തുടക്കം മുതല്‍ അവസാനം വരെ പ്രേക്ഷകരെ ആവേശഭരിതരാക്കുന്നു; ത്രില്ലടിപ്പിക്കാന്‍ നവ്യ നായരും സൗബിനും; 'പാതിരാത്രി', ട്രെയിലര്‍ പുറത്തിറങ്ങി
വളരെ വൈകാരികമായ കഥയും ആവേശകരമായ അന്വേഷണവുമാണ് ചിത്രം പറയുന്നത്‌
നവ്യ നായരും സൗബിന്‍ ഷാഹിറും പ്രധാന വേഷങ്ങളില്‍ എത്തുന്ന രതീനയുടെ 'പാതിരാത്രി' എന്ന ചിത്രത്തിന്റെ ട്രെയിലര്‍ പുറത്തിറങ്ങി. ബെന്‍സി പ്രൊഡക്ഷന്‍സിന്റെ ബാനറില്‍ ഡോ. കെ.വി. അബ്ദുള്‍ നാസറും ആഷിയ നാസറും ചേര്‍ന്നാണ് ചിത്രം നിര്‍മ്മിക്കുന്നത്. ഒക്ടോബറില്‍ ചിത്രം റിലീസ് ചെയ്യും. തുടക്കം മുതല്‍ അവസാനം വരെ പ്രേക്ഷകരെ ആവേശഭരിതരാക്കുന്ന ഒരു ചിത്രമായിരിക്കും ഇതെന്ന് ട്രെയിലര്‍ സൂചിപ്പിക്കുന്നു.
വളരെ വൈകാരികമായ ഒരു കഥയും ആവേശകരമായ ഒരു അന്വേഷണവുമാണ് ചിത്രം പറയുന്നതെന്ന് ട്രെയിലര്‍ സൂചിപ്പിക്കുന്നു. മമ്മൂട്ടി അഭിനയിച്ച 'പുഴു' എന്ന ചിത്രത്തിന് ശേഷം രതീനയുടെ രണ്ടാമത്തെ ചിത്രമാണിത്. സണ്ണി വെയ്‌നും ആന്‍ അഗസ്റ്റിനും ചിത്രത്തില്‍ നിര്‍ണായക വേഷങ്ങള്‍ കൈകാര്യം ചെയ്യുന്നു. മള്‍ട്ടിസ്റ്റാര്‍ ചിത്രമായ 'പാതിരാത്രി' കേരളത്തില്‍ ഡ്രീം ബിഗ് ഫിലിംസ് ആണ് വിതരണം ചെയ്യുന്നത്.
അര്‍ദ്ധരാത്രിയില്‍ നടക്കുന്ന സംഭവങ്ങളെ ചുറ്റിപ്പറ്റിയാണ് ചിത്രത്തിന്റെ കഥ വികസിക്കുന്നതെന്നാണ് ട്രെയിലര്‍ നല്‍കുന്ന സൂചന. നേരത്തെ പുറത്തിറങ്ങിയ ചിത്രത്തിന്റെ ടീസറും പ്രേക്ഷകര്‍ ഏറ്റെടുത്തിരുന്നു. നവ്യ നായരും സൗബിന്‍ ഷാഹിറും അവതരിപ്പിക്കുന്ന പൊലീസ് കഥാപാത്രങ്ങളായ ഝാന്‍സിയുടെയും ഹരീഷിന്റെയും ജീവിതത്തിലൂടെയാണ് കഥ മുന്നോട്ട് പോകുന്നത്.
വികാരങ്ങളും ആവേശകരമായ കുറ്റകൃത്യ അന്വേഷണവും ഇടകലര്‍ന്ന ഒരു ക്രൈം ഡ്രാമ ത്രില്ലറാണ് ചിത്രമെന്ന് ടീസറും ട്രെയിലറും വ്യക്തമാക്കുന്നു. ആതിയ രാജന്‍, ശബരീഷ് വര്‍മ്മ, ഹരിശ്രീ അശോകന്‍, അച്യുത് കുമാര്‍, ഇന്ദ്രന്‍സ്, തേജസ് എന്നിവരാണ് ചിത്രത്തിലെ മറ്റ് താരങ്ങള്‍. നവ്യ നായര്‍-സൗബിന്‍ ടീം ആദ്യമായി ഒന്നിക്കുന്ന ഈ ചിത്രത്തിന്റെ തിരക്കഥ ഷാജി മാറാടാണ് എഴുതിയത്.
ജേക്‌സ് ബിജോയ് ആണ് ചിത്രത്തിന്റെ സംഗീതം ഒരുക്കിയിരിക്കുന്നത്. 'തുടരും', 'ലോക' എന്നീ ചിത്രങ്ങള്‍ക്ക് ശേഷം ജേക്‌സ് ബിജോയ് സംഗീതം ഒരുക്കുന്ന ചിത്രമാണ് 'പാതിരാത്രി'. വലിയ തുക നല്‍കിയാണ് ടി-സീരീസ് ചിത്രത്തിന്റെ സംഗീത അവകാശം സ്വന്തമാക്കിയത്.
ഛായാഗ്രഹണം - ഷെഹനാദ് ജലാല്‍, സംഗീതം - ജേക്‌സ് ബിജോയ്, എഡിറ്റര്‍ - ശ്രീജിത്ത് സാരംഗ്, കല - ദിലീപ് നാഥ്, പ്രൊഡക്ഷന്‍ കണ്‍ട്രോളര്‍ - പ്രശാന്ത് നാരായണന്‍, മേക്കപ്പ് - ഷാജി പുല്‍പ്പള്ളി, വസ്ത്രാലങ്കാരം - ലിജി പ്രേമന്‍, ചീഫ് അസോസിയേറ്റ് ഡയറക്ടര്‍ - അജിത് വേലായുധന്‍, അസോസിയേറ്റ് ഡയറക്ടര്‍ - സിബിന്‍ രാജ്,
ആക്ഷന്‍ - പി സി സ്റ്റണ്ട്‌സ്, സ്റ്റില്‍സ് - നവീന്‍ മുരളി, ടൈറ്റില്‍ ഡിസൈന്‍ - യെല്ലോ ടൂത്ത്‌സ്, പോസ്റ്റര്‍ ഡിസൈന്‍ - ഇല്ലുമിനാര്‍ട്ടിസ്റ്റ്, പിആര്‍ഒ - ശബരി, വാഴൂര്‍ ജോസ്.
