കണ്‍സ്യൂമര്‍ഫെഡ് ഓണച്ചന്ത: സംസ്ഥാനതല ഉദ്ഘാടനം മുഖ്യമന്ത്രി നിര്‍വഹിക്കും; 13 ഇനങ്ങള്‍ക്ക് സബ് സിഡി
ഒരുദിവസം 75 പേര്‍ക്കാണ് നിത്യോപയോഗ സാധനങ്ങള്‍ ഓണച്ചന്തകളില്‍നിന്ന് ലഭ്യമാകുക
തിരുവനന്തപുരം: കണ്‍സ്യൂമര്‍ഫെഡ് ഓണച്ചന്തയുടെ സംസ്ഥാനതല ഉദ്ഘാടനം തിരുവനന്തപുരം സ്റ്റാച്യുവില്‍ വൈകിട്ട് അഞ്ചുമണിക്ക് മുഖ്യമന്ത്രി പിണറായി വിജയന്‍ നിര്‍വഹിക്കും. സഹകരണ വകുപ്പ് മന്ത്രി വി. എന്‍. വാസവന്‍ അദ്ധ്യക്ഷത വഹിക്കുന്ന ചടങ്ങില്‍ വിദ്യാഭ്യാസ തൊഴില്‍ വകുപ്പ് മന്ത്രി വി ശിവന്‍കുട്ടി, ആന്റണി രാജു എംഎല്‍എ തുടങ്ങിയവര്‍ പങ്കെടുക്കും.
ഓണവിപണിയിലെ കൃത്രിമമായ വിലക്കയറ്റം പിടിച്ചുനിര്‍ത്താനും അവശ്യസാധനങ്ങള്‍ വിലക്കുറവില്‍ ലഭ്യമാക്കാനുമുള്ള സര്‍ക്കാര്‍ ഇടപെടലാണ് കണ്‍സ്യൂമര്‍ഫെഡ് ഓണച്ചന്തകള്‍. ആഗസ്റ്റ് 26 മുതല്‍ സെപ്റ്റംബര്‍ നാലുവരെയാണ് ഓണച്ചന്തകള്‍ പ്രവര്‍ത്തിക്കുന്നത്. ജില്ലയില്‍ 16 ത്രിവേണി സൂപ്പര്‍മാര്‍ക്കറ്റുകളിലും 154 സഹകരണസംഘങ്ങളിലുമായി 170 കേന്ദ്രങ്ങളിലായാണ് ഓണച്ചന്തകള്‍ ആരംഭിക്കുന്നത്.
നിത്യോപയോഗ സാധനങ്ങളുടെ ഗുണനിലവാരം സര്‍ക്കാര്‍ അംഗീകാരമുള്ള പ്രത്യേക ഏജന്‍സി പരിശോധിച്ച് ഗുണമേന്മ ഉറപ്പാക്കിയാണ് ഓണച്ചന്തകളില്‍ വിപണനത്തിന് എത്തിക്കുന്നത്. ജില്ലയിലെ പൂജപ്പുര,വെഞ്ഞാറമൂട് ഗോഡൗണുകളില്‍ നിന്നുമാണ് സാധനങ്ങള്‍ ഓണചന്തകളില്‍ എത്തിക്കുന്നത്. ഒരുദിവസം 75 പേര്‍ക്കാണ് നിത്യോപയോഗ സാധനങ്ങള്‍ ഓണച്ചന്തകളില്‍നിന്ന് ലഭ്യമാകുക.
ആന്ധ്ര ജയ അരി,കുറുവ അരി,മട്ടഅരി,പച്ചരി,പഞ്ചസാര,ഉഴുന്ന്,ചെറുപയര്‍,കടല,തുവരപ്പരിപ്പ്,വന്‍പയര്‍,മുളക്,മല്ലി,വെളിച്ചെണ്ണ എന്നിങ്ങനെ 13 നിത്യോപയോഗ സാധനങ്ങള്‍ സര്‍ക്കാര്‍ സബ്‌സിഡിയോടെ പൊതുവിപണിയേക്കാള്‍ 30 മുതല്‍ 50 ശതമാനം വരെ വിലക്കുറവില്‍ പൊതുജനങ്ങള്‍ക്ക് ലഭിക്കും.
കേരളത്തിലെ വിവിധ സഹകരണ സംഘങ്ങള്‍ കേരകര്‍ഷകരില്‍ നിന്ന് നേരിട്ട് കൊപ്ര ശേഖരിച്ച് ഉല്‍പാദിപ്പിക്കുന്ന വിവിധ പേരിലുള്ള വെളിച്ചെണ്ണകളാണ് ഓണച്ചന്തകളിലൂടെ ജനങ്ങളിലേക്കെത്തുന്നത്. ദിനേശ്,റെയ്ഡ്കോ,മില്‍മ തുടങ്ങിയ വിവിധ സഹകരണസ്ഥാപനങ്ങളുടെ ഉല്‍പന്നങ്ങളും പ്രത്യേകം വിലക്കുറവില്‍ ലഭിക്കും. അതോടൊപ്പം തേയില,ആട്ട,മൈദ,റവ,അരിപൊടികള്‍,മസാലപ്പൊടികള്‍ തുടങ്ങിയവയും ബിരിയാണി അരി,ശര്‍ക്കര,സേമിയ,പാലട,അരിയട,ചുവന്നുള്ളി,സവാള എന്നിവയും പ്രത്യേകം വിലക്കുറവില്‍ ലഭ്യമാകും.
