വീട്ടില്‍ തനിച്ച് താമസിക്കുന്ന വയോധികനെ മരിച്ച നിലയില്‍ കണ്ടെത്തി

കാഞ്ഞങ്ങാട്: തനിച്ച് താമസിക്കുന്ന വയോധികനെ വീടിനുസമീപം മരിച്ച നിലയില്‍ കണ്ടെത്തി. മൃതദേഹത്തിന് ദിവസങ്ങളുടെ പഴക്കമുണ്ട്. കാലിച്ചാനടുക്കം മൂപ്പില്‍ എട്ടാം മൈലിലെ തോമസി (70)ന്റെ മൃതദേഹമാണ് വീടിന് പിറകുവശത്ത് കണ്ടത്.

കഴിഞ്ഞ മാസം 29നും ഈ മാസം 18 നും ഇടയിലാണ് മരിച്ചതെന്നാണ് സംശയിക്കുന്നത്. വീടിന്റെ അടുക്കള ഭാഗത്തെ വാതില്‍ തുറന്നിട്ട നിലയിലാണുണ്ടായിരുന്നത്. ഈ ഭാഗങ്ങളില്‍ ആരും അങ്ങനെ പോകാറില്ല. അതുകൊണ്ടുതന്നെ മരിച്ച വിവരം ആരും അറിഞ്ഞിരുന്നില്ല. കഴിഞ്ഞദിവസം സമീപവാസി വീട്ടിലെത്തിയപ്പോഴാണ് മരിച്ചനിലയില്‍ കാണുന്നത്. വിവരമറിഞ്ഞ് സ്ഥലത്തെത്തിയ അമ്പലത്തറ പൊലീസ് ഇന്‍ക്വസ്റ്റ് നടപടികള്‍ക്ക് ശേഷം മൃതദേഹം പോസ്റ്റുമോര്‍ട്ടത്തിനായി ആശുപത്രിയിലേക്ക് മാറ്റി.