പരീക്ഷാ ചൂടില്‍ വിദ്യാര്‍ഥികള്‍; സി.ബി.എസ്.ഇ 10, 12 ക്ലാസ് വാര്‍ഷിക പരീക്ഷകള്‍ക്ക് തുടക്കം
ന്യൂഡെല്‍ഹി: ഇത് പരീക്ഷാ കാലം. വിദ്യാര്‍ഥികളെല്ലാം പരീക്ഷകളെ അഭിമുഖീകരിക്കാനുള്ള അവസാനഘട്ട തയാറെടുപ്പിലാണ്. വിവിധ ക്ലാസുകളില്‍ വാര്‍ഷിക പരീക്ഷകളും നടക്കുന്നുണ്ട്. അതില്‍ പ്രധാനമാണ് സി.ബി.എസ്.ഇ 10, 12 ക്ലാസിലെ വാര്‍ഷിക പരീക്ഷകള്‍. ഇന്ത്യയിലും വിദേശത്തുമായി 8000 സ്‌കൂളുകളിലായി 42 ലക്ഷത്തോളം വിദ്യാര്‍ത്ഥികള്‍ എഴുതുന്ന പരീക്ഷ ഇന്നാണ് തുടങ്ങുന്നത്.
ഇന്ത്യയില്‍ 7842 പരീക്ഷ കേന്ദ്രങ്ങളാണ് തയാറായിട്ടുള്ളത്. വിദേശത്ത് 26 പരീക്ഷാ കേന്ദ്രങ്ങളും സജ്ജമാക്കിയിട്ടുണ്ട്. മാര്‍ച്ച് 18 വരെയാണ് പത്താം ക്ലാസ് പരീക്ഷകള്‍. പന്ത്രണ്ടാം ക്ലാസ് പരീക്ഷകള്‍ ഏപ്രില്‍ നാലിന് അവസാനിക്കും. രണ്ട് ക്ലാസുകളിലെയും പരീക്ഷകള്‍ രാവിലെ 10:30 മുതല്‍ ആരംഭിക്കുന്ന തരത്തില്‍ ഒറ്റ ഷിഫ്റ്റ് ആയാണ് നടത്തുക.
വസ്ത്ര ധാരണരീതി, പരീക്ഷാ ഹാളിനുള്ളില്‍ അനുവദനീയവും പാടില്ലാത്തതുമായ ഇനങ്ങള്‍ അടക്കം വിദ്യാര്‍ഥികള്‍ പാലിക്കേണ്ടതായ കാര്യങ്ങള്‍ സി.ബി.എസ്.ഇ വെബ് സൈറ്റില്‍ നല്‍കിയിട്ടുണ്ട്.
ആദ്യ പരീക്ഷാദിനത്തില്‍ പത്താം ക്ലാസ് വിദ്യാര്‍ത്ഥികള്‍ ഇംഗ്ലീഷ് (കമ്മ്യൂണിക്കേറ്റീവ്), ഇംഗ്ലീഷ്(ലാംഗ്വേജ് ആന്‍ഡ് ലിറ്ററേച്ചര്‍) വിഷയവും +2 വിദ്യാര്‍ത്ഥികള്‍ എന്റര്‍പ്രീനര്‍ഷിപ്പ് പരീക്ഷയുമാണ് എഴുതുക. സ്ഥിരം സ്‌കൂള്‍ വിദ്യാര്‍ത്ഥികള്‍ അഡ് മിറ്റ് കാര്‍ഡിനൊപ്പം സ്‌കൂള്‍ തിരിച്ചറിയല്‍ കാര്‍ഡും സ്വകാര്യമായി പരീക്ഷ എഴുതുന്ന വിദ്യാര്‍ത്ഥികള്‍ അഡ് മിറ്റ് കാര്‍ഡിനൊപ്പം സര്‍ക്കാര്‍ അംഗീകരിച്ച തിരിച്ചറിയല്‍ കാര്‍ഡുമാണ് പരീക്ഷാകേന്ദ്രങ്ങളിലേക്ക് കൊണ്ടുവരേണ്ടത്.
സുതാര്യമായ പൌച്ച്, ജിയോമെട്രി പെന്‍സില്‍ ബോക്‌സ്, നീല നിറത്തിലുള്ള ബോള്‍ പോയിന്റ്, ജെല്‍ പെന്‍, സ്‌കെയില്‍, റൈറ്റിംഗ് പാഡ്, ഇറേസര്‍, അനലോഗ് വാച്ച്, സുതാര്യമായ വാട്ടര്‍ ബോട്ടില്‍, മെട്രോ കാര്‍ഡ്, ബസ് പാസ്, പണം എന്നിവ മാത്രമാണ് പരീക്ഷാ ഹാളില്‍ കയറ്റുന്നത്. ലോഗ് ടേബിള്‍ പരീക്ഷാ കേന്ദ്രങ്ങളില്‍ നിന്നും വിദ്യാര്‍ത്ഥികള്‍ക്ക് നല്‍കും.
മൊബൈല്‍ ഫോണ്‍, ബ്ലൂടൂത്ത്, ഇയര്‍ഫോണ്‍, മൈക്രോ ഫോണ്‍, പേജര്‍, ഹെല്‍ത്ത് ബാന്‍ഡ്, സ്മാര്‍ട്ട് വാച്ച്, കാമറ പഴ്‌സ്, കൂളിംഗ് ഗ്ലാസ്, ഹാന്‍ഡ് ബാഗ് എന്നിവ ഹാളില്‍ അനുവദിക്കില്ല. പ്രമേഹ സംബന്ധിയായ ബുദ്ധിമുട്ട് നേരിടുന്ന വിദ്യാര്‍ത്ഥികള്‍ക്ക് തുറന്ന കവറില്‍ ഭക്ഷണ സാധനം കൊണ്ടുവരാം. റെഗുലര്‍ വിദ്യാര്‍ത്ഥികള്‍ യൂണിഫോമും പ്രൈവറ്റായി എഴുതുന്നവര്‍ ഇളം നിറത്തിലുള്ള വസ്ത്രങ്ങളുമാണ് ഹാളില്‍ ധരിക്കേണ്ടത്.
