തിരുവനന്തപുരം: കെ.എസ്.ഇ.ബിയിലെ ക്രമക്കേടുമായി ബന്ധപ്പെട്ട വിവാദത്തില് വൈദ്യുതി മന്ത്രിക്കെതിരെ രൂക്ഷവിമര്ശനവുമായി മുന് വൈദ്യുതി മന്ത്രി എം.എം മണി. ഇടതുസര്ക്കാറിന്റെ കാലത്ത് കെ.എസ്.ഇ.ബിയില് നടന്നത് ഗുരുതര ക്രമക്കേടുകളാണെന്ന ചെയര്മാന്റെ ആരോപണത്തിനെതിരെ പ്രതികരിക്കുന്നതിനിടെയാണ് എം.എം മണി മന്ത്രിക്കെതിരെ വിമര്ശനമുന്നയിച്ചത്. വൈദ്യുതി ബോര്ഡ് ചെയര്മാന് ഡോ. ബി. അശോകിന്റെ പ്രസ്താവന എന്തടിസ്ഥാനത്തിലാണെന്നറിയില്ലെന്നും എം.എം. മണി പറഞ്ഞു. നിലവിലെ വൈദ്യുതി മന്ത്രി കൃഷ്ണന് കുട്ടി ചെയര്മാനെക്കൊണ്ട് പറയിച്ചതാണോ എന്ന് അന്വേഷിക്കണം. മുഖ്യമന്ത്രിയുമായി കൂടിയാലോചിച്ച ശേഷം കൂടുതല് പ്രതികരണം നടത്തുമെന്നും സി.പി.എം സംസ്ഥാന സമിതി അംഗം കൂടിയായ എം.എം മണി മാധ്യമപ്രവര്ത്തകരോട് പറഞ്ഞു. തന്റെ കാലത്ത് പ്രതിസന്ധിയില്ലാതെ വൈദ്യുതി ബോര്ഡ് പ്രവര്ത്തിച്ചിട്ടുണ്ട്. ഇപ്പോള് വൈദ്യുതി ഭവനില് സുരക്ഷാ സേനയെ നിയോഗിക്കേണ്ട നിലയിലെത്തിയിരിക്കുന്നു. നാലരവര്ഷമാണ് ഞാന് മന്ത്രിയായത്. അത് കെ.എസ്.ഇ.ബിയുടെ സുവര്ണ കാലമായിരുന്നെന്നും അദ്ദേഹം പറഞ്ഞു.
എം.എം മണി വൈദ്യുതി മന്ത്രിയായിരുന്ന കാലത്ത് ഇടതു യൂണിയനുകള് ബോര്ഡിന് കോടികളുടെ ബാധ്യതയുണ്ടാക്കുന്ന തീരുമാനത്തിന് കൂട്ടുനിന്നുവെന്നാണ് ചെയര്മാന്റെ പ്രധാന ആക്ഷേപം. ‘കടയ്ക്കു തീപിടിച്ചിട്ടില്ല; നാട്ടുകാര് ഓടിവരേണ്ടതുമില്ല’ എന്ന തലക്കെട്ടില് കെ.എസ്.ബിയുടെ ഔദ്യോഗിക ഫേസ്ബുക്ക് പേജില് പങ്കുവെച്ച കുറിപ്പിലാണ് മുന് ഇടത് സര്ക്കാരിന്റെ കാലത്ത് ബോര്ഡില് നടന്ന ക്രമക്കേടുകളെ കുറിച്ച് അദ്ദേഹം പറഞ്ഞത്. സര്ക്കാരിന്റെ മുന്കൂര് അനുമതി തേടാതെ 1200 കോടി അധിക ബാധ്യത വരുത്തുന്ന ശമ്പള പരിഷ്കരണം നടപ്പിലാക്കിയെന്നും ടൂറിസം വികസനത്തിന് പല സൊസൈറ്റികള്ക്കും ബോര്ഡിന്റെ അനുമതിയോ സര്ക്കാര് അനുമതിയോ ഇല്ലാതെ നൂറു കണക്കിന് ഏക്കര് സ്ഥലം പാട്ടത്തിന് നല്കിയെന്നും കുറിപ്പില് പറയുന്നു.