കെ സുരേന്ദ്രന്‍ നയിച്ച പദയാത്രക്ക് വാങ്ങിയ വാഹനം തിരിച്ചുനല്‍കിയില്ല; ശിവസേന നേതാക്കള്‍ക്കെതിരെ കേസ്
കാഞ്ഞങ്ങാട് കുശാല്‍ നഗറിലെ കെ.കെ സന്തോഷ് കുമാറിന്റെ ഭാര്യ ഗീതുറൈ നല്‍കിയ പരാതിയിലാണ് കേസെടുത്തത്
കാഞ്ഞങ്ങാട്: ബി.ജെ.പി മുന്‍ സംസ്ഥാന പ്രസിഡണ്ടായിരുന്ന കെ സുരേന്ദ്രന്‍ കാസര്‍കോട്ട് നിന്നും തിരുവനന്തപുരത്തേക്ക് നടത്തിയ പദയാത്രക്കായി വാങ്ങിയ വാഹനം തിരിച്ചു നല്‍കാതെ വഞ്ചിച്ചുവെന്ന യുവതിയുടെ പരാതിയില്‍ ശിവസേന സംസ്ഥാന പ്രസിഡണ്ടിനും എറണാകുളം ജില്ലാ സെക്രട്ടറിക്കുമെതിരെ ഹൊസ് ദുര്‍ഗ് പൊലീസ് കേസെടുത്തു.
കാഞ്ഞങ്ങാട് കുശാല്‍ നഗറിലെ കെ.കെ സന്തോഷ് കുമാറിന്റെ ഭാര്യ ഗീതുറൈ(42) നല്‍കിയ പരാതിയിലാണ് ശിവസേന സംസ്ഥാന പ്രസിഡണ്ട് അഡ്വ. പേരൂര്‍ക്കട ഹരികുമാര്‍, എറണാകുളം ജില്ലാ പ്രസിഡന്റ് സുധീര്‍ ഗോപി എന്നിവര്‍ക്കെതിരെ കേസെടുത്തത്. 2024 ജനുവരി 28നാണ് ഗീതുറൈയുടെ ഭര്‍ത്താവ് സന്തോഷ് കുമാറിന്റെ കെ.എല്‍ 60 എ 2863 നമ്പര്‍ ടാറ്റ എയിസ് വാഹനം ഇവര്‍ കെ സുരേന്ദ്രന്റെ പദയാത്രക്കായി വാങ്ങിയതെന്ന് ഗീതു പൊലീസില്‍ നല്‍കിയ പരാതിയില്‍ പറയുന്നു. പിന്നീട് വാഹനം തിരിച്ചുനല്‍കിയില്ല. തിരിച്ചു ചോദിച്ചപ്പോള്‍ കൊല്ലുമെന്ന് ഭീഷണിപ്പെടുത്തുകയായിരുന്നുവെന്നും പരാതിയില്‍ പറയുന്നു.
