തദ്ദേശ പൊതുതിരഞ്ഞെടുപ്പ്: സ്ഥാനാര്‍ത്ഥികള്‍ക്ക് ചിഹ്നം അനുവദിച്ചു
കാസര്‍കോട്: തദ്ദേശ സ്വയംഭരണ സ്ഥാപന തിരഞ്ഞെടുപ്പില്‍ മത്സരിക്കുന്നതിന് സ്ഥാനാര്‍ത്ഥികള്‍ക്ക് ചിഹ്നം അനുവദിച്ചു. സെക്കുലര്‍ നാഷണല്‍ ദ്രാവിഡ പാര്‍ട്ടിക്ക് (SNDP) 'കുട' (Umbrella), കേരള കോണ്‍ഗ്രസ് (സ്‌കറിയ തോമസ്) പാര്‍ട്ടിക്ക് ലാപ് ടോപ്, സോഷ്യലിസ്റ്റ് റിപ്പബ്ലിക്കന്‍ പാര്‍ട്ടിക്ക് കപ്പല്‍ എന്നീ ചിഹ്നങ്ങള്‍ അനുവദിച്ച് തിരഞ്ഞെടുപ്പ് കമ്മീഷന്‍ ഉത്തരവായി.
ഈ പാര്‍ട്ടികള്‍ കേന്ദ്ര തിരഞ്ഞെടുപ്പ് കമ്മീഷന്‍ പുറത്തിറക്കിയ നിഷ്‌ക്രിയ രാഷ്ട്രീയ പാര്‍ട്ടികളുടെ ('De-listed Political Parties') പട്ടികയില്‍ ഉള്‍പ്പെട്ടതിനാല്‍ സംസ്ഥാന തിരഞ്ഞെടുപ്പ് കമ്മീഷന്‍ പ്രസിദ്ധീകരിച്ച പാര്‍ട്ടി പട്ടികയില്‍ നിന്നും ഒഴിവാക്കിയിരുന്നു.
ഇതിനെതിരെ ഈ രാഷ്ട്രീയ പാര്‍ട്ടികള്‍ ഹൈക്കോടതിയെ സമീപിക്കുകയും, ഹൈക്കോടതി ഈ പാര്‍ട്ടികളെ നിഷ്‌ക്രിയ രാഷ്ട്രീയ പാര്‍ട്ടികളുടെ('De-listed Political Parties') പട്ടികയില്‍ നിന്നും തല്‍ക്കാലികമായി മാറ്റി ഉത്തരവിടുകയും ചെയ്തിരുന്നു. തദ്ദേശ തിരഞ്ഞെടുപ്പില്‍ ഈ രാഷ്ട്രീയ പാര്‍ട്ടികള്‍ക്ക് മത്സരിക്കാം എന്നും അവര്‍ക്ക് ചിഹ്നം അനുവദിക്കണമെന്നും ഹൈക്കോടതി വിധിച്ചു.
ഇതേതുടര്‍ന്നാണ് പാര്‍ട്ടികളുടെ അപേക്ഷ പ്രകാരം സംസ്ഥാന തിരഞ്ഞെടുപ്പ് കമ്മീഷന്റെ ചിഹ്നം സംബന്ധിച്ച വിജ്ഞാപനത്തിലെ നാലാം പട്ടികയിലെ ചിഹ്നം മുന്‍ഗണനാടിസ്ഥാനത്തില്‍ അനുവദിച്ചത്. ദേശീയ പാര്‍ട്ടിയായ നാഷണല്‍ പീപ്പിള്‍സ് പാര്‍ട്ടിക്ക് കേന്ദ്ര തിരഞ്ഞെടുപ്പ് കമ്മീഷന്‍ അനുവദിച്ച അതേ ചിഹ്നം (പുസ്തകം) അനുവദിച്ചിട്ടുണ്ട്.
