കൊച്ചി: വാക്സിന് സര്ട്ടിഫിക്കറ്റില് നിന്ന് പ്രധാനമന്ത്രി നരേന്ദ്ര മോദിയുടെ ചിത്രം നീക്കണമെന്ന ഹര്ജി ഹൈകോടതി തള്ളി. ഹര്ജിക്കാരനെ രൂക്ഷമായി ഭാഷയില് വിമര്ശിച്ചാണ് ഹര്ജി തള്ളിയത്. രാജ്യത്തിന്റെ പ്രധാനമന്ത്രിയെ കുറിച്ച് ലജ്ജിക്കുന്നതെന്തിനാണെന്ന് ചോദിച്ച കോടതി എന്ത് രാഷ്ട്രീയ അഭിപ്രായ വ്യത്യസങ്ങള് ഉണ്ടെങ്കിലും നരേന്ദ്ര മോദി രാജ്യത്തിന്റെ പ്രധാനമന്ത്രിയാണെന്ന് ഓര്ക്കണമെന്നും പറഞ്ഞു.
‘മോദി നമ്മുടെ രാജ്യത്തിന്റെ പ്രധാനമന്ത്രിയാണ് മറ്റേതെങ്കിലും രാജ്യത്തിന്റേതല്ല. എന്തിനാണ് നമ്മുടെ പ്രധാനമന്ത്രിയെ കുറിച്ച് ലജ്ജിക്കുന്നത്. 100 കോടി ജനങ്ങള്ക്കില്ലാത്ത എന്ത് പ്രശ്നമാണ് ഹരജിക്കാരനുള്ളത്’ കോടതി ചോദിച്ചു. ഹരജിക്കാരന് കോടതിയുടെ സമയം പാഴാക്കുകയാണെന്നും ജസ്റ്റിസ് പി.വി കുഞ്ഞികൃഷ്ണന് പറഞ്ഞു. എന്തിനാണ് ഹരജിക്കാന് മുന് പ്രധാനമന്ത്രി ജവഹര്ലാല് നെഹ്റുവിന്റെ പേരിലുള്ള സ്ഥാപനത്തില് ജോലി ചെയ്യുന്നതെന്നും സ്ഥാപനത്തില് നിന്ന് നെഹ്റുവിന്റെ പേര് നീക്കം ചെയ്യാന് ആവശ്യപ്പെടാത്തത് എന്താണെന്നും കോടതി ചോദിച്ചു.
ഇപ്പോഴത്തെ കോവിഡ് വാക്സിന് സര്ട്ടിഫിക്കറ്റ് പൗരന്മാരുടെ മൗലികാവകാശങ്ങള് ലംഘിക്കുന്നതാണെന്നും പ്രധാനമന്ത്രിയുടെ ഫോട്ടോയില്ലാത്ത സര്ട്ടിഫിക്കറ്റ് വേണമെന്നും ആവശ്യപ്പെട്ട് കോട്ടയം സ്വദേശിയായ എം പീറ്ററാണ് ഹര്ജി നല്കിയത്. പൊതു പണം ഉപയോഗിച്ചുകൊണ്ടുള്ള സര്ക്കാര് ക്യാമ്പയിനുകളെ കുറിച്ചുള്ള സുപ്രീംകോടതി നിര്ദേശം ചൂണ്ടിക്കാട്ടിയായിരുന്നു പീറ്ററുടെ ഹര്ജി.