കണ്ണൂരില്‍ അമ്മയും 2 ആണ്‍മക്കളും വീട്ടുമുറ്റത്തെ കിണറ്റില്‍ മരിച്ചനിലയില്‍
പുലര്‍ച്ചെ രണ്ടു മണിയോടെ മൂന്നുപേരേയും കാണാനില്ലായിരുന്നു.
കണ്ണൂര്‍: അമ്മയേയും 2 ആണ്‍മക്കളേയും വീട്ടുമുറ്റത്തെ കിണറ്റില്‍ മരിച്ചനിലയില്‍ കണ്ടെത്തി. അഴീക്കോട് മീന്‍കുന്ന് മമ്പറം പീടികയ്ക്ക് സമീപം മഠത്തില്‍ ഹൗസില്‍ ഭാമ (44), മക്കളായ ശിവനന്ദ് (14,) അശ്വന്ത് (9) എന്നിവരാണ് മരിച്ചത്. ആത്മഹത്യയാണെന്നാണ് പൊലീസിന്റെ പ്രാഥമിക നിഗമനം. ഇന്നു പുലര്‍ച്ചെയാണ് മൃതദേഹം കണ്ടെത്തിയത്.
മക്കളെ കിണറ്റില്‍ എറിഞ്ഞതിനു ശേഷം അമ്മയും കിണറ്റില്‍ ചാടിയതാണെന്നാണ് സൂചന. മൃതദേഹം പരിയാരം മെഡിക്കല്‍ കോളജിലേക്ക് മാറ്റി. പുലര്‍ച്ചെ രണ്ടു മണിയോടെ മൂന്നുപേരേയും കാണാനില്ലായിരുന്നു. വീട്ടില്‍ അമ്മയും സഹോദരിയും മാത്രമാണ് ഉണ്ടായിരുന്നത്.
രാവിലെ അയല്‍വാസികളാണ് കിണറ്റില്‍ മൂന്നു പേരെയും മരിച്ച നിലയില്‍ കണ്ടെത്തിയത്. മത്സ്യ തൊഴിലാളിയായ ഭര്‍ത്താവ് രമേഷ് ബാബു കഴിഞ്ഞദിവസം ചാലിലെ വീട്ടിലായിരുന്നു ഉണ്ടായിരുന്നത്. എ.എസ്.പി കാര്‍ത്തിക്കിന്റെ നേതൃത്വത്തില്‍ പൊലീസ് സ്ഥലത്തെത്തി അന്വേഷണം നടത്തി.
