സ്വകാര്യ സര്‍വ്വകലാശാല പദവി: അപേക്ഷ നല്‍കാനൊരുങ്ങി സ്വാശ്രയ കോളജുകളും
തിരുവനന്തപുരം: സ്വകാര്യ സര്‍വ്വകലാശാല പദവിക്ക് സംസ്ഥാനത്ത് നിലവില്‍ പ്രവര്‍ത്തിക്കുന്ന സ്വാശ്രയ കോളജുകളും അപേക്ഷ നല്‍കാനൊരുങ്ങുന്നതായുള്ള റിപ്പോര്‍ട്ടുകള്‍ പുറത്ത്. സ്വാശ്രയ മെഡിക്കല്‍ എഞ്ചിനീയറിംഗ് കോളജുകളടക്കം പത്തിലേറെ സ്ഥാപനങ്ങള്‍ ഇതിനായി നീക്കം തുടങ്ങിയതായുള്ള റിപ്പോര്‍ട്ടുകളാണ് പുറത്തുവന്നത്. ഫീസിലും പ്രവേശനത്തിലും നിയമനങ്ങളിലും സ്വകാര്യ സര്‍വകലാശാലക്കാകും പൂര്‍ണ അധികാരമെന്ന് കരട് ബില്ലില്‍ വ്യവസ്ഥ ചെയ്തിരുന്നു. കഴിഞ്ഞദിവസമാണ് മന്ത്രിസഭ കരട് ബില്‍ അംഗീകരിച്ചത്.
സ്വകാര്യ സ്വാശ്രയ കോളജുകളുടെ ഭൂമിയും കെട്ടിടവും സ്വകാര്യ സര്‍വകലാശാലകള്‍ക്കായി ഉപയോഗിക്കാമെന്നും കരട് ബില്ലില്‍ വ്യവസ്ഥയുണ്ട്. 25 കോടി എന്‍ഡോവ്‌മെന്റ് തുക കെട്ടിവെച്ചാല്‍ സ്വാശ്രയ കോളജുകള്‍ക്കും അപേക്ഷിക്കാം.
ഇതോടെ രാജ്യത്തെ വമ്പന്‍ സ്വകാര്യ സര്‍വകലാശാലകള്‍ മാത്രമല്ല കേരളത്തിലെ സ്വാശ്രയ മെഡിക്കല്‍ എഞ്ചിനീയറിംഗ്, ആര്‍ട്‌സ് കോളജുകളും സ്വകാര്യ സര്‍വകലാശാല പദവിക്കുള്ള ശ്രമം തുടങ്ങിക്കഴിഞ്ഞു.
സ്വകാര്യ സര്‍വകലാശാല മെച്ചപ്പെട്ട വിദ്യാഭ്യാസത്തിന്റെ പുതിയ അവസരമാണ് തുറക്കുന്നത്. പക്ഷെ നിലവിലെ സര്‍വകലാശാലകളുടെയും കോളജുകളുടേയും നിലനില്‍പില്‍ ആശങ്ക നിലനില്‍ക്കുന്നു. നടപ്പ് അധ്യയനവര്‍ഷം കേരള, കാലിക്കറ്റ്, എംജി കണ്ണൂര്‍ സര്‍വ്വകലാശാലകളിലെ കോളജുകളില്‍ ഒഴിവുള്ള ബിരുദ സീറ്റുകളുടെ എണ്ണം 82000 ആണ്. ഇതില്‍ കെടിയുവിന് കീഴില്‍ 12000 സീറ്റുകളുണ്ട്. സ്വകാര്യ സര്‍വകലാശാലകളുടെ വരവോടെ ഇവിടെയുള്ള കുട്ടികളുടെ എണ്ണം ഇനിയും കുറയാനിടയുണ്ട്.
മള്‍ട്ടി ഡിസിപ്ലിനറി കോഴ്‌സുകള്‍ തുടങ്ങേണ്ടതിനാല്‍ സ്വാശ്രയ മെഡിക്കല്‍ കോളജുകളില്‍ മറ്റ് ചില കോഴ്‌സുകള്‍ കൂടി ആരംഭിച്ചാലും സ്വകാര്യ സര്‍വകലാശാല പദവി കിട്ടും. കേരളത്തിലെ വിദ്യാര്‍ത്ഥികള്‍ക്ക് 40 ശതമാനം സംവരണം ഉണ്ട്. ഇതില്‍ പിന്നോക്ക സംവരണവും കരട് ബില്ലില്‍ വരും. പക്ഷെ ഫീസും ചാര്‍ജുകളും തീരുമാനിക്കുന്നതില്‍ പൂര്‍ണ അധികാരം സ്വകാര്യ സര്‍വ്വകലാശാലക്ക് തന്നെയാണ്.
ചാന്‍സലര്‍, പ്രോ ചാന്‍സലര്‍, അധ്യാപക അനധ്യാപക നിയമനങ്ങളുടേയും അധികാരം സര്‍വ്വകലാശാലക്കായിരിക്കും. വിദേശ സര്‍വകലാശാലകളുമായി സഹകരിച്ചും പ്രവര്‍ത്തിക്കാവുന്നതാണ്.
