ആരിക്കാടി ടോള്‍ ഗേറ്റ്: തിങ്കളാഴ്ച അപ്പീലില്‍ വിധി പറയും
കുമ്പള: ദേശീയ പാത 66ല്‍ കുമ്പള ആരിക്കാടിയിലെ ടോള്‍ ഗേറ്റ് നിര്‍മാണത്തിനെതിരെ കര്‍മസമിതി ഡിവിഷന്‍ ബെഞ്ചില്‍ സമര്‍പ്പിച്ച അപ്പീലില്‍ വിധി പറയുന്നത് സെപ്തംബര്‍ 15 തിങ്കളാഴ്ചത്തേക്ക് മാറ്റി. അപ്പീല്‍ പരിഗണിച്ച ഹൈക്കോടതി , ദേശീയ പാച അതോറിറ്റിക്ക് ടോള്‍ പിരിക്കുന്നതിനുള്ള അനുമതി ഇതുവരെ ലഭിച്ചിട്ടില്ലെന്നും ആരിക്കാടിയിലേത് അനധികൃത നിര്‍മാണമാണെങ്കില്‍ പൊളിച്ചുമാറ്റാന്‍ നിര്‍ദേശം നല്‍കുമെന്നും പരാമര്‍ശിച്ചു. കര്‍മസമിതിക്ക് വേണ്ടി അഭിഭാഷകനായ ജി ശ്രീകുമാര്‍ ഹാജരായി.
ആരിക്കാടിയില്‍ ടോള്‍ ഗേറ്റ് നിര്‍മാണത്തിനെതിരെ വ്യാപക പ്രതിഷേധമാണ് ഉയരുന്നത്. ഹൈക്കോടതി സിംഗിള്‍ ബെഞ്ചില്‍ നിന്ന് ദേശീയപാത അതോറിറ്റിക്ക് അനുകൂല വിധി ഉണ്ടായതിന് പിന്നാലെ നിര്‍മാണ പ്രവൃത്തി ടോള്‍ കമ്പനി തുടരുകയായിരുന്നു. ഇതിനിടെയാണ് കര്‍മസമിതി ഡിവിഷന്‍ ബെഞ്ചില്‍ അപ്പീല്‍ നല്‍കിയത്.
ടോള്‍ ഗേറ്റിനെതിരെ പ്രതിഷേധം ശക്തമാക്കുന്നതിന്റെ ഭാഗമായി മഞ്ചേശ്വരം നിയോജക മണ്ഡലത്തിലെ വിവിധ പഞ്ചായത്തുകളിലെ ജനപ്രതിനിധികള്‍, കാസര്‍കോട് നഗരസഭ, മൊഗ്രാല്‍ പുത്തൂര്‍, ബദിയടുക്ക ഗ്രാമ പഞ്ചായത്തിലെ പ്രതിനിധികള്‍ എന്നിവരെ ഉള്‍പ്പെടുത്തി കര്‍മസമിതി വിപുലീകരിച്ചിരിക്കുകയാണ്. ടോള്‍ ഗേറ്റ് സംബന്ധിച്ച് ഹൈക്കോടതിയില്‍ നിന്ന് അന്തിമ വിധി വരുന്നതുവരെ നിര്‍മാണ പ്രവൃത്തി തുടങ്ങില്ല എന്നായിരുന്നു കമ്പനി നേരത്തെ അറിയിച്ചത്. എന്നാല്‍ കര്‍മസമിതിയുടെ അപ്പീല്‍ പരിഗണിക്കാനിരിക്കെ നിര്‍മാണ പ്രവൃത്തിയുമായി കമ്പനി മുന്നോട്ടുപോവുകയായിരുന്നു. ദേശീയ പാത ചട്ടപ്രകാരം 60 കിലോ മീറ്റര്‍ അകലെ നിര്‍മിക്കേണ്ട ടോള്‍ ഗേറ്റ് 23 കിലോ മീറ്റര്‍ പരിധിയില്‍ നിര്‍മിക്കുന്നതിനെതിരെയാണ് പ്രതിഷേധം.
