FINED | കൊച്ചി കായലിലേക്ക് വീട്ടില്‍ നിന്നും മാലിന്യപ്പൊതി എറിഞ്ഞു; ദൃശ്യങ്ങള്‍ പകര്‍ത്തി വിനോദ സഞ്ചാരി; ഗായകന്‍ എം ജി ശ്രീകുമാറിന് 25,000 രൂപയുടെ പിഴ
തിരുവനന്തപുരം: കൊച്ചി കായലിലേക്ക് വീട്ടില്‍ നിന്നും മാലിന്യപ്പൊതി എറിഞ്ഞ സംഭവത്തില്‍ ഗായകന്‍ എം ജി ശ്രീകുമാറിന് 25,000 രൂപയുടെ പിഴ നോട്ടിസ്. മുളവുകാട് പഞ്ചായത്തിലെ വീട്ടില്‍ നിന്നും ഒരു മാലിന്യപ്പൊതി വീഴുന്നത് മൊബൈല്‍ ഫോണില്‍ പകര്‍ത്തിയ വിനോദസഞ്ചാരിയുടെ വിഡിയോ ആണ് പിഴയ്ക്ക് ആധാരമായത്.
വിഡിയോ ദൃശ്യവും ദിവസവും സമയവും സ്ഥലവും പരിശോധിച്ച് പഞ്ചായത്ത് അധികൃതരാണ് നോട്ടിസ് നല്‍കിയത്. തുടര്‍ന്ന് ഗായകന്‍ കഴിഞ്ഞ ദിവസം തന്നെ പിഴ ഒടുക്കുകയും ചെയ്തു. ശ്രീകുമാറിന്റെ വീട്ടില്‍ നിന്നാണ് മാലിന്യം വലിച്ചെറിയുന്നതെന്ന് വിഡിയോയില്‍ വ്യക്തമാണെങ്കിലും ആരാണ് ഇത് ചെയ്തത് എന്ന കാര്യം തിരിച്ചറിയാനായില്ല.
നാലു ദിവസം മുന്‍പ് സമൂഹമാധ്യമത്തിലൂടെ മന്ത്രി എം.ബി.രാജേഷിനെ ടാഗ് ചെയ്താണ് വിഡിയോ പോസ്റ്റ് ചെയ്തത്. പൊതുസ്ഥലത്ത് മാലിന്യം വലിച്ചെറിയുന്നതുമായി ബന്ധപ്പെട്ട പരാതികള്‍ അറിയിക്കാനുള്ള 94467 00800 എന്ന സര്‍ക്കാരിന്റെ വാട് സാപ് നമ്പറിലേക്ക് തെളിവ് സഹിതം പരാതി നല്‍കിയാല്‍ നടപടി ഉണ്ടാകുമെന്ന് മന്ത്രി മറുപടിയും നല്‍കി. പിന്നാലെ ഇങ്ങനെയുള്ള പരാതി ചെന്നതോടെ തദ്ദേശ വകുപ്പിലെ കണ്‍ട്രോള്‍ റൂമിന്റെ നിര്‍ദേശപ്രകാരം അന്നു തന്നെ പഞ്ചായത്ത് അധികൃതര്‍ സ്ഥലത്തെത്തി പരിശോധിച്ച് ഇക്കാര്യം സ്ഥിരീകരിച്ചു.
തുടര്‍ന്ന് പഞ്ചായത്ത് രാജ് ആക്ടിലെ ബന്ധപ്പെട്ട വകുപ്പു പ്രകാരം പിഴ നോട്ടിസ് നല്‍കുകയായിരുന്നു. ഇക്കാര്യം പിന്നീട് പരാതിക്കാരനെ മന്ത്രി തന്നെ സമൂഹമാധ്യമം വഴി അറിയിച്ചു. പിഴ അടച്ചു കഴിയുമ്പോള്‍ ഈ വിവരം തെളിവു സഹിതം നല്‍കിയ ആള്‍ക്ക് പാരിതോഷികം ലഭിക്കുമെന്നും മന്ത്രി വ്യക്തമാക്കിയിട്ടുണ്ട്.
