മുംബൈയില്‍ 70 ലക്ഷത്തിന്റെ കവര്‍ച്ച; പള്ളിക്കര സ്വദേശി അറസ്റ്റില്‍
പള്ളിക്കര ബീച്ച് റോഡിലെ നബീര്‍ എന്ന അസീറിനെയാണ് മഹാരാഷ്ട്ര പൊലീസ് അറസ്റ്റ് ചെയ്തത്
ബേക്കല്‍: മുംബൈയില്‍ 70 ലക്ഷത്തിന്റെ കവര്‍ച്ച നടത്തിയ കേസില്‍ പ്രതിയായ പള്ളിക്കര സ്വദേശി അറസ്റ്റില്‍. പള്ളിക്കര ബീച്ച് റോഡിലെ നബീര്‍ എന്ന അസീറിനെ(32)യാണ് മഹാരാഷ്ട്ര പൊലീസ് അറസ്റ്റ് ചെയ്തത്. മഹാരാഷ്ട്ര പല്‍ഹാര്‍ ജില്ലയിലെ കാസ പൊലീസ് സ്റ്റേഷനില്‍ നിന്നുള്ള സംഘം ചൊവ്വാഴ്ച കാസര്‍കോട്ടെത്തുകയും ബേക്കല്‍ പൊലീസിന്റെ സഹായത്തോടെ നബീറിനെ പിടികൂടുകയുമായിരുന്നു.
മുംബൈയില്‍ നിന്ന് പച്ച മല്‍സ്യം കൊണ്ടുവരുന്ന വാഹനത്തില്‍ കവര്‍ച്ചാമുതല്‍ കടത്താന്‍ സൗകര്യം ചെയ്തുകൊടുത്തുവെന്നതിനാണ് നബീറിനെ കേസില്‍ പ്രതി ചേര്‍ത്തത്. ദേശീയപാതയില്‍ യാത്രക്കാരെ തടഞ്ഞ് വന്‍തുക കൊള്ളയടിച്ച കേസില്‍ അഞ്ചുപേരെ നേരത്തെ പൊലീസ് അറസ്റ്റ് ചെയ്തിരുന്നു. ഇതിന്റെ തുടര്‍ച്ചയായാണ് പള്ളിക്കര സ്വദേശിയുടെ അറസ്റ്റ്. മഞ്ചേശ്വരം പൊലീസ് സ്റ്റേഷന്‍ പരിധിയിലെ ഒരാളെയും ഇതേ കേസില്‍ മഹാരാഷ്ട്ര പൊലീസ് അറസ്റ്റ് ചെയ്തിട്ടുണ്ട്.
