തദ്ദേശ തിരഞ്ഞെടുപ്പ് സുഗമമായി നടത്തുന്നതിനാവശ്യമായ ക്രമീകരണങ്ങള്‍ വരുത്താന്‍ ജില്ലാ കലക്ടര്‍മാര്‍ക്ക് നിര്‍ദ്ദേശം നല്‍കി തിരഞ്ഞെടുപ്പ് കമ്മീഷണര്‍
ചീഫ് ഇലക്ടറല്‍ ഓഫീസര്‍ ഡോ.രത്തന്‍ യു ഖേല്‍ക്കറുടെ സാന്നിധ്യത്തില്‍ വിളിച്ചു ചേര്‍ത്ത ജില്ലാ കലക്ടര്‍മാരുടെ ഓണ്‍ലൈന്‍ യോഗത്തിലാണ് കമ്മീഷണറുടെ നിര്‍ദ്ദേശം
കാസര്‍കോട്: തദ്ദേശ തിരഞ്ഞെടുപ്പ് സുഗമമായി നടത്തുന്നതിനാവശ്യമായ ക്രമീകരണങ്ങള്‍ വരുത്താന്‍ ജില്ലാ കലക്ടര്‍മാര്‍ക്ക് നിര്‍ദ്ദേശം നല്‍കി സംസ്ഥാന തിരഞ്ഞെടുപ്പ് കമ്മീഷണര്‍ എ.ഷാജഹാന്‍. ചീഫ് ഇലക്ടറല്‍ ഓഫീസര്‍ ഡോ.രത്തന്‍ യു ഖേല്‍ക്കറുടെ സാന്നിധ്യത്തില്‍ വിളിച്ചു ചേര്‍ത്ത ജില്ലാ കലക്ടര്‍മാരുടെ ഓണ്‍ലൈന്‍ യോഗത്തിലാണ് കമ്മീഷണറുടെ നിര്‍ദ്ദേശം.
തദ്ദേശ പൊതുതിരഞ്ഞെടുപ്പ് പ്രവര്‍ത്തനങ്ങള്‍ക്ക് യാതൊരു തടസ്സവുമുണ്ടാകാത്ത രീതിയില്‍ വേണം വോട്ടര്‍പട്ടിക തീവ്രപരിഷ്‌ക്കരണ പ്രവര്‍ത്തനങ്ങള്‍ നടത്താനെന്ന് ചീഫ് ഇലക്ടറല്‍ ഓഫീസര്‍ ജില്ലാകലക്ടര്‍മാരോട് ആവശ്യപ്പെട്ടു. സംസ്ഥാന തിരഞ്ഞെടുപ്പ് കമ്മീഷന്‍ ആവശ്യപ്പെട്ട വിഭാഗം ജീവനക്കാരെ ഒഴിവാക്കി, മറ്റ് ജീവനക്കാരെ ജില്ലാ കലക്ടര്‍മാര്‍ക്ക് ബി.എല്‍.ഒ മാരായി നിയമിക്കുന്നതിന് തടസ്സമൊന്നുമില്ലെന്ന് ചീഫ് ഇലക്ടറല്‍ ഓഫീസര്‍ യോഗത്തില്‍ പറഞ്ഞു.
രണ്ട് ഭരണഘടനാ സ്ഥാപനങ്ങളുടെയും ഭരണഘടനാപരമായ ബാധ്യതയാണ് വോട്ടര്‍പട്ടിക തയ്യാറാക്കലും, തിരഞ്ഞെടുപ്പ് നടത്തിപ്പും. അവ രണ്ടും തടസ്സമില്ലാതെ സുഗമമായി നടത്തേണ്ടതാണെന്ന് സംസ്ഥാന തിരഞ്ഞെടുപ്പ് കമ്മീഷണര്‍ നിര്‍ദ്ദേശിച്ചു.
തദ്ദേശ തിരഞ്ഞെടുപ്പും തീവ്ര വോട്ടര്‍ പട്ടിക പരിശോധനയും തടസ്സം കൂടാതെ നടത്താനാവശ്യമായ ക്രമീകരണങ്ങള്‍ ജില്ലാതലത്തില്‍ സ്വീകരിക്കുമെന്ന് കലക്ടര്‍മാര്‍ യോഗത്തില്‍ അറിയിച്ചു. യോഗത്തില്‍ പതിനാല് ജില്ലകളിലെയും കലക്ടര്‍മാര്‍ പങ്കെടുത്തു.
