MEETING | സെക്രട്ടറിയേറ്റിന് മുന്നില്‍ സമരം ചെയ്യുന്ന ആശാവര്‍ക്കര്‍മാരെ ചര്‍ച്ചയ്ക്ക് വിളിച്ച് വീണാ ജോര്‍ജ്
തിരുവനന്തപുരം: വേതന വര്‍ധന അടക്കം ആവശ്യപ്പെട്ട് സെക്രട്ടറിയേറ്റിന് മുന്നില്‍ സമരം ചെയ്യുന്ന ആശാവര്‍ക്കര്‍മാരെ സമരത്തിന് ക്ഷണിച്ച് ആരോഗ്യ മന്ത്രി വീണാ ജോര്‍ജ്. രാപ്പകല്‍ സമരം 52 ദിവസം പിന്നിടുമ്പോഴാണ് മൂന്നാം തവണ സംസ്ഥാന സര്‍ക്കാര്‍ ആശാവര്‍ക്കര്‍മാരുമായി ചര്‍ച്ച നടത്തുന്നത്. വ്യാഴാഴ്ച വൈകിട്ട് മൂന്ന് മണിക്ക് എന്‍ എച്ച് എം ഓഫീസില്‍ വെച്ചാണ് ചര്‍ച്ച നടത്തുന്നത്. മുഴുവന്‍ സംഘടനകളുമായും ചര്‍ച്ച നടത്തുമെന്ന് ആരോഗ്യമന്ത്രി അറിയിച്ചു.
സമരക്കാര്‍ക്കൊപ്പം തൊഴിലാളി സംഘടനകളായ സി.ഐ.ടി.യു-ഐ.എന്‍.ടി.യു.സി നേതാക്കളെയും ചര്‍ച്ചക്ക് വിളിച്ചിട്ടുണ്ട്. ഓണറേറിയം കൂട്ടുന്നത് അടക്കമുള്ള ആവശ്യങ്ങളില്‍ അനുകൂല തീരുമാനമെടുത്ത് ഉത്തരവിറക്കാതെ സമരത്തില്‍ നിന്ന് പിന്മാറില്ലെന്നാണ് ആശാമാരുടെ നിലപാട്.
കേന്ദ്ര ആരോഗ്യമന്ത്രിയുമായുള്ള കൂടിക്കാഴ്ചയ്ക്ക് പിന്നാലെയാണ് വീണ ജോര്‍ജ് ആശമാരുമായി വീണ്ടും ചര്‍ച്ച നടത്തുന്നത്. നേരത്തെ രണ്ട് വട്ടം സമരക്കാരുമായി മന്ത്രി നടത്തിയ ചര്‍ച്ച പരാജയമായിരുന്നു. എന്‍.എച്ച്.എം ഡയറക്ടറുമായും രണ്ട് തവണ ചര്‍ച്ച നടന്നിരുന്നു.
സര്‍ക്കാരിന്റെ കയ്യില്‍ പണമില്ലെന്നും സമരക്കാര്‍ വിട്ടുവീഴ്ച ചെയ്യണമെന്നുമായിരുന്നു നേരത്തെ നടത്തിയ ചര്‍ച്ചകളിലും സര്‍ക്കാരിന്റെ നിലപാട്. വ്യാഴാഴ്ചത്തെ ചര്‍ച്ചയില്‍ സര്‍ക്കാര്‍ വഴങ്ങുമെന്നാണ് സമരക്കാരുടെ പ്രതീക്ഷ. ഓണറേറിയം കൂട്ടുന്നതിലും വിരമിക്കല്‍ ആനുകൂല്യം പ്രഖ്യാപിക്കുന്നതിലും അടക്കം സമരക്കാര്‍ വിട്ടുവീഴ്ചയ്ക്ക് തയ്യാറല്ല.
കേന്ദ്ര ആരോഗ്യമന്ത്രിയുമായുള്ള കൂടിക്കാഴ്ചയ്ക്ക് ശേഷവും ഓണറേറിയം കൂട്ടുന്ന കാര്യത്തില്‍ വീണ ജോര്‍ജ്ജ് നിലപാട് അറിയിച്ചിരുന്നില്ല. കേന്ദ്രം ഇന്‍സെന്റീവ് കൂട്ടിയാല്‍, ആനുപാതികമായി കേരളത്തിന്റെ വിഹിതവും കൂട്ടുമെന്ന പഴയ നിലപാടായിരുന്നു ആവര്‍ത്തിക്കുന്നത്.
ഇതിന് അപ്പുറം നാളെ മറ്റെന്തെങ്കിലും ഫോര്‍മുല സര്‍ക്കാര്‍ മുന്നോട്ട് വയ്ക്കുമോ എന്നാണ് ഇനി അറിയേണ്ടത്. മറ്റ് ട്രേഡ് യൂണിയനുകള്‍ കൂടി ചര്‍ച്ചയില്‍ പങ്കെടുക്കുമെന്നതും പ്രധാനമാണ്. അതിനിടെ ആശാമാരുടെ നിരാഹാരസമരം രണ്ടാഴ്ച പിന്നിടുകയാണ്.
