കോട്ടയം: പാലാ ബിഷപ്പിന്റെ നാര്ക്കോട്ടിക് ജിഹാദ് ആരോപണത്തിന്റെ പശ്ചാത്തലത്തില് സംയുക്ത വാര്ത്താസമ്മേളനവുമായി ഇമാമും ബിഷപ്പും. സി.എസ്.ഐ മദ്ധ്യകേരള മഹാ ഇടവക ബിഷപ്പ് ഡോ. മലയില് സാബു കോശി ചെറിയാനും താഴത്തങ്ങാടി ജുമാ മസ്ജിദ് ഇമാം ഷംസുദ്ദീന് മന്നാനി ഇലവുപാലവുമാണ് സംയുക്ത വാര്ത്താസമ്മേളനം നടത്തിയത്. കേരളത്തിന്റെ മതസൗഹാര്ദ്ദം തകര്ക്കാന് ചില ശക്തികള് ശ്രമിക്കുന്നുവെന്ന് സംയുക്ത വാര്ത്താസമ്മേളനത്തില് ചൂണ്ടിക്കാട്ടി.
കേരളം സംരക്ഷിച്ചു വന്നിരുന്ന മതസൗഹാര്ദ്ദം തകര്ക്കാന് സമൂഹമാധ്യമങ്ങള് വഴിയും അല്ലാതെയും ചില ശക്തികള് ശ്രമിക്കുന്നതായി ഇമാം ആരോപിച്ചു. അടുക്കാനാകാത്ത വിധം നമ്മള് അകന്നുപോകാന് പാടില്ലെന്നും അദ്ദേഹം കൂട്ടിച്ചേര്ത്തു. കേരളത്തിന് പോര്വിളിയും വിദ്വേഷവുമല്ല വേണ്ടത്. സമാധാനവും സ്നേഹവുമാണെന്നും ഇമാമം കൂട്ടിച്ചേര്ത്തു.
രാജ്യത്ത് ഏറ്റവുമധികം മതസൗഹാര്ദ്ദമുള്ള സംസ്ഥാനമാണ് കേരളം. ആ സൗഹാര്ദ്ദം നിലനിര്ത്തേണ്ടത് നമ്മുടെ എല്ലാവരുടെയും കര്ത്തവ്യമാണ്. ലഹരി പോലുള്ള എല്ലാ തെറ്റായ പ്രവണതകളും എതിര്ക്കേണ്ടതാണ്. വ്യക്തികളാണ് ഇതിന് ശിക്ഷിക്കപ്പെടേണ്ടതെന്നും സമൂഹമല്ലെന്നും ബിഷപ്പ് ഡോ. മലയില് സാബു കോശി ചെറിയാന് പറഞ്ഞു.