര്ഭങ്ങളില് പരിപാടികള് നേരിട്ട് നടത്തുമ്പോള് ശാരീരിക അകലമടക്കമുള്ള മുന്കരുതലുകള് എടുക്കണം. പൊതുയോഗങ്ങള് ഒഴിവാക്കണമെന്നും മുഖ്യമന്ത്രി വ്യക്തമാക്കി. 15 വയസ്സിന് മുകളിലുള്ള വിദ്യാര്ത്ഥികള്ക്കുള്ള വാക്സിനേഷന് ഈ ആഴ്ച്ച തന്നെ പൂര്ത്തീകരിക്കുമെന്ന് ആരോഗ്യ, വിദ്യാഭ്യാസ വകുപ്പുകള് ഉറപ്പു വരുത്തണം. വിദ്യാഭ്യാസ സ്ഥാപനങ്ങളില് പോയി വാക്സിനേഷന് നല്കുന്ന കാര്യം പരിശോധിക്കും. കുടുംബശ്രീ തെരഞ്ഞെടുപ്പ്, ഗ്രാമസഭ എന്നിവ ശാരീരിക അകലം പാലിച്ച് കോവിഡ് മാനദണ്ഡമനുസരിച്ച് നടത്താവുന്നതാണ്. ടെലിമെഡിസിന് സംവിധാനം നല്ലതുപോലെ നടപ്പാക്കാനാവണം. ഒമിക്രോണുമായി ബന്ധപ്പെട്ട് വലിയതോതില് ബോധവല്ക്കരണം നടത്തുമെന്നും മുഖ്യമന്ത്രി പറഞ്ഞു.