ഇന്നത്തെ മോക്ഡ്രില്‍ എങ്ങനെ? എന്ത് ചെയ്യണം?
യുദ്ധസമാനമായ സാഹചര്യം മുന്നില്‍ക്കണ്ട് പൊതുജനങ്ങളും ഉദ്യോഗസ്ഥരും മറ്റ് സേനാംഗങ്ങളും എന്തൊക്കെ മുന്‍കരുതലുകള്‍ സ്വീകരിക്കണം എന്നത് സംബന്ധിച്ച് മുന്നറിയിപ്പ് നല്‍കാനാണ് മോക് ഡ്രില്‍ സംഘടിപ്പിക്കുന്നത്
- ഇന്ന് വൈകീട്ട് നാലിനാണ് മോക്ഡ്രില്‍
- ആക്രമണമുണ്ടായാല്‍ എങ്ങനെ സ്വയം സുരക്ഷ ഉറപ്പാക്കാം എന്ന് മോക്ഡ്രില്ലിലൂടെ അറിയിക്കും
- ആംബുലന്‍സുകളും ആശുപത്രികളും സാഹചര്യത്തെ നേരിടാന്‍ സജ്ജമാകും
- ജില്ലാ കളക്ടറും ഫയര്‍ ഓഫീസറും നേതൃത്വം നല്‍കും
- പൊതുസ്ഥലങ്ങളില്‍ ആദ്യം എമര്‍ജന്‍സി സൈറണ്‍ മുഴങ്ങും
- ശത്രുരാജ്യം വ്യോമാക്രമണം നടത്താന്‍ ശ്രമിച്ചാല്‍ നല്‍കുന്ന മുന്നറിയിപ്പ് സംവിധാനമാണിത്.
- എയര്‍ റെയ്ഡ് വാണിംഗ് എന്നാണ് ഇത് അറിയപ്പെടുന്നത്.
- ഈ സൈറണ്‍ മുഴങ്ങിയാല്‍ ജനങ്ങള്‍ സുരക്ഷിത ഇടങ്ങളിലേക്ക് മാറണം
- കെട്ടിടത്തിലുള്ളവര്‍ ബെയ്‌സ്‌മെന്റിലേക്കും മറ്റ് ടേബിളിന്റെ താഴേക്കും മാറണം
- തുറസ്സായ സ്ഥലത്തുള്ളവര്‍ നില്‍ക്കാന്‍ പാടില്ല
- ജനങ്ങളെ സഹായിക്കാന്‍ സുരക്ഷാ ഉദ്യോഗസ്ഥരുണ്ടാവും.
- കുറച്ച് നേരത്തേക്ക് വൈദ്യുതി നിലച്ചേക്കാം ഒപ്പം മറ്റ് സിഗ്നലുകള്‍ക്കും തടസ്സം നേരിടാം
സിവില്‍ ഡിഫന്‍സ് മോക്ക് ഡ്രില്ലുമായി ബന്ധപ്പെട്ട് വിവിധ നിര്‍ദ്ദേശങ്ങള്‍ പാലിക്കണമെന്ന് അധികൃതര്‍ അറിയിച്ചു. റസിഡന്റ്‌സ് അസോസിയേഷനുകളും പഞ്ചായത്തുകളും (വാര്‍ഡ് തലത്തില്‍) മോക്ക് ഡ്രില്‍ വാര്‍ഡന്മാരെ നിയോഗിക്കുക, എല്ലാ പ്രദേശവാസികള്‍ക്കും സിവില്‍ ഡിഫന്‍സ് ബ്ലാക്ക്ഔട്ട് നിര്‍ദ്ദേശങ്ങള്‍ എത്തിക്കുക, ആവശ്യമെങ്കില്‍ ആരാധനാലയങ്ങളിലെ അനൗണ്‍സ്‌മെന്റ് സംവിധാനങ്ങള്‍ ഉപയോഗിച്ച് അലര്‍ട്ട് ചെയ്യുക, വാര്‍ഡുതല ഡ്രില്ലുകള്‍ സംഘടിപ്പിക്കുക, സ്‌കൂളുകളിലും ബേസ്‌മെന്റുകളിലും കമ്മ്യൂണിറ്റി ഹാളുകളിലും മറ്റു പ്രധാന ഇടങ്ങളിലും പ്രഥമശുശ്രൂഷ കിറ്റുകള്‍ തയ്യാറാക്കുക, കമ്മ്യൂണിറ്റി വോളന്റിയര്‍മാര്‍ സഹായം ആവശ്യമുള്ള ആളുകളെ ബ്ലാക്ക്ഔട്ട് സമയത്ത് സഹായിക്കുക, കെട്ടിടങ്ങള്‍ക്കുള്ളില്‍ തന്നെ ഇരിക്കുക, ആശങ്ക ഒഴിവാക്കുക, വീടുകളില്‍ മോക്ക് ഡ്രില്‍ സമയത്ത് എല്ലാ ലൈറ്റുകളും ഓഫ് ചെയ്യുക, ജനാലകളുടെ സമീപം മൊബൈല്‍ ഫോണുകളോ പ്രകാശം പുറപ്പെടുവിക്കുന്ന ഉപകരണങ്ങളോ ഉപയോഗിക്കുന്നത് ഒഴിവാക്കുക, ബാറ്ററി/സോളാര്‍ ടോര്‍ച്ചുകള്‍, ഗ്ലോ സ്റ്റിക്കുകള്‍, റേഡിയോ എന്നിവ കരുതുക, സൈറന്‍ മുഴങ്ങുമ്പോള്‍ എല്ലായിടങ്ങളിലെയും (വീടുകള്‍, ഓഫീസുകള്‍, മറ്റു സ്ഥാപനങ്ങള്‍ ഉള്‍പ്പെടെ) അകത്തെയും പുറത്തെയും ലൈറ്റുകള്‍ ഓഫ് ചെയ്യുക, പ്രഥമശുശ്രൂഷ കിറ്റുകള്‍ തയ്യാറാക്കുക, ഇതില്‍ മരുന്നുകള്‍, ടോര്‍ച്ച്, വെള്ളം, ഡ്രൈ ഫുഡ് എന്നിവ ഉള്‍പ്പെടുത്തുക, വീടിനുള്ളിലെ ഏറ്റവും സുരക്ഷിതമായ സ്ഥലം കണ്ടെത്തുക, ബ്ലാക്ക് ഔട്ട് സമയത്ത് അവിടേക്ക് മാറുക, കുടുംബാംഗങ്ങള്‍ ഒരുമിച്ച് 'ഫാമിലി ഡ്രില്‍' നടത്തുക, ദീര്‍ഘമായ സൈറന്‍ മുന്നറിയിപ്പും ചെറിയ സൈറന്‍ സുരക്ഷിതമാണെന്ന അറിയിപ്പുമാണെന്ന് മനസിലാക്കുക, പൊതുസ്ഥലങ്ങളില്‍ നില്‍ക്കുന്നവര്‍ സുരക്ഷിതത്വത്തിനായി അടുത്തുള്ള കെട്ടിടങ്ങള്‍ക്കുള്ളിലേക്ക് മാറുക, ഔദ്യോഗിക വിവരങ്ങള്‍ മനസ്സിലാക്കുന്നതിന് റേഡിയോ/ടി.വി ഉപയോഗിക്കുക, തീപിടിത്തം ഒഴിവാക്കാന്‍ ബ്ലാക്ക് ഔട്ട് സൈറണ്‍ കേള്‍ക്കുമ്പോള്‍ തന്നെ ഗ്യാസ്/വൈദ്യുത ഉപകരണങ്ങള്‍ ഓഫ് ചെയ്യുക തുടങ്ങിയ നിര്‍ദ്ദേശങ്ങളാണ് അധികൃതര്‍ നല്‍കിയിട്ടുള്ളത്.
