അഭിമുഖത്തെ ആത്മവിശ്വാസത്തോടെ നേരിടാം:10 ചോദ്യങ്ങളും ഉത്തരങ്ങളും
എത്ര ഉയര്‍ന്ന വിദ്യാഭ്യാസ യോഗ്യത ഉണ്ടെങ്കിലും അഭിമുഖ പരീക്ഷയെ നേരിടാനുള്ള ആത്മവിശ്വാസം ഉണ്ടായിരിക്കണം. ഇല്ലെങ്കില്‍ ആഗ്രഹിച്ച ജോലി കിട്ടില്ല എന്ന കാര്യത്തില്‍ യാതൊരു സംശയവും വേണ്ട. ഉദ്യോഗാര്‍ഥികളെ സംഭന്ധിച്ചിടത്തോളം നല്ലൊരു ജോലി ലഭിക്കാനുള്ള പ്രധാന കടമ്പയാണ് അഭിമുഖ പരീക്ഷ. എന്നാല്‍ എല്ലാ അഭിമുഖങ്ങളിലും പൊതുവായി ചോദിക്കാന്‍ സാധ്യതയുള്ള ചില ചോദ്യങ്ങള്‍ അറിഞ്ഞുവച്ചാല്‍ നിങ്ങള്‍ക്ക് ആത്മവിശ്വാസ കുറവ് ഒരിക്കലും ഉണ്ടാകില്ല. പരീക്ഷയെ ഭയമില്ലാതെ അഭിമുഖീകരിക്കാനും, ജോലി നിങ്ങളുടെ കയ്യില്‍ ഭദ്രമാക്കാനും കഴിയും.
അത്തരത്തിലുള്ള പത്തു ചോദ്യങ്ങള്‍ ഇതാ;
1. നിങ്ങളെക്കുറിച്ച് പറയൂ
പലപ്പോഴും പല അഭിമുഖങ്ങളും ആരംഭിക്കുന്നത് ഈ ചോദ്യത്തോടുകൂടിയായിരിക്കും. ഇതിനുള്ള നിങ്ങളുടെ ഉത്തരമാണ് അഭിമുഖത്തിന്റെ അടിത്തറ. ഒന്നോ രണ്ടോ അഭിമുഖങ്ങളില്‍ പങ്കെടുത്തവര്‍ അടുത്ത അഭിമുഖങ്ങളെ നേരിടുമ്പോള്‍ തീര്‍ച്ചയായും ഈ ചോദ്യത്തിന് ഉത്തരം കണ്ടെത്തിയിരിക്കും. എന്തുതന്നെ ആയാലും നിങ്ങളുടെ പ്രഫഷനല്‍ യാത്രയെ കുറിച്ചുള്ള ഒരു രത്‌നചുരുക്കം നല്‍കാനും നിങ്ങളുടെ അനുഭവപരിചയത്തിനും ആര്‍ജിച്ച ശേഷികള്‍ക്കും ഊന്നല്‍ നല്‍കാനും ഈ ഉത്തരത്തില്‍ ശ്രദ്ധിക്കുക.
2. നിങ്ങളുടെ ശക്തിദൗര്‍ബല്യങ്ങള്‍
ഈ ചോദ്യത്തിനുള്ള ഉത്തരം ശ്രദ്ധാപൂര്‍വം നല്‍കണം. നിങ്ങളുടെ ശക്തികള്‍ ചര്‍ച്ച ചെയ്യുമ്പോള്‍ നിങ്ങള്‍ അപേക്ഷിച്ചിരിക്കുന്ന ജോലിക്ക് ആവശ്യമായ ഗുണങ്ങള്‍ക്ക് പ്രാധാന്യം നല്‍കി വേണം സംസാരിക്കാന്‍. നിങ്ങളുടെ ദൗര്‍ബല്യങ്ങളെക്കുറിച്ച് പറയുമ്പോള്‍ നിങ്ങള്‍ മെച്ചപ്പെടാന്‍ വേണ്ടിയുള്ള നടപടികള്‍ ആരംഭിച്ചു എന്ന രീതിയിലുള്ള ദൗര്‍ബല്യങ്ങളെപ്പറ്റി മാത്രം സംസാരിക്കുക.
3. എന്തുകൊണ്ട് ഇവിടെ ജോലി ചെയ്യാന്‍ ആഗ്രഹിക്കുന്നു
ആ സ്ഥാപനത്തില്‍ അപേക്ഷിക്കാനുള്ള നിങ്ങളുടെ പ്രചോദനമായിരിക്കും അവര്‍ ആവശ്യപ്പെടുന്നത്. കമ്പനിയുടെ മൂല്യങ്ങള്‍, വീക്ഷണം, അടുത്ത കാലത്തായി കൈവരിച്ച നേട്ടങ്ങള്‍ എന്നിവയെ കുറിച്ചെല്ലാം ഗവേഷണം നടത്തിയാല്‍ ഈ ചോദ്യത്തിന് എളുപ്പത്തില്‍ ഉത്തരം നല്‍കാം. കമ്പനി മുന്നോട്ടുവയ്ക്കുന്ന മൂല്യങ്ങളില്‍ നിങ്ങള്‍ക്ക് ശരിക്കും താല്‍പര്യം ഉണ്ടെന്ന് ഉത്തരത്തിലൂടെ അവര്‍ക്ക് ബോധ്യപ്പെടണം.
4. എന്തിന് ഞങ്ങള്‍ നിങ്ങളെ ജോലിക്കെടുക്കണം
ആ ജോലിക്കായി ലഭ്യമായ ഏറ്റവും മികച്ച മത്സരാര്‍ഥിയായി സ്വയം അവതരിപ്പിക്കാനുള്ള അവസരമാണ് ഈ ചോദ്യത്തിലൂടെ നല്‍കുന്നത്. നിങ്ങളുടെ പ്രത്യേക ശേഷികള്‍, അനുഭവപരിചയങ്ങള്‍ എന്നിവയെ കുറിച്ചു പറഞ്ഞ് അവ എങ്ങനെ കമ്പനിയുടെ ആവശ്യങ്ങള്‍ക്ക് ഉപകരിക്കും എന്നുകൂടി സൂചിപ്പിക്കണം. നിങ്ങളെ മറ്റ് ഉദ്യോഗാര്‍ഥികളില്‍ നിന്ന് വ്യത്യസ്തനാക്കുന്ന ഘടകങ്ങളും പറയാം.
5. നിങ്ങള്‍ ജോലിസ്ഥലത്ത് നേരിട്ട വെല്ലുവിളി
നിങ്ങളുടെ പ്രശ്‌നപരിഹാര ശേഷിയെ അളക്കുന്നതാണ് ഈ ചോദ്യം. ഇതിന് ഉത്തരം നല്‍കാന്‍ സിറ്റുവേഷന്‍, ടാസ്‌ക്, ആക്ഷന്‍, റിസല്‍ട്ട് രീതി തുടങ്ങിയവ പിന്തുടരാം. ജോലിക്കിടെ വന്നുപെട്ട ഒരു വെല്ലുവിളി നിറഞ്ഞ സാഹചര്യം, അത് പരിഹരിക്കാന്‍ എടുക്കേണ്ട നടപടി, നിങ്ങള്‍ സ്വീകരിച്ച മാര്‍ഗം, അതിന്റെ ഫലം ഇതെല്ലാം വളരെ തന്‍മയത്തത്തോടെ അവതരിപ്പിക്കുക.
6. എന്തുകൊണ്ട് നിലവിലെ ജോലി വിടുന്നു
ഈ ചോദ്യം വളരെ സൂക്ഷ്മതയോടെ കൈകാര്യം ചെയ്യേണ്ടതാണ്. പോസിറ്റീവ് ടോണില്‍ മാത്രം ഉത്തരം നല്‍കണം. വളര്‍ച്ചയ്ക്കും പുതു വെല്ലുവിളികള്‍ക്കും ആയിട്ടുള്ള നിങ്ങളുടെ ആഗ്രഹത്തെ കുറിച്ചും നിങ്ങളുടെ കരിയര്‍ ലക്ഷ്യങ്ങള്‍ക്കായി പുതിയ ജോലി പിന്തുടരേണ്ടതിന്റെ ആവശ്യകതയെ കുറിച്ചും പറയാം. നിലവിലെ കമ്പനിയെയോ വ്യക്തികളെയോ കുറിച്ച് നെഗറ്റീവായി ഒരിക്കലും സംസാരിക്കരുത്.
7. അടുത്ത അഞ്ചു വര്‍ഷത്തില്‍ നിങ്ങളെ എവിടെ കാണുന്നു
നിങ്ങളുടെ ദീര്‍ഘകാല കരിയര്‍ അഭിലാഷങ്ങളാണ് ഈ ചോദ്യത്തിലൂടെ പ്രതീക്ഷിക്കുന്നത്. നിങ്ങളുടെ വ്യക്തിഗത വളര്‍ച്ചയുടെ ലക്ഷ്യങ്ങളെ കുറിച്ചും അവ കമ്പനിയുടെ വരുംവര്‍ഷങ്ങളിലെ വളര്‍ച്ചയുമായി എങ്ങനെ ചേര്‍ന്നു പോകുന്നു എന്നതുമെല്ലാം പറയാം.
8. ശമ്പളം എത്ര പ്രതീക്ഷിക്കുന്നു
ശമ്പളത്തെക്കുറിച്ചുള്ള ചര്‍ച്ചകള്‍ക്കും ചില തയാറെടുപ്പുകള്‍ ആവശ്യമാണ്. നിങ്ങള്‍ അപേക്ഷിക്കുന്ന ജോലിക്ക് നിലവില്‍ ശരാശരി എത്ര ലഭിക്കുന്നുണ്ട് എന്നതിനെ കുറിച്ച് ഒരു അന്വേഷണം നടത്തണം. നിങ്ങളുടെ തൊഴില്‍പരിചയവും ശമ്പളം കണക്കാക്കുമ്പോള്‍ പരിഗണിക്കണം. നിങ്ങളുടെ മൂല്യത്തെക്കുറിച്ച് വ്യക്തമായ ധാരണയോടെ വേണം ശമ്പളക്കാര്യത്തിലെ ചര്‍ച്ചകള്‍.
9. ജോലിക്ക് എപ്രകാരം മുന്‍ഗണന നല്‍കുന്നു
ടൈം മാനേജ്‌മെന്റ് എല്ലാ ജോലിക്കും മുഖ്യമാണ്. ജോലികള്‍ തരംതിരിക്കുന്നതിലും മുന്‍ഗണനകള്‍ നിശ്ചയിക്കുന്നതിലും ഡെഡ് ലൈനുകള്‍ക്കുള്ളില്‍ അവ തീര്‍ക്കുന്നതിലുമുള്...
10. ഞങ്ങളോട് എന്തെങ്കിലും ചോദ്യമുണ്ടോ
നിങ്ങള്‍ക്ക് കമ്പനിയിലും ആ ജോലിയിലുമുള്ള താല്‍പര്യം പ്രകടമാക്കുന്നതിനുള്ള അവസരമാണ് ഈ ചോദ്യത്തിലൂടെ നല്‍കുന്നത്. കമ്പനി സംസ്‌കാരത്തെക്കുറിച്ചും ടീംവര്‍ക്കിനെ കുറിച്ചും വരുന്ന പ്രോജക്ടുകളെക്കുറിച്ചുമൊക്കെയുള്ള പോസിറ്റീവ് ആയ ഉത്തരങ്ങള്‍ തയാറാക്കി വയ്ക്കുക. നിങ്ങളെക്കുറിച്ച് നല്ല അഭിപ്രായമുണ്ടാക്കാന്‍ മാത്രമല്ല, കമ്പനി നിങ്ങള്‍ക്ക് ചേര്‍ന്നതാണോ എന്നറിയാനും ഇവ സഹായിക്കും
