വിജയ് ദേവരകൊണ്ടയും കീര്‍ത്തി സുരേഷും ഒന്നിക്കുന്ന ബഹുഭാഷാ ചിത്രത്തിന്റെ ചിത്രീകരണം ഒക്ടോബറില്‍
രാജ വാരു റാണി ഗാരു, റൗഡി ജനാര്‍ദ്ദന്‍ തുടങ്ങിയ ചിത്രങ്ങള്‍ ഒരുക്കിയിട്ടുള്ള രവി കിരണ്‍ കോലയാണ് ചിത്രം സംവിധാനം ചെയ്യുന്നത്
തെലുങ്ക് താരം വിജയ് ദേവരകൊണ്ടയ്‌ക്കൊപ്പം കീര്‍ത്തി സുരേഷും കേന്ദ്രകഥാപാത്രത്തിലെത്തുന്ന ബഹുഭാഷാ ചിത്രത്തിന്റെ ചിത്രീകരണം ഒക്ടോബറില്‍ തുടങ്ങുമെന്ന് അണിയറക്കാര്‍. ഇതാദ്യമായാണ് ഇരുവരും ഒരുമിച്ച് അഭിനയിക്കുന്നത്. നേരത്തെ 2018 ല്‍ കീര്‍ത്തി സുരേഷ് കേന്ദ്ര കഥാപാത്രത്തെ അവതരിപ്പിച്ച മഹാനടിയില്‍ വിജയ് ദേവരകൊണ്ട അഭിനിച്ചിരുന്നെങ്കിലും ഇരുവരും ഒരുമിച്ച് എത്തുന്ന രംഗങ്ങള്‍ ഉണ്ടായിരുന്നില്ല. അതുകൊണ്ടുതന്നെ 7 വര്‍ഷങ്ങള്‍ക്ക് ശേഷം ഇരുവരും വീണ്ടും ഒന്നിക്കുന്ന ചിത്രത്തെ കുറിച്ചുള്ള കൂടുതല്‍ വിവരങ്ങള്‍ അറിയാനായി ആരാധകര്‍ കാത്തിരിക്കുകയാണ്. മഹാനടിയില്‍ സാവിത്രിയായെത്തിയ കീര്‍ത്തി സുരേഷ് ഈ കഥാപാത്രത്തെ അവതരിപ്പിച്ചതിലൂടെ നാഷണല്‍ അവാര്‍ഡും സ്വന്തമാക്കിയിരുന്നു.
രാജ വാരു റാണി ഗാരു, റൗഡി ജനാര്‍ദ്ദന്‍ തുടങ്ങിയ ചിത്രങ്ങള്‍ ഒരുക്കിയിട്ടുള്ള രവി കിരണ്‍ കോലയാണ് ചിത്രം സംവിധാനം ചെയ്യുന്നത്. ഗ്രാമീണ പശ്ചാത്തലത്തില്‍ ഒരുങ്ങുന്ന ആക്ഷന്‍ ഡ്രാമയാണ് പുതിയ ചിത്രമെന്നുള്ള റിപ്പോര്‍ട്ടുകള്‍ പുറത്തുവരുന്നുണ്ട്. രാഹുല്‍ സംകൃത്യന്‍ സംവിധാനം ചെയ്യുന്ന ചിത്രത്തിന്റെ ഷൂട്ടിംഗ് തിരക്കിലാണ് ഇപ്പോള്‍ വിജയ് ദേവരകൊണ്ട. ഈ ചിത്രത്തിന്റെ ചിത്രീകരണം കഴിഞ്ഞതിനുശേഷമാകാം പുതിയ ചിത്രത്തിന്റെ ചിത്രീകരണം തുടങ്ങുന്നത്. തെലുങ്കിന് പുറമെ തമിഴ്, മലയാളം, കന്നഡ, ഹിന്ദി ഭാഷകളില്‍ ചിത്രം തിയറ്ററുകളില്‍ എത്തിക്കാനാണ് അണിയറക്കാരുടെ പദ്ധതി.
കിങ്ഡം ആണ് വിജയ് ദേവരകൊണ്ടയുടേതായി അവസാനം തിയറ്ററുകളില്‍ എത്തിയ ചിത്രം. സ്‌പൈ ആക്ഷന്‍ ത്രില്ലര്‍ ഗണത്തില്‍ പെട്ട ചിത്രത്തിന്റെ രചനയും സംവിധാനവും ഗൗതം തിണ്ണനൂരി ആയിരുന്നു. സിതാര എന്റര്‍ടെയ്ന്‍മെന്റ്‌സും ഫോര്‍ച്യൂണ്‍ ഫോര്‍ സിനിമാസും ചേര്‍ന്നായിരുന്നു ചിത്രത്തിന്റെ നിര്‍മ്മാണം. എന്നാല്‍ കാര്യമായി പ്രേക്ഷകശ്രദ്ധ നേടാന്‍ ചിത്രത്തിന് സാധിച്ചിരുന്നില്ല.
അതേസമയം കീര്‍ത്തി സുരേഷിന്റേതായി ഈ വര്‍ഷം എത്തിയ ചിത്രവും തെലുങ്കില്‍ നിന്നാണ്. ഉപ്പ് കപ്പുറമ്പ് എന്ന് പേരിട്ട ചിത്രം ആമസോണ്‍ പ്രൈം വീഡിയോയിലൂടെ ഡയറക്റ്റ് ഒടിടി റിലീസ് ആയാണ് എത്തിയത്. കോമഡി ഡ്രാമ ഗണത്തില്‍ പെടുന്ന ചിത്രത്തിന്റെ സംവിധാനം ഐ വി ശശിയുടെ മകന്‍ അനി ഐ വി ശശി ആയിരുന്നു.
