കനത്ത മഴ: മൊണ്ടെപദവില്‍ മണ്ണിടിച്ചിലില്‍ ഒരു കുട്ടി മരിച്ചു; കുടുംബം മണ്ണിനടിയില്‍ കുടുങ്ങി
കനത്ത മഴയില്‍ ഉള്ളാള്‍ താലൂക്കിലുടനീളമുള്ള നിരവധി വീടുകള്‍ വെള്ളത്തിനടിയിലായി
മംഗളൂരു: കഴിഞ്ഞ കുറച്ച് ദിവസങ്ങളായി തുടര്‍ച്ചയായി പെയ്യുന്ന മഴയില്‍ ബെല്ലുഗ്രാമയ്ക്കടുത്തുള്ള കനകരെയില്‍ ഉണ്ടായ മണ്ണിടിച്ചിലില്‍ ഒരു കുട്ടി മരിച്ചു. കുട്ടിയുടെ കുടുംബം മണ്ണിനടിയില്‍ കുടുങ്ങി. കനകരെയിലെ നൗഷാദിന്റെ മകള്‍ നയീമയാണ് മരിച്ചത്.
നൗഷാദിന്റെ വീടിന് പിന്നിലെ കുന്നും സംരക്ഷണ ഭിത്തിയും തകര്‍ന്ന് മതിലിന്റെ ഒരു ഭാഗം ജനാല തകര്‍ത്ത് മുറിയില്‍ ഉറങ്ങിക്കിടക്കുകയായിരുന്ന കുട്ടിയുടെ മേല്‍ ഇടിഞ്ഞുവീഴുകയായിരുന്നു. മണ്ണിനടിയില്‍ കുടുങ്ങിയ കുടുംബത്തെ രക്ഷപ്പെടുത്താനുള്ള ശ്രമം നടന്നുവരികയാണ്.
മൊണ്ടെപദവിലെ മറ്റൊരു സംഭവത്തില്‍, മണ്ണിടിച്ചിലില്‍ മൂന്ന് പേര്‍ മണ്ണിനടിയില്‍ കുടുങ്ങിയതായുള്ള റിപ്പോര്‍ട്ടുകളും പുറത്തുവരുന്നുണ്ട്. ഉദ്യോഗസ്ഥര്‍ സ്ഥലത്തെത്തി നിലവില്‍ സ്ഥിതിഗതികള്‍ വിലയിരുത്തി വരുന്നു.
കനത്ത മഴയില്‍ ഉള്ളാള്‍ താലൂക്കിലുടനീളമുള്ള നിരവധി വീടുകള്‍ വെള്ളത്തിനടിയിലായി, ഇത് ദൈനംദിന ജീവിതത്തെ സാരമായി ബാധിച്ചു. കുമ്പള, കല്ലാപ്പു, ധര്‍മ്മനഗര, ഉച്ചില, തലപ്പാടി, വിദ്യാനഗര്‍, കല്‍ക്കട്ട എന്നിവയുള്‍പ്പെടെയുള്ള പ്രദേശങ്ങളില്‍ വെള്ളപ്പൊക്കം റിപ്പോര്‍ട്ട് ചെയ്തിട്ടുണ്ട്. വെള്ളം വീടുകളിലേക്ക് കയറി നിരവധി കുടുംബങ്ങളെ രാത്രിയില്‍ മാറ്റിപ്പാര്‍പ്പിക്കേണ്ടി വന്നു.
കല്ലാപ്പില്‍ മാത്രം 50 ലധികം വീടുകളെ വെള്ളക്കെട്ട് ബാധിച്ചിട്ടുണ്ട്. തലപ്പാടിയില്‍, ഒരു വീടിനുള്ളില്‍ വെള്ളം കയറിയതിനെ തുടര്‍ന്ന് സാരമായ കേടുപാടുകള്‍ സംഭവിച്ചു. കുടുംബത്തെ രാത്രിയില്‍ തന്നെ മാറ്റിപ്പാര്‍പ്പിച്ചു.
ഉള്ളാള്‍ താലൂക്ക് തഹസില്‍ദാര്‍ പുട്ടരാജു, റവന്യൂ ഇന്‍സ്‌പെക്ടര്‍ പ്രമോദ്, സോമേശ്വര ടൗണ്‍ മുനിസിപ്പല്‍ ചീഫ് ഓഫീസര്‍ മട്ടാടി, വില്ലേജ് അക്കൗണ്ടന്റ് സുരേഷ്, മറ്റ് ഉദ്യോഗസ്ഥര്‍ എന്നിവര്‍ രാത്രിയില്‍ ദുരിതബാധിത പ്രദേശങ്ങള്‍ സന്ദര്‍ശിച്ച് പരിശോധനകള്‍ നടത്തി.
