സോഷ്യല്‍ മീഡിയയിലൂടെ വ്യാജ വാര്‍ത്തകള്‍ പ്രചരിപ്പിക്കുന്നവര്‍ക്ക് 7 വര്‍ഷം വരെ തടവും 10 ലക്ഷം രൂപ പിഴയും ശിക്ഷ നല്‍കാനുള്ള നിയമം കൊണ്ടുവരാന്‍ കര്‍ണാടക സര്‍ക്കാര്‍
സംസ്ഥാന നിയമസഭയുടെ വരാനിരിക്കുന്ന സമ്മേളനത്തില്‍ ഇത് അവതരിപ്പിക്കുമെന്ന് പ്രതീക്ഷിക്കുന്നു
ബെംഗളൂരു: സോഷ്യല്‍ മീഡിയയിലൂടെ വ്യാജ വാര്‍ത്തകള്‍ പ്രചരിപ്പിക്കുന്നവര്‍ക്ക് 7 വര്‍ഷം വരെ തടവും 10 ലക്ഷം രൂപ പിഴയും ശിക്ഷ നല്‍കാന്‍ ഒരുങ്ങി കര്‍ണാടക സര്‍ക്കാര്‍. രാജ്യത്തെ ഏറ്റവും കര്‍ശനമായ നിയമങ്ങളിലൊന്നാണ് ഇതുവഴി കര്‍ണാടക സര്‍ക്കാര്‍ നടപ്പാക്കാന്‍ ഒരുങ്ങുന്നത്.
2025 ലെ നിര്‍ദ്ദിഷ്ട കര്‍ണാടക വ്യാജ വാര്‍ത്തകളും തെറ്റായ വിവരങ്ങളും (നിരോധന) ബില്‍ പ്രകാരം, ഓണ്‍ലൈനില്‍ മനഃപൂര്‍വ്വമോ അശ്രദ്ധമായോ തെറ്റായ വിവരങ്ങള്‍ പ്രചരിപ്പിച്ചതിന് കുറ്റക്കാരാണെന്ന് കണ്ടെത്തിയ വ്യക്തികള്‍ക്ക് ഏഴ് വര്‍ഷം വരെ തടവോ പത്ത് ലക്ഷം രൂപ വരെ പിഴയോ അല്ലെങ്കില്‍ രണ്ടും കൂടിയോ ലഭിക്കാം.
ജൂണ്‍ 19 ന് നിയമ-പാര്‍ലമെന്ററി കാര്യ മന്ത്രി എച്ച് കെ പാട്ടീലിന്റെ അധ്യക്ഷതയില്‍ നടന്ന സംസ്ഥാന മന്ത്രിസഭാ യോഗത്തില്‍ ഇതുസംബന്ധിച്ച കരട് ബില്‍ ഔദ്യോഗികമായി ചര്‍ച്ച ചെയ്തു. കര്‍ണാടക സംസ്ഥാന നിയമസഭയുടെ വരാനിരിക്കുന്ന സമ്മേളനത്തില്‍ ഇത് അവതരിപ്പിക്കുമെന്ന് പ്രതീക്ഷിക്കുന്നു. നിയമം പ്രാബല്യത്തില്‍ വന്നാല്‍, വാട്ട് സ് ആപ്പ്, ഫേസ് ബുക്ക്, എക്‌സ് (മുമ്പ് ട്വിറ്റര്‍), ഇന്‍സ്റ്റാഗ്രാം, യൂട്യൂബ് തുടങ്ങിയ പ്ലാറ്റ് ഫോമുകളിലൂടെ പ്രചരിപ്പിക്കുന്ന ഉള്ളടക്കത്തിന് നിയമം ബാധകമാകും.
വ്യാജ വാര്‍ത്തകളെ വിശാലമായി നിര്‍വചിക്കുന്നത് നിര്‍ദ്ദിഷ്ട നിയമനിര്‍മ്മാണത്തിലാണ്. പ്രസ്താവനകളെ വളച്ചൊടിക്കുകയോ തെറ്റായി അവതരിപ്പിക്കുകയോ ചെയ്യുക, വ്യാജ ഓഡിയോ അല്ലെങ്കില്‍ വീഡിയോ പ്രസിദ്ധീകരിക്കുക, പൂര്‍ണ്ണമായും കെട്ടിച്ചമച്ചതോ സാങ്കല്‍പ്പികമോ ആയ വിവരണങ്ങളുടെ പ്രചരണം എന്നിവ ഇതില്‍ ഉള്‍പ്പെടുന്നു. ഡ്രാഫ്റ്റ് അനുസരിച്ച് തെറ്റായ വിവരങ്ങള്‍ എന്നത് മനഃപൂര്‍വ്വമോ അശ്രദ്ധയിലൂടെയോ തെറ്റായതോ തെറ്റിദ്ധരിപ്പിക്കുന്നതോ ആയ അവകാശവാദങ്ങള്‍ പ്രചരിപ്പിക്കുന്നതിനെയാണ് സൂചിപ്പിക്കുന്നത്.
അത്തരം ഉള്ളടക്കം പൊതുജനാരോഗ്യം, സുരക്ഷ, സാമുദായിക ഐക്യം അല്ലെങ്കില്‍ തിരഞ്ഞെടുപ്പ് സമഗ്രത എന്നിവയെ ബാധിക്കുന്നതായി കണ്ടെത്തിയാല്‍, കുറ്റവാളികള്‍ക്ക് രണ്ട് മുതല്‍ അഞ്ച് വര്‍ഷം വരെ തടവും പിഴയും ശിക്ഷയായി നേരിടേണ്ടിവരും. അത്തരം ഉള്ളടക്കം പ്രചരിപ്പിക്കാന്‍ സഹായിക്കുന്ന വ്യക്തികള്‍ക്ക് രണ്ട് വര്‍ഷം വരെ തടവും ലഭിക്കും.
പുതിയ നിയമം നടപ്പിലാക്കുന്നതിനായി, ഒരു സോഷ്യല്‍ മീഡിയ റെഗുലേറ്ററി അതോറിറ്റിയെ രൂപീകരിക്കാന്‍ സര്‍ക്കാര്‍ പദ്ധതിയിടുന്നു. കന്നഡ, സാംസ്‌കാരിക, ഇന്‍ഫര്‍മേഷന്‍ ആന്‍ഡ് ബ്രോഡ് കാസ്റ്റിംഗ് മന്ത്രി അധ്യക്ഷനാകും. ഒരു എംഎല്‍എ, ഒരു എംഎല്‍സി, സോഷ്യല്‍ മീഡിയ പ്ലാറ്റ് ഫോമുകളില്‍ നിന്നുള്ള രണ്ട് പ്രതിനിധികള്‍, സെക്രട്ടറിയായി പ്രവര്‍ത്തിക്കുന്ന ഒരു ഐഎഎസ് ഉദ്യോഗസ്ഥന്‍ എന്നിവര്‍ അതോറിറ്റിയില്‍ ഉള്‍പ്പെടും. ഡിജിറ്റല്‍ ഉള്ളടക്കം നിരീക്ഷിക്കുന്നതിനും നിര്‍ദ്ദേശങ്ങള്‍ പുറപ്പെടുവിക്കുന്നതിനും എന്‍ഫോഴ് സ് മെന്റ് നടപടികള്‍ ഏകോപിപ്പിക്കുന്നതിനും അതോറിറ്റി ഉത്തരവാദിയായിരിക്കും.
കൂടാതെ, വ്യാജ വാര്‍ത്തകളുമായി ബന്ധപ്പെട്ട കുറ്റകൃത്യങ്ങള്‍ തീര്‍പ്പാക്കുന്നതിന് കര്‍ണാടക ഹൈക്കോടതിയുടെ അംഗീകാരത്തോടെ പ്രത്യേക ഫാസ്റ്റ് ട്രാക്ക് കോടതികള്‍ സ്ഥാപിക്കും. സോഷ്യല്‍ മീഡിയ പ്ലാറ്റ് ഫോമുകള്‍ക്കും പ്രക്ഷേപകര്‍ക്കും നിര്‍ബന്ധിത നിര്‍ദ്ദേശങ്ങള്‍ നല്‍കാന്‍ ഈ കോടതികള്‍ക്ക് അധികാരം നല്‍കും.
ഏതെങ്കിലും പ്ലാറ്റ് ഫോം കോടതി ഉത്തരവുകള്‍ പാലിക്കുന്നതില്‍ പരാജയപ്പെട്ടാല്‍, അവര്‍ക്ക് രണ്ട് വര്‍ഷം വരെ തടവും 25,000 രൂപ ദിവസേന പിഴയും ലഭിക്കും, പരമാവധി പിഴ 25 ലക്ഷം രൂപ വരെ.
സ്ത്രീകളെ അനാദരിക്കുന്ന, മതചിഹ്നങ്ങളെ അപമാനിക്കുന്ന, അല്ലെങ്കില്‍ അന്ധവിശ്വാസത്തെ പ്രോത്സാഹിപ്പിക്കുന്ന ഉള്ളടക്കത്തിന് ബില്‍ കര്‍ശന നിയന്ത്രണങ്ങള്‍ ഏര്‍പ്പെടുത്തുന്നു. കൂടാതെ, ശാസ്ത്രം, ചരിത്രം, മതം, തത്ത്വചിന്ത, സാഹിത്യം എന്നിവയുമായി ബന്ധപ്പെട്ട പോസ്റ്റുകള്‍ സ്ഥിരീകരിച്ച ഗവേഷണത്തെയോ ആധികാരിക സ്രോതസ്സുകളെയോ അടിസ്ഥാനമാക്കിയുള്ളതായിരിക്കണമെന്ന് പുതിയ നിയമം അനുശാസിക്കുന്നു. ഡിജിറ്റല്‍ മേഖലയില്‍ കൃത്യവും തെളിവുകള്‍ അടിസ്ഥാനമാക്കിയുള്ളതുമായ സംവാദങ്ങള്‍ പ്രോത്സാഹിപ്പിക്കുന്നതിനാണ് ഈ വ്യവസ്ഥ കൊണ്ട് ഉദ്ദേശിക്കുന്നത്.
ഉള്ളടക്കത്തിന്റെ ഉത്തരവാദിത്തപരമായ പങ്കിടല്‍ പ്രോത്സാഹിപ്പിക്കുന്നതിനും പൊതുതാല്‍പ്പര്യം സംരക്ഷിക്കുന്നതിനുമാണ് ബില്‍ രൂപകല്‍പ്പന ചെയ്തിരിക്കുന്നതെന്ന് സര്‍ക്കാര്‍ വാദിക്കുമ്പോള്‍, പൗരസ്വാതന്ത്ര്യ ഗ്രൂപ്പുകള്‍ക്കിടയില്‍ ഇത് കാര്യമായ രാഷ്ട്രീയ എതിര്‍പ്പിനും ആശങ്കയ്ക്കും കാരണമായിട്ടുണ്ട്.
ഇന്ത്യയുടെ അടിയന്തരാവസ്ഥ കാലഘട്ടത്തിലെ സ്വേച്ഛാധിപത്യ നടപടികളുമായി ഉപമിച്ചുകൊണ്ട് പ്രതിപക്ഷമായ ബിജെപി ഈ നീക്കത്തെ ശക്തമായി വിമര്‍ശിച്ചുകൊണ്ട് രംഗത്തെത്തി. ബില്ലിന്റെ അവ്യക്തമായ നിര്‍വചനങ്ങളും വിശാലമായ വ്യാപ്തിയും വിയോജിപ്പുകളെ അടിച്ചമര്‍ത്തുന്നതിനോ പത്രപ്രവര്‍ത്തകരെയും വിസില്‍ ബ്ലോവര്‍മാരെയും ആക്ടിവിസ്റ്റുകളെയും ലക്ഷ്യം വയ്ക്കുന്നതിനോ ദുരുപയോഗം ചെയ്യാമെന്ന് അഭിപ്രായ സ്വാതന്ത്ര്യ വക്താക്കള്‍ വാദിക്കുന്നു.
കര്‍ണാടക ഈ വിവാദ നിയമനിര്‍മ്മാണം നടപ്പിലാക്കുന്നതിലേക്ക് അടുക്കുമ്പോള്‍, ബില്ലിന്റെ അന്തിമരൂപവും അതിന്റെ നിര്‍വ്വഹണ സംവിധാനങ്ങളും സംസ്ഥാനത്തുടനീളമുള്ള ഡിജിറ്റല്‍ ആവിഷ്‌കാരത്തിനും, രാഷ്ട്രീയ വ്യവഹാരത്തിനും, അഭിപ്രായ സ്വാതന്ത്ര്യത്തിനുള്ള മൗലികാവകാശത്തിനും ദൂരവ്യാപകമായ പ്രത്യാഘാതങ്ങള്‍ ഉണ്ടാക്കുമെന്നാണ് വലയിരുത്തല്‍.
