കണ്ണപുരം സ്‌ഫോടന കേസ്: അനു മാലിക്കിനെ റിമാന്‍ഡ് ചെയ്ത് കണ്ണൂര്‍ സ്‌പെഷ്യല്‍ സബ് ജയിലിലേക്ക് മാറ്റി
മൂന്ന് ദിവസത്തിനു ശേഷം പൊലീസ് കസ്റ്റഡി അപേക്ഷ നല്‍കും
കണ്ണൂര്‍: കണ്ണപുരം സ്‌ഫോടന കേസ് പ്രതി അനു മാലിക്കിനെ റിമാന്‍ഡ് ചെയ്ത് കണ്ണൂര്‍ സ്‌പെഷ്യല്‍ സബ് ജയിലിലേക്ക് മാറ്റി. മൂന്ന് ദിവസത്തിനു ശേഷം പൊലീസ് കസ്റ്റഡി അപേക്ഷ നല്‍കും. ജില്ലാ ക്രൈംബ്രാഞ്ച് എസിപിയുടെ മേല്‍നോട്ടത്തിലാണ് അന്വേഷണം പുരോഗമിക്കുന്നത്. തെളിവെടുപ്പടക്കം പൂര്‍ത്തിയാക്കി പഴുതടച്ചുളള കുറ്റപത്രം നല്‍കാനാണ് പൊലീസിന്റെ നീക്കം.
ശനിയാഴ്ച വൈകിട്ട് കാഞ്ഞങ്ങാട് വെച്ചാണ് ഇയാള്‍ പിടിയിലാകുന്നത്. അറസ്റ്റ് ചെയ്തശേഷം രാത്രി തന്നെ കണ്ണപുരത്തെത്തിച്ച പ്രതിയെ കഴിഞ്ഞ രണ്ടുദിവസങ്ങളിലായി ചോദ്യം ചെയ്തുവരികയാണ്. ചോദ്യം ചെയ്യലിനിടെ സ്‌ഫോടനത്തില്‍ നേരിട്ട് പങ്കില്ലെന്ന് അനു മാലിക് ആവര്‍ത്തിച്ച് പറഞ്ഞതായി പൊലീസ് അറിയിച്ചു. സമാനമായ ഏഴ് കേസുകളില്‍ പ്രതിയായ ഇയാള്‍ ഒരേ കുറ്റകൃത്യം ആവര്‍ത്തിക്കുന്നതായും പൊലീസ് ചൂണ്ടിക്കാട്ടി. എന്നാല്‍, സംഭവത്തിന് രാഷ്ട്രീയ ബന്ധമില്ലെന്ന് പൊലീസ് വ്യക്തമാക്കി.
അപകടത്തില്‍ ചാലാട് സ്വദേശി മുഹമ്മദ് അഷം കൊല്ലപ്പെട്ടിരുന്നു. കാഞ്ഞങ്ങാടുള്ള സുഹൃത്തിന്റെ വീട്ടില്‍ അഭയം തേടിയശേഷം സംസ്ഥാനം വിടാനായിരുന്നു അനുമാലിക്കിന്റെ നീക്കം. കണ്ണൂര്‍ നഗരത്തില്‍ കച്ചവടക്കാരനായിരുന്ന സുഹൃത്തിനോട് ആത്മഹത്യ ചെയ്യേണ്ട സാഹചര്യമാണെന്നും അനു മാലിക് പറഞ്ഞിരുന്നു. സ്‌ഫോടനത്തില്‍ അടുത്ത ബന്ധുവായ മുഹമ്മദ് അഷാം മരിച്ചത് അനു മാലികിനെ തളര്‍ത്തിയിരുന്നു. പിന്നാലെ കീഴടങ്ങാന്‍ ഒരുങ്ങുകയും ചെയ്തു. ഇതിനിടെയാണ് പൊലീസിന്റെ പിടിയിലാകുന്നത്. അനു മാലിക്ക് കച്ചവടക്കാരനാണെന്നും രാഷ്ട്രീയ ബന്ധമില്ലെന്നുമാണ് പൊലീസിന്റെ പ്രാഥമിക നിഗമനം.
പ്രതിയുടെ രാഷ്ടീയ ബന്ധത്തില്‍ സിപിഎമ്മും കോണ്‍ഗ്രസും പരസ്പരം ആരോപണങ്ങള്‍ ഉയര്‍ത്തിയിരുന്നു. അനധികൃതമായി നിര്‍മ്മിക്കുകയും സംഭരിക്കുകയും ചെയ്ത പടക്കനിര്‍മ്മാണത്തിനുളള സ്‌ഫോടക വസ്തുക്കള്‍ പൊട്ടിത്തെറിച്ചാണ് അപകടം സംഭവിച്ചത്.
