തിരുവനന്തപുരം: സംസ്ഥാനത്ത് നിയമസഭാ-ലോക്സഭാ തെരഞ്ഞെടുപ്പുകളെ തുടര്ന്ന് പൊതു അവധി പ്രഖ്യാപിച്ചു. നിയമസഭാ തെരഞ്ഞെടുപ്പും മലപ്പുറം ലോക്സഭാ മണ്ഡലത്തിലേക്കുള്ള ഉപതെരഞ്ഞെടുപ്പും നടക്കുന്ന ഏപ്രില് ആറിന് സംസ്ഥാനത്തെ സര്ക്കാര് ഓഫീസുകള് ഉള്പ്പെടെയുള്ള എല്ലാ സ്ഥാപനങ്ങള്ക്കും വിദ്യാഭ്യാസ സ്ഥാപനങ്ങള്ക്കും പൊതു അവധി പ്രഖ്യാപിച്ച് പൊതുഭരണ വകുപ്പ് ഉത്തരവിറക്കി. അന്നേദിവസം സംസ്ഥാനത്തെ വാണിജ്യ സ്ഥാപനങ്ങള്ക്ക് ശമ്പളത്തോടു കൂടിയ അവധിയായിരിക്കും.
സ്വകാര്യ സ്ഥാപനങ്ങളിലെ ജീവനക്കാര്ക്ക് വോട്ടെടുപ്പ് ദിവസം ശമ്പളത്തോടു കൂടിയ അവധി ലഭ്യമാക്കാന് ലേബര് കമ്മീഷണര് ആവശ്യമായ നടപടി സ്വീകരിക്കണമെന്നും ഉത്തരവില് വ്യക്തമാക്കിയിട്ടുണ്ട്. കൂടാതെ വോട്ടര് പട്ടികയില് പേരു വന്നിട്ടുള്ളതും എന്നാല് ആ ജില്ലയ്ക്ക് പുറത്ത് ജോലി ചെയ്യുന്ന ഇതര വിഭാഗം ജീവനക്കാര്ക്കും കാഷ്വല് ജീവനക്കാര്ക്കും വോട്ടെടുപ്പ് ദിവസം വേതനത്തോടു കൂടിയ അവധിയായിരിക്കും. അതേസമയം മാധ്യമപ്രവര്ത്തകരടക്കമുള്ളവര്ക്ക് പോസ്റ്റല് ബാലറ്റ് വഴി വോട്ട് രേഖപ്പെടുത്താന് നേരത്തെ നടപടി സ്വീകരിച്ചിരുന്നു.