ലക്ഷ്യമിടുന്നത് തുടര്‍ഭരണം; വികസനത്തിന് ജനം അനുകൂലമെന്നും മുഖ്യമന്ത്രി
കൊല്ലം: പാര്‍ട്ടി നയങ്ങള്‍ക്ക് അകത്തുനിന്നാണ് നയരേഖയെന്ന് വ്യക്തമാക്കി മുഖ്യമന്ത്രി പിണറായി വിജയന്‍. സിപിഎം സംസ്ഥാന സമ്മേളനത്തില്‍ അവതരിപ്പിച്ച നയരേഖയിലെ ചര്‍ച്ചയ്ക്ക് മറുപടി പറയുകയായിരുന്നു അദ്ദേഹം. നയരേഖയുടെ നടത്തിപ്പില്‍ സുതാര്യത ഉണ്ടാകുമെന്നും ജനങ്ങളോട് കാര്യങ്ങള്‍ വിശദീകരിച്ച ശേഷമായിരിക്കും നടത്തിപ്പ് എന്നും മുഖ്യമന്ത്രി വിശദീകരിച്ചു.
സ്വകാര്യപങ്കാളിത്തത്തിന് അനുകൂലമായ നയം, സെസും ഫീസും പിരിക്കാനുള്ള നീക്കം തുടങ്ങിയവ ചൂണ്ടിക്കാട്ടി ഉയര്‍ന്നുവന്ന വിമര്‍ശനങ്ങള്‍ക്കുള്ള മറുപടിയിലാണ് മുഖ്യമന്ത്രി വിശദീകരണം നല്‍കിയത്. തുടര്‍ഭരണമാണ് ലക്ഷ്യമിടുന്നതെന്ന് പറഞ്ഞ മുഖ്യമന്ത്രി വിഭവസമാഹരണത്തില്‍ ചിലര്‍ ആശങ്കയുണ്ടാക്കുന്നുവെന്നും ചൂണ്ടിക്കാട്ടി.
സെസ് ചുമത്തുക ലക്ഷ്യമല്ല, സാധ്യത മാത്രമാണ്. വികസനത്തിന് ജനം അനുകൂലമാണ്, അവരെ വിശ്വാസത്തിലെടുത്ത് മുന്നോട്ടു പോകും. ജനദ്രോഹ നിലപാടില്ല. സര്‍ക്കാര്‍ സൗജന്യങ്ങള്‍ അര്‍ഹതയുള്ളവര്‍ക്ക് മാത്രമായിരിക്കും. പാര്‍ട്ടി നയത്തില്‍ നിന്ന് തന്നെയാണ് നവ കേരള രേഖയെന്നും മുഖ്യമന്ത്രി പറഞ്ഞു.
കഴിഞ്ഞദിവസം, നവകേരളത്തിനായി പുതുവഴികള്‍ എന്ന രേഖയിലെ ചര്‍ച്ചയില്‍ പങ്കെടുത്ത ചില പ്രതിനിധികള്‍ ചില ആശങ്കകള്‍ ഉന്നയിച്ചിരുന്നു. നിലവില്‍ സൗജന്യമായി നല്‍കിവരുന്ന സേവനങ്ങള്‍ക്ക് ഫീസ് ഈടാക്കുകയും സെസ് ഏര്‍പ്പെടുത്തുകയുമൊക്കെ ചെയ്താല്‍ ജനങ്ങള്‍ എതിരാകുമെന്നും പൊതുമേഖലാ സ്ഥാപനങ്ങളുടെ സ്വകാര്യവത്കരണം അടക്കം സിപിഎമ്മിന്റെ നയത്തിലുണ്ടായ വ്യതിയാനം പാര്‍ട്ടിശത്രുക്കള്‍ ഉപയോഗിക്കുമെന്നും ചൂണ്ടിക്കാട്ടിയിരുന്നു. ഇതിന് മറുപടി നല്‍കുകയായിരുന്നു മുഖ്യമന്ത്രി.
