തിരുവനന്തപുരം: കോവിഡ് വാക്സിന് വിതരണത്തിന് കേരളം സുസജ്ജമായി. സംസ്ഥാനത്ത് ആകെ 4,33,500 ഡോസ് വാക്സിനുകളാണ് എത്തിയത്. തിരുവനന്തപുരം 64,020, കൊല്ലം 25,960, പത്തനംതിട്ട 21,030, ആലപ്പുഴ 22,460, കോട്ടയം 29,170, ഇടുക്കി 9,240, എറണാകുളം 73,000, തൃശൂര് 37,640, പാലക്കാട് 30,870, മലപ്പുറം 28,890, കോഴിക്കോട് 40,970, വയനാട് 9,590, കണ്ണൂര് 32,650, കാസര്കോഡ് 6,860 എന്നിങ്ങനെ ഡോസ് വാക്സിനുകള് ജില്ലകളില് വിതരണം ചെയ്തിട്ടുണ്ട്.
ഓരോ ആള്ക്കും 0.5 എം.എല്. കോവീഷീല്ഡ് വാക്സിനാണ് കുത്തിവയ്പ്പിലൂടെ നല്കുന്നത്. ആദ്യ ഡോസ് എടുത്തു കഴിഞ്ഞാല് 28 ദിവസം കഴിഞ്ഞാണ് അടുത്ത ഡോസ് നല്കുക. രണ്ടു ഡോസും എടുത്താലേ ഉദ്ദേശിച്ച ഫലം ലഭിക്കൂ. ആദ്യ ദിവസം ഒരു കേന്ദ്രത്തില് നിന്നും 100 പേര്ക്കാണ് വാക്സിന് നല്കുന്നത്. രാവിലെ 9 മണി മുതല് 5 മണിവരെയാണ് വാക്സിന് നല്കുക.
ലോഞ്ചിംഗ് ദിവസം ഉദ്ഘാടനം മുതലാണ് വാക്സിന് തുടങ്ങുക. രജിസ്റ്റര് ചെയ്ത ആളിന് എവിടെയാണ് വാക്സിന് എടുക്കാന് പോകേണ്ടതെന്ന എസ്.എം.എസ്. ലഭിക്കും. അതനുസരിച്ചാണ് സമയം നിശ്ചയിച്ച് അവര് വാക്സിനേഷന് കേന്ദ്രത്തിലെത്തേണ്ടത്. വാക്സിന് നല്കാന് ഒരാള്ക്ക് 4 മിനിറ്റ് മുതല് 5 മിനിറ്റ് വരെ സമയമെടുക്കും.
കേന്ദ്ര സര്ക്കാരിന്റെ മാര്ഗനിര്ദേശമനുസരിച്ച് വാക്സിനേഷനില് 10 ശതമാനം വേസ്റ്റേജ് വരുമെന്നാണ് കണക്കാക്കുന്നത്. പരമാവധി വേസ്റ്റേജ് കുറച്ച് വാക്സിന് നല്കാനാണ് സംസ്ഥാനം ശ്രമിക്കുന്നത്. ലഭിച്ച വാക്സിന്റെ പകുതി സ്റ്റോക്ക് ചെയ്യാന് ജില്ലകള്ക്ക് നിര്ദേശം നല്കിയിട്ടുണ്ട്. സംസ്ഥാനത്തിന് ഉടന് ലഭിക്കുന്ന ബാക്കി വാക്സിന്റെ കണക്കുകൂടി നോക്കിയാകും ബാക്കിയുള്ളത് വിതരണം ചെയ്യുന്നത്.