വേഗമാകട്ടെ, ഇനി ദിവസങ്ങള്‍ മാത്രം; ഏപ്രില്‍ മുതല്‍ മാരുതി സുസുക്കി കാറുകളുടെ വില 4 ശതമാനം വരെ വര്‍ധിപ്പിക്കും
ന്യൂഡല്‍ഹി: ഏപ്രില്‍ മുതല്‍ തങ്ങളുടെ കാറുകളുടെ വില വര്‍ധിപ്പിക്കാന്‍ പദ്ധതിയിടുന്നതായി വ്യക്തമാക്കി ഇന്ത്യന്‍ പാസഞ്ചര്‍ വാഹന വിപണിയിലെ പ്രമുഖരായ മാരുതി സുസുക്കി. തിങ്കളാഴ്ച രാവിലെയാണ് ഇതുസംബന്ധിച്ച പ്രഖ്യാപനം അധികൃതര്‍ പുറത്തുവിട്ടത്. വില വര്‍ധനവ് നിര്‍മ്മാണത്തെയും മോഡലിനെയും ആശ്രയിച്ചിരിക്കുമെന്നും 4 ശതമാനം വരെയാകുമെന്നുമുള്ള റിപ്പോര്‍ട്ടുകള്‍ പുറത്തുവരുന്നുണ്ട്.
2024 ല്‍ ഇന്ത്യയില്‍ 17.55 ലക്ഷം യൂണിറ്റുകള്‍ വിറ്റഴിച്ച മാരുതി സുസുക്കി, ചെലവ് ഒപ്റ്റിമൈസ് ചെയ്യാനുള്ള നീക്കത്തിന്റെ ഭാഗമായാണ് വില വര്‍ധനയെന്ന് ഉപഭോക്താക്കളെ അറിയിച്ചു.
'ഉപഭോക്താക്കളില്‍ ഉണ്ടാകുന്ന ആഘാതം കുറയ്ക്കാന്‍ കമ്പനി ശ്രമിക്കുമ്പോള്‍, വര്‍ദ്ധിച്ച ചെലവിന്റെ ഒരു ഭാഗം വിപണിയിലേക്ക് കൈമാറേണ്ടി വന്നേക്കാം,' - എന്ന് കാര്‍ നിര്‍മ്മാതാവ് ഒരു റെഗുലേറ്ററി പ്രഖ്യാപനത്തില്‍ അറിയിച്ചു. വിവിധ മോഡലുകളെ അടിസ്ഥാനമാക്കി വില വര്‍ധനയില്‍ വ്യത്യാസമുണ്ടാകും.
ചെലവ് പരമാവധി കുറയ്ക്കാന്‍ ശ്രമിച്ച് ഉപഭോക്താക്കളിന്മേലുള്ള ആഘാതം ഒഴിവാക്കാനാണ് പരിശ്രമിക്കുന്നത്. എങ്കിലും പുതിയ സാഹചര്യത്തില്‍ വര്‍ദ്ധിച്ച ചെലവിന്റെ ഒരു ഭാഗം വിപണിയിലേക്ക് കൈമാറേണ്ടിവന്നിരിക്കുകയാണെന്നും കമ്പനി അറിയിച്ചു. എന്‍ട്രി ലെവല്‍ ആള്‍ട്ടോ കെ-10 മുതല്‍ മള്‍ട്ടിപ്പിള്‍ പര്‍പ്പസ് വെഹിക്കിള്‍ ഇന്‍വിക്റ്റോ വരെയുള്ള മോഡലുകള്‍ ആഭ്യന്തര വിപണിയില്‍ മാരുതി സുസുക്കി വില്‍ക്കുന്നുണ്ട്.
ഫെബ്രുവരി 1 മുതല്‍ വിവിധ മോഡലുകള്‍ക്ക് 32,500 രൂപ വരെ വില വര്‍ധിപ്പിക്കുമെന്ന് ജനുവരിയില്‍ കമ്പനി പ്രഖ്യാപിച്ചിരുന്നു. അതിനിടെ ബി.എസ്.ഇയില്‍ മാരുതി സുസുക്കി ഇന്ത്യയുടെ ഓഹരികള്‍ 0.61 ശതമാനം ഉയര്‍ന്ന് 11,578.50 രൂപയായി.
മാരുതി സുസുക്കി ഇപ്പോഴും മൊത്തത്തില്‍ ആധിപത്യം പുലര്‍ത്തുന്നുണ്ടെങ്കിലും, വാഹന നിര്‍മ്മാതാക്കളായ ഹ്യുണ്ടായിയും ടാറ്റ മോട്ടോഴ്സും ചില മോഡലുകളുമായി മത്സരിക്കുന്നു. ഈ മൂന്ന് ബ്രാന്‍ഡുകള്‍ക്കും ഇന്ത്യയില്‍ 68 ശതമാനം വിപണി വിഹിതമുണ്ട്. 2024 ലെ വില്‍പ്പന കണക്കുകള്‍ പ്രകാരം മഹീന്ദ്ര & മഹീന്ദ്ര ഏതാണ്ട് നാലാം സ്ഥാനത്താണ്.
എന്നിരുന്നാലും, യഥാര്‍ത്ഥത്തില്‍ ശ്രദ്ധേയമായ കാര്യം, നാല്‍പ്പത് വര്‍ഷത്തിനിടെ ആദ്യമായി, ഇന്ത്യയില്‍ ഏറ്റവും കൂടുതല്‍ വിറ്റഴിക്കപ്പെടുന്ന കാര്‍ എന്ന പദവി മാരുതി സുസുക്കിക്ക് നഷ്ടമായി എന്നതാണ്. 2024-ല്‍, ടാറ്റ പഞ്ചിന് 2 ലക്ഷത്തിലധികം യൂണിറ്റുകള്‍ വിറ്റഴിച്ച് മാരുതി സുസുക്കി വാഗണ്‍ ആറിനെ പിന്നിലാക്കി.
ഐക്കണിക് ഹാച്ച് ബാക്കിന്റെ നേതൃത്വത്തില്‍, മാരുതി സുസുക്കി ഇപ്പോഴും രണ്ടും മൂന്നും നാലും സ്ഥാനങ്ങള്‍ (വാഗണ്‍ ആര്‍, എട്രിഗ, ബ്രെസ്സ) നേടിയിട്ടുണ്ട്. അഞ്ചാം സ്ഥാനം ഹ്യുണ്ടായി ക്രെറ്റയ്ക്കാണ്.
ഏറ്റവും പുതിയ വിലവര്‍ദ്ധനവ് മാരുതി സുസുക്കിയുടെ ഏറ്റവും കൂടുതല്‍ വിറ്റഴിക്കപ്പെടുന്ന കാറിനുള്ള ഒന്നാം സ്ഥാനം വീണ്ടെടുക്കാനുള്ള സാധ്യതയെ തടസ്സപ്പെടുത്തിയേക്കാം എന്ന് വ്യവസായ പ്രമുഖര്‍ വിലയിരുത്തുന്നു.
