'സര്‍ക്കീട്ട്' സൂപ്പര്‍ ഹിറ്റ്; പ്രേക്ഷകരില്‍ നിന്നും ലഭിക്കുന്നത് മികച്ച പ്രതികരണങ്ങള്‍
ആസിഫിലെ നടനെ ഊറ്റി എടുത്തിരിക്കുകയാണ് സംവിധായകനെന്ന് ആരാധകര്‍
നടന്‍ ആസിഫ് അലിയുടെ ഏറ്റവും പുതിയ ചിത്രം സര്‍ക്കീട്ട് ഇന്ന് തിയേറ്ററുകളില്‍ എത്തിയിരിക്കയാണ്. ആദ്യ ദിവസം തന്നെ ചിത്രത്തിന് മികച്ച പ്രതികരണങ്ങളാണ് ലഭിക്കുന്നത്. മലയാള സിനിമയില്‍ സമീപകാലത്ത് അഭിനയിച്ച ചിത്രമെല്ലാം വിജയമാക്കുന്ന താരമാണ് ആസിഫ് അലി. ബോക്‌സ് ഓഫീസ് നേട്ടവും അദ്ദേഹം സ്വന്തമാക്കുന്നു.
കിഷ്‌കിന്ധാ കാണ്ഡം, രേഖാചിത്രം എന്നീ ചിത്രങ്ങള്‍ക്ക് ശേഷം ആസിഫ് അലി നായകനാവുന്ന ചിത്രമാണ് സര്‍ക്കീട്ട്. 'ആയിരത്തൊന്നു നുണകള്‍' എന്ന ചിത്രത്തിലൂടെ ശ്രദ്ധിക്കപ്പെട്ട സംവിധായകന്‍ താമര്‍ ആണ് ഈ ചിത്രം ഒരുക്കിയിരിക്കുന്നത്.
ആദ്യ പ്രതികരണങ്ങളില്‍ മികച്ച അഭിപ്രായമാണ് ചിത്രവും ആസിഫ് അലിയുടെ പ്രകടനവും നേടുന്നത്. ആസിഫിലെ നടനെ ഊറ്റി എടുത്തിരിക്കുകയാണ് സംവിധായകനെന്നാണ് രാഗേഷ് കെ പി എന്ന പ്രേക്ഷകന്‍ മൂവിസ്ട്രീറ്റ് ഫേസ്ബുക്ക് ഗ്രൂപ്പില്‍ കുറിച്ചിരിക്കുന്നത്. ഗള്‍ഫിലേക്ക് തൊഴിലിനായി എത്തിയ മനുഷ്യര്‍ക്ക് വേഗത്തില്‍ കണക്റ്റ് ചെയ്യാന്‍ പറ്റുന്ന സിംപിള്‍ ഇമോഷണല്‍ ഡ്രാമയാണ് ചിത്രമെന്ന് അബിന്‍ ബാബു എന്ന പ്രേക്ഷകന്‍ എക്‌സില്‍ കുറിച്ചു.
ഇമോഷണല്‍ ഉള്ളടക്കമുള്ള എന്‍ഗേജിംഗ് ആയ ഫസ്റ്റ് ഹാഫും കൂടുതല്‍ മികച്ച രംഗങ്ങളുള്ള രണ്ടാം പകുതിയുമാണ് ചിത്രത്തിലേതെന്ന് എ സിനിമ ലവര്‍ എന്ന എക്‌സ് ഹാന്‍ഡില്‍ കുറിച്ചിരിക്കുന്നു. ആസിഫില്‍ നിന്ന് മറ്റൊരു ഫീല്‍ ഗുഡ് ചിത്രം എത്തിയിരിക്കുകയാണെന്നും കുറിച്ചിട്ടുണ്ട്. ഒരു മികച്ച ഫാമിലി എന്റര്‍ടെയ്‌നര്‍ ആണ് ഈ ചിത്രമെന്ന് ട്രാക്കര്‍മാരായ ഫോറം റീല്‍സും അറിയിച്ചിരിക്കുന്നു.
ചിത്രത്തിന്റെ ആദ്യ പ്രദര്‍ശനങ്ങള്‍ അവസാനിച്ചതിന് പിന്നാലെ നിരവധി റിവ്യൂസ് ആണ് എക്‌സിലും ഫേസ്ബുക്കിലുമായി എത്തിയിരിക്കുന്നത്. ഇവയെല്ലാം തന്നെ ചിത്രത്തെ പ്രശംസിച്ചുള്ളവ തന്നെയാണ്. തന്റെ മുന്‍ ചിത്രങ്ങള്‍ക്ക് ലഭിച്ച അഭിപ്രായ പ്രകടനങ്ങളും പ്രശംസയും തന്നെയാണ് ആസിഫിന്റെ പുതിയ ചിത്രത്തിനും പ്രേക്ഷകരുടെ ഭാഗത്ത് നിന്നും ലഭിക്കുന്നത്.
വലിയ പ്രേക്ഷകപ്രീതിയും കളക്ഷനും ആണ് കിഷ്‌കിന്ധാ കാണ്ഡം, രേഖാചിത്രം എന്നീ ചിത്രങ്ങള്‍ക്ക് ലഭിച്ചത്. അതുകൊണ്ട് തന്നെ ആസിഫ് അലിക്ക് ഹാട്രിക് ഹിറ്റ് നല്‍കുമോ സര്‍ക്കീട്ട് എന്നാണ് ഇനി കണ്ടറിയേണ്ടത്.
പ്രേക്ഷകര്‍ ഏറ്റെടുത്ത പൊന്‍മാന്‍ എന്ന ചിത്രത്തിന് ശേഷം അജിത് വിനായക ഫിലിംസ് വിത്ത് ആക്ഷന്‍ ഫിലിംസിന്റെ ബാനറില്‍ വിനായക അജിത്, ഫ്‌ളോറിന്‍ ഡൊമിനിക്ക് എന്നിവര്‍ ചേര്‍ന്ന് നിര്‍മ്മിക്കുന്ന ചിത്രമാണിത്. ദിവ്യ പ്രഭയാണ് ചിത്രത്തിലെ നായിക.
ബാലതാരം ഓര്‍ഹാന്‍, ദീപക് പറമ്പോല്‍, രമ്യ സുരേഷ്, പ്രശാന്ത് അലക്സാണ്ടര്‍, സ്വാതിദാസ് പ്രഭു, സുധീഷ് സ്‌കറിയ, ഗോപന്‍ അടാട്ട്, സിന്‍സ് ഷാന്‍, പ്രവീണ്‍ റാം എന്നിവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. പൂര്‍ണ്ണമായും ഗള്‍ഫ് രാജ്യങ്ങളില്‍ ചിത്രീകരിച്ച 'സര്‍ക്കീട്ട്', യുഎഇ, ഷാര്‍ജ, റാസല്‍ ഖൈമ, ഫുജൈറ എന്നിവിടങ്ങളിലായി 40 ദിവസം കൊണ്ടാണ് പൂര്‍ത്തിയാക്കിയത്.
