രോഗിയേയും കൊണ്ട് ആസ്പത്രിയില്‍ നിന്നും മടങ്ങുന്നതിനിടെ ഓട്ടോ റിക്ഷയ്ക്ക് പിന്നില്‍ കാറിടിച്ച് ഡ്രൈവര്‍ മരിച്ചു
ഷേണി ബാരെദളയിലെ നാരായണ മൂല്യയാണ് മരിച്ചത്
പെര്‍ള: ഓട്ടോ റിക്ഷയ്ക്ക് പിന്നില്‍ കാറിടിച്ചുണ്ടായ അപകടത്തില്‍ ഡ്രൈവര്‍ മരിച്ചു. ഷേണി ബാരെദളയിലെ നാരായണ മൂല്യ(67)യാണ് മരിച്ചത്. ബുധനാഴ്ച രാത്രി ഒന്‍പത് മണിയോടെ പെര്‍ള കജംപാടി ആസ്പത്രിക്ക് സമീപമാണ് അപകടം നടന്നത്. ഷേണിയില്‍ നിന്നും പെര്‍ളയിലെ സ്വകാര്യ ആസ്പത്രിയിലേക്ക് രോഗിയേയും കൊണ്ടുവന്ന് മടങ്ങുന്നതിനിടെ പിന്നില്‍ നിന്നും വന്ന കാര്‍ ഇടിക്കുകയായിരുന്നു.
ഇടിയുടെ ആഘാതത്തില്‍ ഓട്ടോറിക്ഷ നിയന്ത്രണം വിട്ട് മറിയുകയായിരുന്നു. ഉടനെ കാസര്‍കോട്ടെ ആസ്പത്രിയില്‍ എത്തിച്ചുവെങ്കിലും വഴി മധ്യേ മരിക്കുകയായിരുന്നു. ഷേണി സ്‌കൂളിന് സമീപത്തെ ഓട്ടോ സ്റ്റാന്റിലെ ഡ്രൈവറും ഷേണി അയ്യപ്പ ഭജന മന്ദിരത്തിലെ ഗുരു സ്വാമിയുമാണ് നാരായണ മൂല്യ. ഭാര്യ: ഗിരിജ. മക്കള്‍: യോഗീഷ, സുരേന്ദ്ര, ഹരീഷ. മരുമക്കള്‍: ശാരദ, പുഷ്പ, ഗീത. ബദിയടുക്ക പൊലീസ് ഇന്‍ക്വസ്റ്റ് നടത്തി. സംഭവത്തില്‍ കാര്‍ ഡ്രൈവര്‍ക്കെതിരെ ബദിയടുക്ക പൊലീസ് കേസെടുത്തു.
