'ഭരണനേട്ടം എടുത്ത് പറയുന്ന ഇ.കെ. നായനാര്‍'; പ്രചാരണത്തിന് എഐ വിഡിയോ പുറത്തിറക്കി സിപിഎം
തിരുവനന്തപുരം: സിപിഎമ്മിന്റെ ഭരണനേട്ടം എടുത്ത് പറയുന്ന മുന്‍ മുഖ്യമന്ത്രി ഇ.കെ.നായനാറിന്റെ എ ഐ വീഡിയോ പുറത്തിറക്കി സിപിഎം. സംസ്ഥാന സമ്മേളനത്തിന്റെ പ്രചാരണത്തിന്റെ ഭാഗമായാണ് സിപിഎം എഐ വിഡിയോ പുറത്തിറക്കിയത്. മാര്‍ച്ചില്‍ കൊല്ലത്താണ് സിപിഎമ്മിന്റെ സംസ്ഥാന സമ്മേളനം നടക്കുന്നത്. സിപിഎം ജില്ലാ കമ്മിറ്റിയാണ് എ ഐയുടെ സഹായത്തോടെ വീഡിയോ തയ്യാറാക്കിയിരിക്കുന്നത്.
പാര്‍ട്ടി കോണ്‍ഗ്രസിന്റെ കരട് നയത്തില്‍ എഐക്കെതിരായ നിലപാട് സിപിഎം പ്രസിദ്ധീകരിച്ചിരുന്നു. എഐ സോഷ്യലിസം കൊണ്ടുവരുമെന്നാണ് സംസ്ഥാന സെക്രട്ടറി എം.വി. ഗോവിന്ദന്‍ ആദ്യം പറഞ്ഞത്. എന്നാല്‍ പിന്നീട് എഐയെ തള്ളിപ്പറയുകയും ചെയ്തു. ഇത് വാര്‍ത്തകളില്‍ ഇടംപിടിച്ചിരുന്നു. അതിനിടെയാണ് ഇ.കെ. നായനാര്‍ പ്രസംഗിക്കുന്ന പ്രചാരണ വിഡിയോ സിപിഎം പുറത്തുവിട്ടിരിക്കുന്നത് എന്നത് ശ്രദ്ധേയമാണ്. വിഡിയോ ഇതിനകം തന്നെ വൈറലായിട്ടുണ്ട്.
'സഖാക്കളെ നൂറു കൊല്ലം കമ്യൂണിസ്റ്റുകാര്‍ അധികാരത്തില്‍ വരില്ലെന്നല്ലേ അവര്‍ പണ്ട് പറഞ്ഞത്. ഞാന്‍ മുഖ്യമന്ത്രി ആയില്ലേ. വിഎസ് ആയില്ലേ, നമ്മുടെ പിണറായിയും ആയില്ലേ. പിണറായി രണ്ടാമതും മുഖ്യമന്ത്രി ആയില്ലേ. എന്തുകൊണ്ടാണ്? ജനത്തിനു വേണ്ടത് നമ്മളെയാണ്.
കര്‍ഷക തൊഴിലാളികള്‍ക്ക് പെന്‍ഷന്‍ കൊടുത്തതാരാ? കോണ്‍ഗ്രസുകാരാ, ബിജെപിക്കാരാ ? നമ്മളാ കൊടുത്തത്. ആര് പാര വച്ചാലും നമ്മള്‍ പോരാടണം. സംസ്ഥാന സമ്മേളനം ഉഷാറാക്കണം. നാട്ടിലെ ജനങ്ങള്‍ എല്ലാം നമ്മോടൊപ്പം നില്‍ക്കും. എല്ലാവരും ചായേന്റെ വെള്ളമൊക്കെ കുടിച്ച് ഉഷാറായേ. ലാല്‍സലാം സഖാക്കളെ' എന്നാണ് എ.ഐ ഉപയോഗിച്ച് നിര്‍മിച്ച വിഡിയോയില്‍ ഇ.കെ. നായനാര്‍ പറയുന്നത്.
