തിരുവനന്തപുരം: അര്ജന്റീന-ബ്രസീല് സ്വപ്ന ഫൈനലിനൊടുവില് കോപ്പ അമേരിക്ക കിരീടം അര്ജന്റീന ഉയര്ത്തി. കേരളത്തിലും അര്ജന്റീന ആരാധകര് മതിമറന്ന് ആഘോഷിക്കുമ്പോള് ആ സന്തോഷത്തില് കൂട്ടത്തിലൊരാളായി പങ്കു ചേരുന്നതായി മുഖ്യമന്ത്രി പിണറായി വിജയന്. അര്ജന്റീനയുടെ വിജയവും ലയണല് മെസി എന്ന ലോകോത്തര താരത്തിന്റെ കിരീടധാരണവും എത്രമാത്രം സുന്ദരമാണെന്ന് അദ്ദേഹം ഫെയ്സ്ബുക്കില് കുറിച്ചു.
മുഖ്യമന്ത്രിയുടെ വാക്കുകള്;
അതിര്ത്തികള് ഭേദിക്കുന്ന സാഹോദര്യമാണ് ഫുട്ബോളിന്റെ സൗന്ദര്യം. അര്ജന്റീനയ്ക്കും ബ്രസീലിനും വേണ്ടി ആര്ത്തുവിളിക്കാന് ലക്ഷക്കണക്കിനാളുകള് ഇങ്ങ് കേരളത്തിലും ഉള്ളത് ആ കാരണം കൊണ്ടാണ്. ഇന്ന് നടന്ന കോപ്പ അമേരിക്ക ഫൈനല് മത്സരം ആ യാഥാര്ത്ഥ്യത്തിന് അടിവരയിടുന്നു. വാശിയേറിയ മത്സരത്തില് യഥാര്ത്ഥത്തില് വിജയിച്ചത് ഫുട്ബോള് ഉയര്ത്തിപ്പിടിക്കുന്ന മാനവികതയും സാഹോദര്യവും സ്പോര്ട്സ്മാന് സ്പിരിറ്റുമാണ്. അര്ജന്റീനയുടെ വിജയവും ലയണല് മെസി എന്ന ലോകോത്തര താരത്തിന്റെ കിരീടധാരണവും എത്രമാത്രം സുന്ദരം! ഫുട്ബോള് എന്ന ഏറ്റവും ജനകീയമായ കായികവിനോദത്തിന്റെ സത്ത ഉയര്ത്തിപ്പിടിക്കാന് നമുക്കാകട്ടെ. ഫുട്ബോള് ആരാധകരുടെ സന്തോഷത്തില് കൂട്ടത്തിലൊരാളായി പങ്കുചേരുന്നു.