മംഗളൂരു: പ്രധാനമന്ത്രി നരേന്ദ്ര മോദി സെപ്തംബര് രണ്ടിന് മംഗളൂരുവില് സന്ദര്ശനം നടത്തും. ഇവിടെ നടക്കുന്ന വിവിധ പരിപാടികളില് പങ്കെടുക്കും. ഔദ്യോഗിക യാത്രാവിവരം ഒന്നോ രണ്ടോ ദിവസത്തിനകം പ്രഖ്യാപിക്കും. അനഘ റിഫൈനറി, എന്എംപിടിയിലെ ബര്ത്ത് നമ്പര് 14 എന്നിവയുള്പ്പെടെ ആറ് പദ്ധതികള് പ്രധാനമന്ത്രി ഉദ്ഘാടനം ചെയ്യും. സാഗര്മാല പദ്ധതിക്കും അദ്ദേഹം തറക്കല്ലിടും.
പിന്നീട് അഞ്ച് ലക്ഷം ആളുകള് ഒത്തുചേരുമെന്ന് പ്രതീക്ഷിക്കുന്ന കുളൂരിലെ ഗോള്ഡ് ഫിഞ്ച് ഗ്രൗണ്ടില് നടക്കുന്ന മഹാസമ്മേളനത്തെ പ്രധാനമന്ത്രി അഭിസംബോധന ചെയ്യും.
മോദിയുടെ സന്ദര്ശനം ഡെപ്യൂട്ടി കമ്മീഷണര് ഡോ. രാജേന്ദ്ര കെ വി സ്ഥിരീകരിച്ചു. സുരക്ഷ ഉള്പ്പെടെ എല്ലാ ഒരുക്കങ്ങളും ആരംഭിച്ചു. ആദ്യ തദ്ദേശീയ വിമാനവാഹിനി യുദ്ധക്കപ്പലായ ഐഎന്എസ് വിക്രാന്ത് സെപ്തംബര് രണ്ടിന് രാവിലെ മോദി ഉദ്ഘാടനം ചെയ്യും. ഉച്ചയ്ക്ക് ശേഷം പൊതുപരിപാടിയില് പങ്കെടുക്കുന്ന അദ്ദേഹം വൈകിട്ട് ഡല്ഹിക്ക് പോകും. മുന്പ്രധാനമന്ത്രി ലാല് ബഹദൂര് ശാസ്ത്രിയാണ് എന്എംപിടിയുടെ തറക്കല്ലിട്ടിരുന്നത്. 1975ല് ഇന്ദിരാഗാന്ധി പ്രധാനമന്ത്രിയായിരുന്നപ്പോള് തുറമുഖം ഉദ്ഘാടനം ചെയ്തു. എന്എംപിടി സന്ദര്ശിക്കുന്ന മൂന്നാമത്തെ പ്രധാനമന്ത്രിയാണ് മോദി.
പ്രധാനമന്ത്രിയായ ശേഷം ദക്ഷിണ കന്നഡ ജില്ലയില് മോദി പങ്കെടുക്കുന്ന ആദ്യ ഔദ്യോഗിക പരിപാടിയാണിത്.
ശ്രീ ക്ഷേത്ര ധര്മസ്ഥല ഗ്രാമവികസന പദ്ധതികളുടെ സമ്മേളനത്തില് പങ്കെടുക്കാന് 2017ല് മോദി മംഗളൂരു സന്ദര്ശിച്ചിരുന്നു. 2021ല് അദ്ദേഹം ഡല്ഹിയില് നിന്ന് വീഡിയോ കോണ്ഫറന്സിലൂടെ കൊച്ചി-മംഗളൂരു വാതക പൈപ്പ് ലൈന് ഉദ്ഘാടനം ചെയ്തു. 2016ല് കേരളത്തിലെ കൊച്ചിയിലേക്കുള്ള യാത്രയ്ക്കിടെ നഗരത്തിലെ അന്താരാഷ്ട്ര വിമാനത്താവളത്തില് വച്ചാണ് മോദി പാര്ട്ടി പ്രവര്ത്തകരെ കണ്ടത്. 2017 ഡിസംബര് 18 ന് ലക്ഷദ്വീപിലേക്കുള്ള വഴിയിലുള്ള സര്ക്യൂട്ട് ഹൗസില് രാത്രിയും അദ്ദേഹം താമസിച്ചു. 2018ല് മോദി നിയമസഭാ തിരഞ്ഞെടുപ്പ് പ്രചാരണത്തിനായി നഗരത്തിലെത്തുകയും നെഹ്റു മൈതാനിയില് നടന്ന മാമാങ്ക റാലിയെ അഭിസംബോധന ചെയ്യുകയും ചെയ്തിരുന്നു.