കാസര്‍കോട് ജില്ലാ കലക്ടറുടെ പേരില്‍ വ്യാജ വാട്‌സ് ആപ്പ് അക്കൗണ്ട്; ജാഗ്രത പാലിക്കാന്‍ നിര്‍ദേശം
വിയറ്റ് നാമിലെ ഫോണ്‍ നമ്പര്‍ ഉപയോഗിച്ചാണ് വ്യാജ വാട്‌സ് ആപ്പ് അക്കൗണ്ട് തയാറാക്കിയിരിക്കുന്നത്
കാസര്‍കോട്: കാസര്‍കോട് ജില്ലാ കലക്ടര്‍ കെ ഇമ്പശേഖറിന്റെ പേരില്‍ വ്യാജ വാട്‌സ് ആപ്പ് അക്കൗണ്ട്. വിയറ്റ് നാമിലെ ഫോണ്‍ നമ്പര്‍ ഉപയോഗിച്ചാണ് വ്യാജ വാട്‌സ് ആപ്പ് അക്കൗണ്ട് തയാറാക്കിയിരിക്കുന്നത്. ഈ അക്കൗണ്ടില്‍ നിന്നും പണം ആവശ്യപ്പെട്ടു കൊണ്ടുള്ള സന്ദേശം പലര്‍ക്കും ലഭിച്ചിട്ടുണ്ട്.
ജില്ലാ കലക്ടറുടെ പേരിലാണ് പണം ആവശ്യപ്പെടുന്നത്. സംഭവത്തെ തുടര്‍ന്ന് ജാഗ്രത പാലിക്കണമെന്ന് ജില്ലാ കലക്ടര്‍ കെ ഇമ്പശേഖര്‍ അറിയിച്ചു. അടിയന്തര നടപടിക്ക് പൊലീസിന് നിര്‍ദ്ദേശം നല്‍കിയിട്ടുണ്ടെന്നും സൈബര്‍ കുറ്റകൃത്യം നടത്തുന്നവര്‍ക്കെതിരെ കര്‍ശന നടപടി സ്വീകരിക്കുമെന്നും കലക്ടര്‍ വ്യക്തമാക്കി.
ഉദ്യോഗസ്ഥര്‍ക്ക് 'ഹൗ ആര്‍ യു ഡൂയിങ്? വെയര്‍ ആര്‍ യു അറ്റ് ദ് മൊമന്റ്' എന്ന സന്ദേശമാണ് ആദ്യം ലഭിച്ചത്. ചിലരെങ്കിലും കലക്ടര്‍ ആണെന്ന് തെറ്റിദ്ധരിച്ച് സന്ദേശത്തിന് മറുപടി നല്‍കിയിട്ടുണ്ട്. സന്ദേശത്തില്‍ സംശയം തോന്നിയ ഉദ്യോഗസ്ഥര്‍ ഓഫീസുമായി ബന്ധപ്പെട്ടപ്പോഴാണ് വ്യാജ സന്ദേശം അയച്ച് പണം തട്ടാന്‍ ശ്രമിക്കുകയാണെന്ന് അറിഞ്ഞത്.
