എസ്.ഐ.ആര്‍ എന്യൂമേറഷന്‍ ഫോം വിതരണ ക്യാമ്പിനിടെ ഉടുമുണ്ട് പൊക്കി കാണിച്ചു; ബിഎല്‍ഒ യെ സ്ഥാനത്ത് നിന്നും മാറ്റി
തവനൂര്‍ മണ്ഡലം 38-ാം നമ്പര്‍ ആനപ്പടി വെസ്റ്റ് എല്‍പി സ്‌കൂള്‍ ബൂത്തിലെ ബിഎല്‍ഒയെ ആണ് ജില്ലാ കലക്ടര്‍ വി.ആര്‍. വിനോദ് ചുമതലയില്‍ നിന്ന് നീക്കിയത്
മലപ്പുറം: വോട്ടര്‍മാരോട് അപമര്യാദയായി പെരുമാറിയ സംഭവത്തില്‍ ബൂത്ത് ലെവല്‍ ഓഫിസറെ സ്ഥാനത്തു നിന്നും മാറ്റി. തവനൂര്‍ മണ്ഡലം 38-ാം നമ്പര്‍ ആനപ്പടി വെസ്റ്റ് എല്‍പി സ്‌കൂള്‍ ബൂത്തിലെ ബിഎല്‍ഒയെ ആണ് ജില്ലാ കലക്ടര്‍ വി.ആര്‍. വിനോദ് ചുമതലയില്‍ നിന്ന് നീക്കിയത്. വിഷയത്തില്‍ ഉദ്യോഗസ്ഥനോട് വിശദീകരണം തേടുമെന്ന് അധികൃതര്‍ വ്യക്തമാക്കി. ചെറിയ പരപ്പൂര്‍ എ.എം.എല്‍.പി സ്‌കൂള്‍ അധ്യാപിക പ്രസീനയ്ക്ക് പകരം ബിഎല്‍ഒയുടെ ചുമതല നല്‍കി.
കഴിഞ്ഞ ദിവസമാണ് എസ്.ഐ.ആര്‍ എന്യൂമേറഷന്‍ ഫോം വിതരണ ക്യാമ്പിനിടെ ബിഎല്‍ഒ ഉടുമുണ്ട് പൊക്കി കാണിച്ച് അപമര്യാദയായി പെരുമാറിയത്. പ്രായമുള്ളവരെയടക്കം വെയിലത്ത് വരിയില്‍ നിര്‍ത്തുന്നത് നാട്ടുകാര്‍ ചോദ്യം ചെയ്തതാണ് ഉദ്യോഗസ്ഥന്റെ പ്രകോപനത്തിന് കാരണമായത്. നാട്ടുകാരുമായുള്ള വാക്കേറ്റത്തിനിടെ കാമറയില്‍ ദൃശ്യങ്ങള്‍ പകര്‍ത്തുന്നതില്‍ കുപിതനായ ബിഎല്‍ഒ മുണ്ട് പൊക്കിക്കാട്ടുകയായിരുന്നു. സംഭവം വിവാദമായതോടെയാണ് നടപടി എടുക്കാന്‍ അധികൃതരെ പ്രേരിപ്പിച്ചത്.
