കണ്ണൂര്‍ സ്വദേശിയായ വ്യവസായിയെ വിരാജ് പേട്ടയിലെ താമസ സ്ഥലത്ത് കഴുത്തറുത്ത് കൊലപ്പെടുത്തിയ നിലയില്‍ കണ്ടെത്തി
കണ്ണൂര്‍ കൊയിലി ആശുപത്രി സ്ഥാപകന്‍ ഭാസ്‌കരന്റെ മകന്‍ പ്രദീപ് ആണ് മരിച്ചത്
കുടക്: കണ്ണൂര്‍ സ്വദേശിയായ വ്യവസായിയെ വിരാജ് പേട്ടയിലെ താമസ സ്ഥലത്ത് കഴുത്തറുത്ത് കൊലപ്പെടുത്തിയ നിലയില്‍ കണ്ടെത്തി. ചിറക്കല്‍ സ്വദേശി കൊയിലി പ്രദീപിനെയാണ് കര്‍ണാടകയിലെ കുടകിനു സമീപം വിരാജ് പേട്ടയില്‍ മരിച്ച നിലയില്‍ കണ്ടെത്തിയത്. ബുധനാഴ്ച ഉച്ച കഴിഞ്ഞ് 3 മണിയോടെ ബി.ഷെട്ടിഗേരിയിലെ കാപ്പിത്തോട്ടത്തിന് സമീപത്തെ വീട്ടില്‍ നിന്നാണ് മൃതദേഹം കണ്ടെത്തിയത്.
തോട്ടം തൊഴിലാളികളാണ് മൃതദേഹം ആദ്യം കണ്ടത്. തുടര്‍ന്ന് പൊലീസില്‍ വിവരം അറിയിക്കുകയായിരുന്നു. പൊലീസ് സ്ഥലത്തെത്തി ഇന്‍ക്വസ്റ്റ് നടപടികള്‍ക്ക് ശേഷം മൃതദേഹം ആശുപത്രിയിലേക്ക് മാറ്റി.
പ്രദീപിന്റെ 30 ഏക്കറോളം വരുന്ന തോട്ടത്തിനോടു ചേര്‍ന്നാണ് മൃതദേഹം കാണപ്പെട്ട വീടുള്ളത്. ഇവിടെയാണ് പ്രദീപ് താമസിച്ചിരുന്നതും. ഈ തോട്ടം വില്‍ക്കാനുള്ള ശ്രമങ്ങള്‍ അടുത്തിടെ നടന്നിരുന്നു. കൊലപാതകവുമായി ഇതിനു ബന്ധമുണ്ടോ എന്നും പൊലീസ് അന്വേഷിക്കുന്നുണ്ട്.
വിരാജ് പേട്ട താലൂക്ക് ആശുപത്രിയില്‍ സൂക്ഷിച്ചിരിക്കുന്ന മൃതദേഹം നടപടികള്‍ പൂര്‍ത്തിയാക്കി വ്യാഴാഴ്ച ബന്ധുക്കള്‍ക്ക് കൈമാറും. കണ്ണൂര്‍ കൊയിലി ആശുപത്രി സ്ഥാപകന്‍ ഭാസ്‌കരന്റെ മകനാണ് മരിച്ച പ്രദീപ്.
