ആന്റി ഡിഫേസ്‌മെന്റ് സ്‌ക്വാഡ് ജില്ലയില്‍ ഇന്ന് നീക്കം ചെയ്തത് 17 കൊടികളും 7 പ്രചരണബോര്‍ഡുകളും പോസ്റ്ററുകളും
നിയമവിരുദ്ധമായി പ്രചരണത്തിനുപയോഗിച്ചതിനാലാണ് ഇവ നീക്കം ചെയ്തത്
കാസര്‍കോട്: തദ്ദേശ തിരഞ്ഞെടുപ്പ് പ്രചരണ പ്രവര്‍ത്തനങ്ങളുടെ ഭാഗമായി ജില്ലയിലെ വിവിധ ഭാഗങ്ങളില്‍ നിന്ന് നിയമവിരുദ്ധമായി പ്രചരണത്തിനുപയോഗിച്ച വിവിധ രാഷ്ട്രീയ പാര്‍ട്ടികളുടെ 17 കൊടികളും ഏഴ് പ്രചരണബോര്‍ഡുകളും ഏഴ് പോസ്റ്ററുകളും നീക്കം ചെയ്തു. മഞ്ചേശ്വരം താലൂക്കിലെ കുമ്പള, പുത്തിഗെ ഗ്രാമ പഞ്ചായത്തിലെ വിവിധ പ്രദേശങ്ങളില്‍ പൊതുസ്ഥലത്ത് സ്ഥാപിച്ച മൂന്ന് കൊടികളും കാസര്‍കോട് താലൂക്കിലെ മധുര്‍ ഗ്രാമപഞ്ചായത്ത് പരിധിയില്‍ നിന്ന് രണ്ട് കൊടികളും ഹോസ്ദുര്‍ഗ് താലൂക്കിലെ നീലേശ്വരം മുനിസിപ്പാലിറ്റി, ചെറുവത്തൂര്‍, പടന്ന, തൃക്കരിപ്പൂര്‍ പഞ്ചായത്ത് പരിധികളില്‍ നിന്ന് 12 കൊടികളും ഏഴ് പ്രചരണബോര്‍ഡുകളും ഏഴ് പോസ്റ്ററുകളുമാണ് നീക്കം ചെയ്തത്.
മൂന്നു താലൂക്കുകളിലെയും ആന്റി ഡിഫേസ്‌മെന്റ് സ്‌ക്വാഡിന്റെ ചുമതലയുള്ള ഭൂരേഖ തഹസില്‍ദാര്‍ ടി.പി ഷമീര്‍, സ്യൂട്ട് സെക്ഷന്‍ സീനിയര്‍ സൂപ്രണ്ട് വി. ശ്രീകുമാര്‍, എല്‍.എ പിഡബ്ല്യുഡി സ്‌പെഷ്യല്‍ തഹസില്‍ദാര്‍ പി. പ്രമോദ് എന്നിവരടങ്ങുന്ന സംഘമാണ് പ്രവര്‍ത്തനങ്ങള്‍ക്ക് നേതൃത്വം നല്‍കിയത്.
