ലക്ഷ്യം തിരഞ്ഞെടുപ്പ് ; ഇനി സംസ്ഥാന സര്‍ക്കാരിന്റെ വികസന സദസ്സ്; തദ്ദേശ സ്ഥാപനതലത്തില്‍ സംഘടിപ്പിക്കും
കാസര്‍കോട്: വരാനിരിക്കുന്ന തിരഞ്ഞെടുപ്പുകള്‍ മുന്നില്‍കണ്ടുകൊണ്ട് സംസ്ഥാന സര്‍്ക്കാര്‍ പ്രചാരണപ്രവര്‍ത്തനങ്ങള്‍ക്ക് മുന്നിട്ടിറങ്ങുന്നു.സംസ്ഥാന സര്‍ക്കാര്‍ എല്ലാ നിയോജക മണ്ഡലങ്ങളിലും സംഘടിപ്പിച്ച നവകേരള സദസ്സിന് ശേഷം അതേ മാതൃകയില്‍ തദ്ദേശ സ്ഥാപനതലത്തില്‍ വികസന സദസ്സ് എന്ന പേരില്‍ പരിപാടി സംഘടിപ്പിക്കാനാണ് തീരുമാനം. സംസ്ഥാന സര്‍ക്കാരും തദ്ദേശസ്ഥാപനങ്ങളും കൈവരിച്ച നേട്ടങ്ങള്‍ അവതരിപ്പിക്കുകയാണ് ലക്ഷ്യം. സെപ്റ്റംബര്‍ 22 മുതല്‍ ഒക്ടോബര്‍ 20 വരെയാണ് പരിപാടി സംഘടിപ്പിക്കുന്നത്.
ഗ്രാമപഞ്ചായത്തുകള്‍, നഗരസഭ എന്നിവയില്‍ എല്ലാ വാര്‍ഡുകളില്‍ നിന്നുമുള്ള ജനങ്ങളുടെ പങ്കാളിത്തത്തില്‍ സ്ത്രീകള്‍ യുവജനങ്ങള്‍ ഉള്‍പ്പെടെ സമൂഹത്തിന്റെ വിവിധ തുറകളില്‍ ഉള്ളവരെ ഉള്‍പ്പെടുത്തിയാണ് വികസന സദസ്സ് സംഘടിപ്പിക്കുക നിയമസഭാ സാമാജികര്‍, ജില്ല പഞ്ചായത്ത് പ്രസിഡണ്ട്, മുനിസിപ്പല്‍ ചെയര്‍പേഴ്‌സണ്‍മാര്‍ ബ്ലോക്ക്, ഗ്രാമപഞ്ചായത്ത് പ്രസിഡണ്ടുമാര്‍ തുടങ്ങിയ ജനപ്രതിനിധികള്‍ക്ക് പുറമേ വിശിഷ്ട വ്യക്തികള്‍ സമൂഹത്തിന്റെ വിവിധ മേഖലകളില്‍ മികച്ച പ്രവര്‍ത്തനം കാഴ്ചവച്ചവര്‍ എന്നിവരും വികസന സദസ്സില്‍ പങ്കാളികളാകും. അതി ദാരിദ്ര്യനിര്‍മാര്‍ജനം, ലൈഫ് മിഷന്‍ പദ്ധതികള്‍ക്കായി ഭൂമി വിട്ടു നല്‍കിയവരെയും ഹരിത കര്‍മ്മ സേന പ്രവര്‍ത്തകരെയും ചടങ്ങില്‍ ആദരിക്കും. വികസന സദസ്സിന്റെ ഭാഗമായി പൊതുജനങ്ങള്‍ക്ക് കെസ്മാര്‍ട്ട് സേവനങ്ങള്‍ ലഭ്യമാക്കുന്ന കെ സ്മാര്‍ട്ട് ക്ലിനിക് സജ്ജമാക്കും. കൂടാതെ സര്‍ക്കാരിന്റെയും തദ്ദേശസ്ഥാപനങ്ങളുടെയും വികസന പ്രവര്‍ത്തനങ്ങളുടെ ചിത്രപ്രദര്‍ശനവും ഉണ്ടായിരിക്കും. സംസ്ഥാന സര്‍ക്കാരിന്റെയും തദ്ദേശസ്ഥാപനങ്ങളുടെയും വികസന നേട്ടങ്ങളും ഇനി നടപ്പാക്കേണ്ട പദ്ധതികളും സംബന്ധിച്ച് പൊതുജനങ്ങളില്‍ നിന്നുള്ള അഭിപ്രായങ്ങളും നിര്‍ദ്ദേശങ്ങളും അവതരിപ്പിക്കുന്നതിനുള്ള ഓപ്പണ്‍ ഫോറം, സംഗ്രഹ ചര്‍ച്ച എന്നിവയും ഉണ്ടാവും.
ചര്‍ച്ചയില്‍ ഉരുത്തിരിയുന്ന അഭിപ്രായങ്ങള്‍ ക്രോഡീകരിച്ച് സംസ്ഥാനത്തിന്റെ പൊതുവായ വികസന പ്രവര്‍ത്തനങ്ങളില്‍ പരിഗണിക്കും. വികസന സദസിന്റെ പ്രവര്‍ത്തനങ്ങള്‍ ഏകോപിപ്പിക്കുന്നതിനായി ജില്ലാ പഞ്ചായത്ത് പ്രസിഡണ്ട് ചെയര്‍പേഴ്‌സണ്‍, ജില്ലാ കലക്ടര്‍ കോ ചെയര്‍പേഴ്‌സണ്‍,തദ്ദേശ വകുപ്പ് ജോയിന്റ് ഡയറക്ടര്‍ കണ്‍വീനര്‍ ജില്ലാ പ്ലാനിംഗ് ഓഫീസര്‍, ജില്ലാ ഇന്‍ഫര്‍മേഷന്‍ ഓഫീസര്‍ എന്നിവര്‍ അംഗങ്ങളുമായ സമിതി പ്രവര്‍ത്തിക്കും.
മുഖ്യമന്ത്രി പിണറായി വിജയന്‍ 22ന് വികസന സദസിന്റെ സംസ്ഥാനതല ഉദ്ഘാടനം നിര്‍വഹിക്കും .സംസ്ഥാന സര്‍ക്കാരിന്റെ വികസന നേട്ടങ്ങളും തദ്ദേശസ്വയംഭരണ സ്ഥാപനങ്ങളുടെ വികസന നേട്ടങ്ങളും സദസ്സില്‍ പ്രദര്‍ശിപ്പിക്കും.
